«تاۋەلسىزدىكتىڭ العاشقى جىلدارىندا قۇرىلعان قوعامدىق ينستيتۋت جۇمىسىنىڭ ناتيجەسى – ەلىمىزدەگى كەلىسىم, بىرلىك, تۇراقتىلىق». اتىراۋ وبلىستىق قازاقستان حالقى اسسامبلەياسىنىڭ XXI سەسسياسىندا ايماق باسشىسى نۇرلان نوعاەۆ وسىلاي دەدى. «ەل ومىرىندەگى اسا ماڭىزدى باعدارلامالاردى ورىنداۋعا اسسامبلەيا تولىققاندى قاتىسا الادى. مەملەكەت باسشىسىنىڭ ماقالاسىنداعى نەگىزگى مىندەتتەرگە نازار اۋدارساق, ولار قوعامنىڭ ساناسىن جاڭعىرتا وتىرىپ, ەل دامۋىن جاڭا ساپالىق دەڭگەيگە كوتەرۋدى كوزدەيدى. ۇلتىن ءسۇيىپ, ۇلت تاعدىرىن ءوز تاعدىرىمەن بايلانىستىراتىن ءار ازامات بۇل مىندەتتەردى اتقارۋعا جۇمىلا كىرىسەدى دەگەن سەنىمدەمىز. الدىمىزدا اۋقىمدى مىندەتتەر تۇر. ۇلتىمىزدىڭ XXI عاسىرداعى رۋحاني جاڭعىرۋ ستراتەگياسى اتانعان ەلباسىنىڭ باعدارلاماسىن ورىنداۋدا اسسامبلەياعا زور ءۇمىت ارتىلىپ وتىر», دەپ اتاپ ءوتتى وبلىس اكىمى.
«جاڭعىرۋدىڭ نەگىزى – تۇراقتىلىق. بىرلىك. كەلىسىم» تاقىرىبىمەن وتكەن جيىندا ەلباسىنىڭ «بولاشاققا باعدار: رۋحاني جاڭعىرۋ» ماقالاسىندا ايتىلعان مىندەتتەردى ىسكە اسىرۋعا اسسامبلەيانىڭ قاتىسۋىن ۇيىمداستىرۋ جانە قازاقستان حالقى اسسامبلەياسىنىڭ XXV سەسسياسىندا مەملەكەت باسشىسى جۇكتەگەن تاپسىرمالاردى ورىنداۋ جايى ءسوز بولدى.
ەلباسى ماقالاسىندا باياندالعان ماسەلەلەردى جۇزەگە اسىرۋ ماقساتىندا وبلىستا جۇمىس توبى قۇرىلدى. قازىر بارلىق اۋىلدار مەن اۋدانداردا تاريحتى زەرتتەۋ, وڭىردەن شىققان تانىمال, تابىستى ادامداردىڭ ءتىزىمىن جاساۋ, ولاردىڭ جەتكەن جەتىستىكتەرىن ناسيحاتتاۋ, وزگە ەلدەگى قانداستارمەن جۇيەلى بايلانىس ورناتۋ سەكىلدى جۇمىستار جاسالىپ جاتىر. سونداي-اق, وبلىس مەكتەپتەرىندە فاكۋلتاتيۆتىك كۋرس رەتىندە «ولكەتانۋ» ءپانى ەنگىزىلەدى. ايماقتىڭ مادەني ورىندارى مەن تاريحى تۋرالى كىتاپشالار شىعارىلادى. تاريحي ەسكەرتكىشتەردى جاڭعىرتىپ, قالا ينفراقۇرىلىمىن دامىتۋ باعىتىنداعى الەۋمەتتىك جوبالاردىڭ ءتىزىمىن جاساۋ, ءتۇرلى اكتسيالار مەن مۇقتاج جاندارعا الەۋمەتتىك كومەك بەرۋ, تۋريستىك كارتا جاساۋ دا جوسپاردا بار. وبلىس اكىمى نۇرلان نوعاەۆ بۇل مىندەتتى ىسكە اسىرۋدا, ازاماتتاردى تۋعان جەرىنە قامقورلىق تانىتۋعا ىنتالاندىرۋدا اسسامبلەيانىڭ ءرولى ەرەكشە دەدى.
