– فازىلبەك اعا, اڭگىمەمىزدى بالالار فۋتبول كلۋبىن قۇرۋىڭىزدان باستايىقشى. فۋتبول سالاسىندا كاسىپكەرلىكپەن اينالىسۋىڭىزعا نە تۇرتكى بولدى؟
– اۋلا كومانداسىن قۇرۋ تۋرالى وي بىردەن كەلگەن جوق. ەكى جىل جاپونيادا تۇرىپ, ەلگە كەلگەن ساتتە ءبىراز قيىنشىلىقتار بولدى. بىراق, سوعان قاراماستان ءوز بيزنەسىمدى باستاۋعا تىرىستىم. كەشكىسىن قاتتى شارشايسىڭ. دەنەمدەگى كۇيزەلىستەن ارىلۋ ءۇشىن سپورتپەن جۇيەلى تۇردە شۇعىلدانۋ كەرەكتىگىن ءتۇسىندىم. كۇندە, كۇنارا اۋلاعا شىعىپ دوپ تەبۋدى ادەتكە اينالدىردىم. وسىلايشا, اۋلاداعى بالالارمەن ءتىل تابىسىپ, دوس بولىپ كەتكەنىمدى ءوزىم دە بايقاماي قالدىم. جاز مەزگىلى تاياپ قالعان شاق, بالالار اراسىندا «جازدى قالاي, قايدا وتكىزەمىز؟»,- دەگەن سۇراق پايدا بولا باستادى. ال مەنىڭ بالالاردان, بالالاردىڭ مەنەن اجىراعىسى كەلمەيدى. عالامتوردى اقتارىپ, اۋلا كلۋبى تۋرالى مالىمەتكە تاپ بولدىم. ءسويتىپ, اۋلاداعى «دوستارىممەن» كوماندا قۇردىم. العاشىندا كلۋبتىڭ اتىن تۇرعىلىقتى جەرىمىزگە بايلانىستى «اقمەشىت» دەپ قويعان بولاتىنمىن. كەيىننەن «ارلاندارعا» اۋىستىق. مىنە, اۋلا كومانداسى وسىلاي قۇرىلدى.
– اعا, جاقىن ارادا پورتۋگاليانىڭ براگا قالاسىندا وتەتىن حالىقارالىق «BragaCup» تۋرنيرىنە قاتىسقالى جاتىر ەكەنسىزدەر. وسى تۋرنيرگە شاقىرتۋ قالاي ءتۇستى؟
– كلۋب قۇرىپ, العا ماقسات قويعان سوڭ شەتەلدىك تۋرنيرلەرگە قاتىسقىمىز كەلدى. وسى ويىمدى قاعازعا ءتۇسىرىپ, UEFA-عا اشىق حات جازدىم. ولار حاتىمدى الىپ, ماعان پورتۋگاليادا وتەتىن جاسوسپىرىمدەرگە ارنالعان «Braga Cup» جارىسىنا قاتىسۋىمىزدى ۇسىندى. ول ءتۋرنيردىڭ ۇيىمداستىرۋشىلارىنا دا حات جازىپ, جاعدايىمىزدى ءتۇسىندىردىم. ناۋرىز ايىندا جارىستى ۇيىمداستىرۋشىلار براگادان استاناعا ارنايى وكىلدەر كەلىپ, ەكىجاقتى دوستىق-ارىپتەستىك تۋرالى مەموراندۋمعا قول قويدىق. ءسويتىپ, ولار ءبىزدى الداعى تۋرنيرگە ارىپتەستەرى رەتىندە شاقىردى.
– شەتەلدە UEFA اياسىندا وتەتىن تۋرنيرلەردىڭ باسىم كوپشىلىگى اقىلى ەكەنىن بىلەمىز. ياعني, ءار قاتىسۋشى بەلگىلى ءبىر مولشەردە جارنا تولەۋى كەرەك. قاتەلەسپەسەم, بۇل تۋرنيردە وسى اقىلى ساناتقا جاتادى. قارجى جاعىن قالاي شەشتىڭىزدەر؟
– دۇرىس ايتاسىز. ەۋروپاداعى كوپ تۋرنيرلەر اقىلى تۇردە وتەدى. بىز قاتىسقالى جاتقان تۋرنير دە اقىلى. ەرەجە بويىنشا ءار بالاعا 130 ەۋرو جارنا تولەۋ كەرەك. بۇل بالالاردىڭ بارىپ-قايتۋ بيلەتىنەن, ءجۇرىپ-تۇرۋ جانە ىشىپ-جەمىنەن بولەك اقشا. بىراق ءبىز «Braga Cup» تۋرنيرىنە تەگىن قاتىسۋعا مۇمكىندىك الدىق. تەك, بارىپ-قايتۋ بيلەتى ءوز ەسەبىمىزدەن. ال ءبىزدى پورتۋ قالاسىنان براگاعا جەتكىزۋ, جاتىن ورىن, قالا بويىنشا مادەني-تانىمدىق ەكسكۋرسيانى جارىس ۇيىمداستىرۋشىلارى ءوز مويىنىنا الىپ وتىر. بۇل ۇيىمداستىرۋشىلارىنىڭ بىزگە جاساپ وتىرعان جەڭىلدىگى.
