ەلباسى دوڭگەلەك ۇستەل جيىنىنا قاتىسۋشىلارعا 10-شى استانا ەكونوميكالىق فورۋمىنا كەلگەندەرى ءۇشىن ريزاشىلىق ءبىلدىردى.
– ساراپشىلارمەن جۇزدەسىپ, اڭگىمەلەسۋ ءاردايىم اسا ماڭىزدى ءارى قىزىقتى. اسىرەسە, قازىر الەمدە ەلەۋلى وزگەرىستەر بولىپ جاتقاندا مۇنىڭ ماڭىزى زور, – دەدى قازاقستان پرەزيدەنتى.
نۇرسۇلتان نازارباەۆ جاھاندىق تەحنولوگيالىق دامۋ زور قارقىن الىپ وتىرعانىنا توقتالىپ, حالىقارالىق «ەكسپو-2017» مامانداندىرىلعان كورمەسىنىڭ تاقىرىبى وزەكتى ەكەنىن اتاپ ءوتتى.
– كورمەنىڭ ارقاسىندا قازاقستان جاڭا تەحنولوگيالاردىڭ دامۋى تۇرعىسىنان الەم نازارىن وزىنە اۋدارىپ وتىر. سوعان قاراپ قورشاعان ورتامىز قالايشا تۇبەگەيلى وزگەرىپ وتىرعانىن كورە الامىز. ەلەكتروموبيلدەردى, وزدىگىنەن جۇرەتىن كولىكتى, نانوتەحنولوگيالاردى, سونداي-اق جاڭا ەنەرگيا تۇرلەرىن ءبىز فۋتۋريستىك دۇنيەلەر دەپ سانايتىنبىز. قازىر سونىڭ ءبارى شىندىققا اينالۋدا, – دەدى مەملەكەت باسشىسى.
نۇرسۇلتان نازارباەۆ ىلگەرىلەۋگە ىقپال ەتەتىن كۇن تارتىبىندەگى حالىقارالىق وزەكتى ماسەلەلەرگە توقتالىپ, جاھاندىق پروبلەمالاردى شەشۋ ءۇشىن كۇش-جىگەردى جۇمىلدىرۋ قاجەتتىگىن اتاپ ءوتتى.
– اقش-تىڭ پاريج كەلىسىمىنەن شىعاتىنى تۋرالى مالىمدەمە, كاتاردىڭ توڭىرەگىندەگى جاعداي ورنىقتى دامۋدى كۇردەلەندىرە ءتۇستى. ءتۇرلى ەلدەردەگى ەكولوگيالىق پروبلەمالار, جاھاندانۋعا قارسىلىق ۇدەرىسى, كوشى-قون اعىنى مەن پاتەرناليزم ساۋدا جاساۋعا, ءوزارا قارىم-قاتىناسقا جانە ينتەگراتسياعا كەدەرگى كەلتىرۋدە, – دەدى مەملەكەت باسشىسى.
كەزدەسۋ بارىسىندا ا.كۆاسنەۆسكي, س.مەسيچ, س.تيماشەۆ, ر.چۋنگ, د.فرەنكەل, ا.سپيتسىن, د.داوكۋي لي, ي.ساكونگ, پ.تيچانسكي, د.پەركينس, د.گارولد, ن.تالەب, ح.بيۋركنەر بايانداما جاسادى.
سوڭىندا قازاقستان پرەزيدەنتى دوڭگەلەك ۇستەل جيىنىنا قاتىسۋشىلارعا اڭگىمەنىڭ مازمۇندى بولعانى ءۇشىن العىس ايتىپ, وزەكتى ماسەلەلەردى استانا ەكونوميكالىق فورۋمى اياسىندا تالقىلاۋدى ۇسىندى.
