كەزدەسۋ بارىسىندا ساۋدا-ەكونوميكالىق ىنتىماقتاستىقتى دامىتۋدىڭ الداعى پەرسپەكتيۆالارى, سونداي-اق قازاقستان-ۋكراينا ەكونوميكالىق ىنتىماقتاستىعى جونىندەگى مەملەكەتارالىق كوميسسيانىڭ وتكەن وتىرىسىنىڭ قورىتىندىلارى تالقىلاندى.
ايتا كەتەيىك, 2017 جىلدىڭ 14-16 ماۋسىمىندا استانادا قر پرەمەر-ءمينيسترىنىڭ ءبىرىنشى ورىنباسارى ا. مامين مەن ۋكراينا پرەمەر-ءمينيسترىنىڭ ورىنباسارى - وڭىرلىك دامۋ, قۇرىلىس جانە تۇرعىن ءۇي-كوممۋنالدىق شارۋاشىلىعى ءمينيسترى گ. زۋبكونىڭ توراعالىعىمەن ەكونوميكالىق ىنتىماقتاستىق جونىندەگى بىرلەسكەن مەملەكەتارالىق قازاقستان-ۋكراينا كوميسسياسىنىڭ XIII وتىرىسى ءوتتى.
قازاقستان مەن ۋكراينانىڭ ۇكىمەتتىك دەلەگاتسيالارى ەكى ەلدىڭ ەكونوميكا, ەنەرگەتيكا, كولىك جانە لوگيستيكا, اوك, تۋريزم, ازاماتتىق اۆياتسيا سالالارىنداعى ەكىجاقتى ساۋدا-ەكونوميكالىق جانە ينۆەستيتسيالىق سەرىكتەستىكتى ودان ءارى دامىتۋ ماسەلەلەرىن تالقىلادى.
اعىمداعى جىلدىڭ العاشقى 4 ايىندا ەلدەر اراسىنداعى ءوزارا ساۋدا كولەمى 2016 جىلدىڭ ۇقساس كەزەڭىمەن سالىستىرعاندا 37,3%-عا ءوستى جانە 486,3 ملن دوللاردى قۇرادى. وسىعان بايلانىستى, قر پرەمەر-ءمينيسترىنىڭ ءبىرىنشى ورىنباسارى ا. مامين ەكونوميكالىق ىنتىماقتاستىقتى جانداندىرۋ قاجەتتىگىن باسا ايتتى. ايتار بولساق, بۇگىندە قازاقستاندا ۋكراينانىڭ قاتىسۋىمەن 661 كاسىپورىن جۇمىس ىستەيدى.
«ساۋدا-ەكونوميكالىق ىنتىماقتاستىقتى ودان ءارى دامىتۋ ءۇشىن ەكسپورتتىق-يمپورتتىق وپەراتسيالاردى ۇلعايتىپ, جەتكىزىلەتىن تاۋارلار مەن قىزمەتتەردىڭ نومەنكلاتۋراسىن كەڭەيتۋ كەرەك, سونداي-اق قازاقستان مەن ۋكراينانىڭ كاسىپكەرلەرى اراسىندا تىكەلەي بايلانىستى ورناتۋ قاجەت», - دەدى قر پرەمەر-ءمينيسترىنىڭ ءبىرىنشى ورىنباسارى.
قازاقستان مەن ۋكراينا اراسىنداعى جۇك اعىنىنىڭ ارتۋى ترانزيت پەن لوگيستيكا سالاسىنداعى ىنتىماقتاستىقتىڭ تيىمدىلىگىن ايعاقتايدى. 2017 جىلعى قاڭتار-اقپان ايلارىندا قازاقستان مەن ۋكراينا اراسىنداعى ەكسپورتتىق جانە يمپورتتىق جۇك كولەمى 186,6 مىڭ توننانى قۇرادى, بۇل 2016 جىلعى دەڭگەيمەن سالىستىرعاندا 15%-عا جوعارى. ترانسكاسپي حالىقارالىق كولىك باعدارى ءدالىزىن دامىتۋ جۇمىسى جالعاستىرىلىپ جاتىر.
ەكونوميكالىق ىنتىماقتاستىق جونىندەگى مەملەكەتارالىق كوميسسيا جۇمىسىنىڭ قورىتىندىسى بويىنشا ا. مامين مەن گ. زۋبكو ءتيىستى حاتتاماعا قول قويدى.
