– گۇلزادا حانىم, كوڭىل-كۇيىڭىز قالاي, حالىقارالىق كورمە اياسىندا استانادا ءوتىپ جاتقان مادەني شارالار ۇنادى ما, سىزگە؟
– شىنىمدى ايتايىن, استانا قالاسى ءدال مۇنداي بيىك مارتەبەگە قول جەتكىزگەن شاھار ەكەنىن بۇرىن اڭداماپپىن. وسىندا كەلگەلى وتە ءبىر كوتەرىڭكى كوڭىل كۇيدە ءجۇرمىن. مۇنداعى اتموسفەرا قاتتى ۇنادى. قازاق ەلى قارىشتاپ دامىعان ەكەن.
– «NOMAD WAY» فەستيۆالىنە قانداي اندەردى تارتۋ ەتپەكسىز؟
– بۇل شاراعا جالعىز مەن ەمەس, قۇرامىندا جيىرماداي ونەرپاز بار قىرعىزدىڭ ەتنوفولكلورلىق ءانسامبلى كەلىپ وتىر. سونىڭ سۇيەمەلدەۋىمەن ءارى جاندى داۋىستا ۇلتتىق ەتنومۋزىكالىق تۋىندىلاردى ورىندايمىن. ودان كەيىن مەنىڭ اتاعىمدى شىعارعان «مەن قىرعىز قىزىمىن» ءانىن دە قازاق كورەرمەندەرىنە تارتۋ ەتپەكپىن.
– ءسىز نە سەبەپتى ەتنوونەر سالاسىن تاڭدادىڭىز؟
– مەن ەكسپەريمەنت جاساۋدى ۇناتامىن. ەتنودجاز, روك, پوپسا – وسىلاردىڭ كەز كەلگەنىن تاڭداي بەرەمىن. قازىر ادام بالاسىنىڭ جان دۇنيەسىندە داعدارىس بار. ادامدار ينتەرنەت, الەۋمەتتىك جەلىدەن دە ءبىر كۇنى جيرەنەتىن بولادى. ءسويتىپ, بايىرعى تەك-تانىمىن اڭسايدى. ول – مىنا ەتنومۋزىكا. سول سەبەپتى مەن كوشپەندى بابالارىمىزدىڭ تابيعاتقا دەگەن سىيلاستىعى مەن سۇيىسپەنشىلىگى سىڭىرىلگەن وسى ەتنوونەردى تاڭدادىم.
– قازاقشا دا ءان ايتاتىن كورىنەسىز.
– وسى فەستيۆالعا شاقىرتۋ العان كۇننەن باستاپ قازاقتىڭ ەسكى اندەرىن تىڭداپ كوردىم. اسىرەسە, سىزدەردە «قارا ولەڭ» دەپ ايتاتىن ەپيكالىق سارىندى اندەرگە ىقىلاسىم اۋدى. «ايت دەگەندە ولەڭدى ءبىز ايتايىق, كوپشىلىكتىڭ كوڭىلىن قۋانتايىق...» دەپ باستالاتىن حالىق ءانىن ءوزىمنىڭ رەپەرتۋارىما كىرگىزدىم. وسى ءاندى جاڭاشا ىرعاقپەن ورىندايتىن بولامىن.
– بۇدان باسقا...
– بۇدان باسقا, شوڭ ءانشى اپامىز روزا رىمباەۆانىڭ ورىنداۋىنداعى «كۋا بول» مەنىڭ بالا كۇنىمدە كوكەيىمە تەرەڭ قوناقتاعان ءان ەدى. سونى دا رەتىن تاۋىپ, كوپشىلىككە ۇسىنامىن.
– ءوز ءستيلىڭىز قالىپتاسقان, دارا ءانشىسىز. وسى بيىككە قالاي جەتتىڭىز؟
– كىشكەنتاي كەزىمدە اتاقتى انشىلەرگە ەلىكتەپ, سولاردىڭ مانەرىنە ەلتىپ كەتە بەرۋشى ەدىم. كەيىن ءانشىنىڭ وزىندىك بەت-بەينەسى بولۋى كەرەك ەكەنىن ءتۇسىندىم. ول ءۇشىن ادامنىڭ تانىمى, اقىلى, رۋحاني جان دۇنيەسى ۇيلەسىم تابۋى قاجەت ەكەن. وسى ۇيلەسىمدى تاپقاندا بارىپ ءوزىمدى تاپقانداي بولدىم.
– شەت ەلگە كوپ شىعاسىز با؟
– وتە كوپ شىعامىن. كوبىندە تۇركيادا بولامىن. تۇرىك باۋىرلارىمىزدىڭ تۋريستەرگە قىزمەت كورسەتۋ سەرۆيسى مەن كورەيلەردىڭ مادەنيەتى ۇنايدى. وسى ءۇردىس قىرعىزستاندا دا قالىپتاسسا دەپ ارماندايمىن.
– ءوزىڭىز جايلى ءبىر اۋىز...
– وش وبلىسى, وزگون ءوڭىرىنىڭ تۋماسىمىن. جاسىم 37-دە. كۇيەۋىم, ەكى بالام بار.
اڭگىمەلەسكەن
بەكەن قايرات ۇلى,
«ەگەمەن قازاقستان»
