سالتاناتتى شارا استانا قالاسىنىڭ ىرگەسىندە ورنالاسقان «قازانات» يپپودرومى اۋماعىنداعى «ەتنواۋىل» ۇلتتىق-مادەني كەشەنىندە ۇيىمداستىرىلدى.
بايقاۋ ەرەجەسى بويىنشا وعان مەملەكەتتىك ءتىلدىڭ قىزمەت ەتۋ اياسىن كەڭەيتۋ, مارتەبەسىن نىعايتۋ جانە ونىڭ قازىرگى احۋالى جونىندە وزەكتى ماتەريالدار جاريالاعان تىلشىلەر قاتىستى. ۇيىمداستىرۋشىلاردىڭ ايتۋىنشا, ەلىمىزدىڭ ءار وڭىرىنەن 200-دەن اسا ماتەريال كەلىپ تۇسكەن. جەڭىمپازدار «ۇزدىك ماقالا», «ۇزدىك تەلەباعدارلاما», «ۇزدىك راديوباعدارلاما», «ۇزدىك سايت ماقالاسى» نوميناتسيالارى بويىنشا ءتورت باعىتتا ماراپاتتالدى.
كونكۋرس قورىتىندىسى بويىنشا, باس جۇلدەگە «جەتىسۋ» تەلەارناسىنىڭ رەداكتورى مەرۋەرت مۇراتبەكقىزى ابىتاەۆا يە بولدى. «ۇزدىك ماقالا» اتالىمىندا «استانا اقشامى» گازەتىنىڭ ءجۋرناليسى گۇلجان راحمانوۆا 1-ورىندى يەلەنسە, 2-ورىنعا «ەگەمەن قازاقستان» باسىلىمىنىڭ شولۋشىسى عالىم ومارحان لايىق دەپ تانىلدى. ال ۇزدىك ۇشتىكتى پاۆلودار وبلىستىق «سارىارقا سامالى» گازەتىنىڭ ءتىلشىسى نۇرجاينا شودىر تۇيىندەدى.
«ۇزدىك سايت ماقالاسى» اتالىمىندا 1-ورىندى «ايقىن» گازەتى اقپارات جانە سپورت ءبولىمىنىڭ رەداكتورى قانشايىم بايداۋلەت السا, 2-ورىندى «قوعامدىق كەلىسىم» رمم ءباسپاسوز قىزمەتىنىڭ جەتەكشى ساراپشىسى كامال الپەيىسوۆا ال 3-ورىندى «ۇركەر.كز» سايتىنىڭ ءجۋرناليسى نۇرلان قۇمار يەلەندى.
سونىمەن قاتار, «ۇزدىك تەلەباعدارلاما» اتالىمى بويىنشا 1-ورىندى «قازاقستان-شىمكەنت» تەلەارناسىنىڭ ءجۋرناليسى تورەبەك بايتاسوۆ, 2-ورىندى «قازاقستان-اتىراۋ» تەلەارناسىنىڭ ءتىلشىسى شولپان سيسەناليەۆا, 3-ورىندى «حابار» اگەنتتىگى كەشكى جاڭالىقتار قىزمەتىنىڭ ءتىلشىسى ينديرا جىلقايداروۆا جەڭىپ الدى.
ال «ۇزدىك راديوباعدارلاما» اتالىمى بويىنشا 1-ورىندى «حالىق» راديوسىنىڭ ءتىلشىسى راۋشان سىبانجانوۆا, 2-ورىندى «قازاق» راديوسىنىڭ ءتىلشىسى جانات جانۇزاقوۆ, 3-ورىندى «حالىق» راديوسى ءتىلشىسى گۇلسىم قوبجانوۆا ەنشىلەدى.
ايان ءابدۋالي,
«ەگەمەن قازاقستان»
