«شىمكەنت-كاشەمير» جشس – ءجۇن ءتۇتىپ, ودان يىرىلگەن ءجىپتى شىعارىپ, سىرىلىپ تىگىلگەن كورپە جاسايتىن زاۋىت. بۇگىنگى كۇنى كاسىپورىننىڭ ءبىرىنشى كەزەگى – ءجۇندى جۋىپ, تارايتىندى العاشقى وڭدەۋ تسەحى تولىق پايدالانۋعا بەرىلدى. تسەح ەڭ الدىمەن ءوندىرىستى ءوز شيكىزاتىمىزبەن قامتاماسىز ەتۋ ءۇشىن قۇرىلعان. ارتىلعانى قىتايعا ەكسپورتتالادى. جىلىنا 2000 تونناعا دەيىن جۋىلعان جانە تارالعان ءجۇن شىعارا الادى. كاسىپورىندا جەرگىلىكتى شيكىزات پايدالانىلادى.
«كەڭەس ۋاقىتىنداعى اتاعى دۇركىرەگەن ءجۇن وڭدەۋشى ءىرى زاۋىتتار قازىر توقتاپ قالعان. وكىنىشكە وراي, ءوندىرىستىڭ بۇل ءتۇرى تومەن تابىستى سالاعا جاتادى جانە ۇلكەن سالىمدى تالاپ ەتەدى. بىراق اەا اۋماعىندا ورنالاسقاننىڭ ەسەبىنەن جانە جەكەلەي جەڭىلدىك پەن قولداۋ بولعاندىقتان, ءبىز جۇمىس ىستەپ دامىپ كەلەمىز»,-دەيدى شاعانبەك قانجارباي ۇلى.
وسى جىلدىڭ قازان ايىندا زاۋىت اينالىم قاراجاتىن تولىقتىرۋعا 50,0 ملن تەڭگە كولەمىندە نەسيە الدى. كاسىپورىن ءۇشىن پايىز مولشەرلەمەسى 17% قۇرادى, ونىڭ 7% «دامۋ» قورى سۋبسيديالايدى, قالعانىن زاۋىتتىڭ ءوزى تولەيدى.
قازىرگى تاڭدا كاسىپورىننىڭ ەكىنشى كەزەڭىن جۇرگىزۋ بويىنشا جۇمىستار اتقارىلىپ جاتىر. تارالعان ءجۇن تىزبەگىن وندىرەتىن تسەح دايىن تۇر. قۇرىلعىلاردىڭ جارتىسى ساتىپ الىنعان جانە ورناتىلعان, سىنامالار جۇرگىزىلۋدە. كەلەسى جىلى مەملەكەتتىك قابىلداۋ اكتىسىنەن كەيىن, ونىڭ ىسكە قوسىلۋى بەلگىلەنۋدە. زاۋىت 2011 جىلدىڭ جەلتوقسانىندا اشىلدى. سوڭعى ەكى جىل ىشىندە زاۋىتقا 160 ميلليون تەڭگەدەن كوپ جەكە قاراجات سالىندى. ينۆەستيتسيانىڭ جالپى كولەمى – 560 ملن تەڭگە.