جيىندا وبلىستاعى ەتنومادەني بىرلەستىكتەر مۇشەلەرى مەن كاسىپكەرلەر, جاۋاپتى قىزمەتكەرلەر سويلەپ, ۇسىنىس-پىكىرلەرىن ايتتى.
«تاۆروس» ارميان ەتنومادەني بىرلەستىگىنىڭ مۇشەسى گرەتا ارۋتيۋنيان ەلباسى ماقالاسىندا جاستارعا ۇلكەن مىندەت جۇكتەلگەنىنە, سونىڭ ىشىندە ۇلتتىق قۇندىلىقتاردى ساقتاپ, جانداندىرۋعا باسا نازار اۋدارىلعانىنا توقتالدى. «قامقور» باعدارلاماسى اياسىندا وبلىستىق قازاقستان حالقى اسسامبلەياسى جاستار قاناتىنىڭ مۇشەلەرى ارداگەرلەرمەن كەزدەستىك. بىزگە اسىرەسە «ميراس» تۋريستىك-ولكەتانۋ كلۋبىنىڭ نەگىزىن سالۋشىلاردىڭ ءبىرى ۆياچەسلاۆ افاناسەۆپەن تانىسۋ اسەرلى بولدى. «قامقور» اكتسياسى ارقىلى ءبىز «ميراس» كلۋبىن قايتادان جانداندىرىپ, ماتەريالدىق-تەحنيكالىق بازاسىن جاڭارتۋعا, ولكەمىزدەگى تاريحي ورىندارعا ساياحات ۇيىمداستىرىپ, اتا-بابامىزدان قالعان باي مۇرامەن تانىسۋعا جۇمىستانعىمىز كەلەدى», دەدى ول.
ال «تحونيل» كورەي ەتنومادەني بىرلەستىگىنىڭ مۇشەسى, ح.دوسمۇحامەدوۆ اتىنداعى اتىراۋ مەملەكەتتىك ۋنيۆەرسيتەتى قازاقستان حالقى اسسامبلەياسى ينستيتۋتىنىڭ جاۋاپتى حاتشىسى ۆەرا شين: «1939 جىلعى دەپورتاتسيا سالدارىنان قازاقستانعا 96 453 كورەي حالقى كۇشتەپ كوشىرىلدى. قانشاما قايعى-قاسىرەت پەن قۋعىن-سۇرگىندى باسىنان وتكەرگەن قازاق حالقى تاعدىرلاس كورەي حالقىنىڭ جان جاراسىن تەرەڭىنەن ءتۇسىنىپ, باۋىرىنا باستى. مىنە, سوناۋ زۇلمات كەزەڭدەرگە دە 80 جىل بولدى. سول ۋاقىتتان بەرى كورەيلەردەن بىرنەشە ۇرپاق تارادى, ولار وسىنشاما ىستىق ىقىلاس پەن اسا مەيىرباندىلىق تانىتقان قازاق جۇرتىنىڭ, قازاق ەلى مەن جەرىنە ادال قىزمەت ەتىپ جۇرگەن, كەز كەلگەن سالادا وزىندىك ۇلەسى بار ەل ازاماتتارى بولىپ وتىر. ولاردىڭ ۇرپاقتارى بۇگىندە قازاقستاندى ءوز وتانى سانايدى. قازاق حالقىنا دەگەن ريزاشىلىعىن ءبىلدىرۋ ماقساتىندا «تحونيل» ەتنومادەني بىرلەستىگى اتىراۋ قالاسىندا ەسكەرتكىش-مونۋمەنت قويۋدى جوسپارلاپ وتىر», دەپ اتاپ ءوتتى.
جيىندا بىرلىك پەن تۇراقتىلىقتى نىعايتۋعا, قازاقستاننىڭ الەۋمەتتىك-ەكونوميكالىق جانە قوعامدىق دامۋىنا ۇلەس قوسقان بىرقاتار ازاماتتار قازاقستان حالقى اسسامبلەياسىنىڭ جانە وبلىس اكىمىنىڭ العىس حاتتارىمەن ماراپاتتالدى.
باقىتگۇل باباش,
«ەگەمەن قازاقستان»
اتىراۋ