– سىزدەرمەن ارىپتەستىك بايلانىس ورناتقانداردىڭ قاتارىندا فرانتسيانىڭ «Paris Kazakspor» كلۋبى دا بار ەكەن. ول جاقپەن بايلانىستارىڭىز قالاي؟
– «Paris Kazakspor» كلۋبىمەن دە بيىل مەموراندۋمعا قول قويعان بولاتىنبىز. اتالعان كلۋبپەن بايلانىس ورناتۋ ءبىز ءۇشىن وتە ماڭىزدى. سەبەبى, 1986 جىلى قۇرىلىپ, بۇگىندە فرانتسيا ليگاسىندا وينايتىن, «پاريج كۋبوگىن» بىرنەشە مارتە جەڭىپ العان تاريحى تەرەڭ كوماندامەن ارىستەستىك قاتىناس ورناتۋ الداعى ۋاقىتتا بىزگە زور پايداسىن بەرەدى دەپ ويلايمىن. سونىمەن قاتار, قازىر «اياكس» (نيدەرلاند), «بارسەلونا» (يسپانيا), «بەشيكتاش» جانە «گالاتاساراي» (تۇركيا) سىندى كلۋبتاردىڭ جاستار قۇراماسىمەن كەلىسسوز جۇرگىزىپ جاتىرمىز.
– سىزدەرگە مەملەكەت تاراپىنان قانداي دا ءبىر قولداۋ كورسەتىلىپ جاتىر ما؟ قازاقستان فۋتبول فەدەراتسياسى تاراپىنان شە؟
– وكىنىشكە قاراي, قازىر مەملەكەت تاراپىنان دا, فەدەراتسيا تاراپىنان دا ەشقانداي قولعابىس بولماي تۇر. دەگەنمەن, الداعى ۋاقىتتا قولداۋ بولادى دەگەن ۇمىتتەمىن.
– كلۋبىڭىز تەك وسى جارىسقا قاتىسۋمەن شەكتەلىپ قالمايتىنى انىق. بولاشاقتا باسقا دا حالىقارالىق تۋرنيرلەرگە قاتىسۋلارىڭىز مۇمكىن. دەمەۋشىسىز قيىن بولماي ما؟
– ارينە, قازىرگى تاڭدا دەمەۋشىسىز قيىن. ءوزىم كومەك كورسەتىپ قالادى-اۋ دەگەن ەسىكتەردىڭ ءبارىن قاعىپ كوردىم. ەش ناتيجە جوق. ەگەر, مۇمكىندىك بولسا دەمەۋشى ەمەس, شەت ەلدىڭ بىرىنەن ينۆەستور ىزدەگەن دۇرىس سياقتى. سەبەبى, دەمەۋشى كلۋبقا قۇيعان قارجىسىنىڭ قايتاتىنىنا سەنىمدى بولعانىن قالايدى عوي.
– كومانداڭىزدىڭ ءبىر ەرەكشەلىگى, جاتتىعۋلارىڭىز اعىلشىن تىلىندە وتەدى ەكەن. بۇل يدەيا قايدان پايدا بولدى؟
– ءبىز بالالارعا فۋتبولدى اعىلشىن ءتىلى ارقىلى ۇيرەتەمىز. سەبەبى, فۋتبولدىڭ وتانى مەن ءتىلى اعىلشىنداردان باستاۋ الادى. مىسالى, مەن «مانچەستەر سيتي» فۋتبول كلۋبىنىڭ جاتتىقتىرۋ مەتوديكاسىن دۇرىس كورەمىن جانە سول بويىنشا جۇمىس ىستەيمىز. ءبىر ايتا كەتەرلىگى, بالالاردى اعىلشىن ءتىلىنىڭ گرامماتيكاسىنا, جازۋىنا ەمەس, تەك اعىلشىنشا سويلەۋ تىلىنە باۋليمىز. تاربيەلەپ جاتقان شاكىرتتەرىم بولاشاقتا ەۋروپالىق كلۋبتاردىڭ بايقاۋلارىن بارادى. سول كەزدە ءتىل جاعىنان قيىندىق كورمەيدى.
– فازىلبەك اعا, قازىرگى ۋاقىتتا جاتتىعۋلارىڭىزدى مەكتەپ الاڭىندا وتكىزىپ جۇرسىزدەر. بۇل ازىرشە ۋاقىتشا قۇبىلىس ەكەنى انىق. الداعى ۋاقىتتا ءوز الاڭدارىڭىزدى سالۋ جوسپاردا بار ما؟
– ارينە, جوسپاردا بار. ونسىز بولمايدى. ۇلكەن بولماسا دا شاعىن الاڭىمىزدىڭ بولعانىن قالايمىز. قازىر الاڭ سالىپ بەرۋگە نيەتتى ينۆەستور ىزدەۋ ۇستىندەمىن. سونداي-اق, وسى ماقساتتا ارنايى جوبا دايىنداپ جاتىرمىن. بۇيىرسا, جوبامدى UEFA مەن شەتەلدىك كومپانيالاردىڭ الدىندا قورعاپ, كەلىسسوز جۇرگىزىپ كورەمىن.
اڭگىمەلەسكەن شامكەن بايىربەك,
ل. گۋميلەۆ اتىنداعى ەۇۋ-ءدىڭ ستۋدەنتى
