كانادالىق Cirque du Soleil ترۋپپاسى تاعى دا استانادا. بۇگىن كورمە الاڭىندا ەكسپو-2017 كورمەسىنىڭ قوناقتارى ءۇشىن ارنايى ازىرلەنگەن «Reflekt» شوۋ-باعدارلاماسىنىڭ تۇساۋكەسەرى وتەدى. بەيكۇنا جانۋارلاردى قيناماي-اق قىزىققا تويمايتىن بۇقارانى تاڭقالدىرۋعا بولاتىنىن دالەلدەپ جۇرگەنى ءۇشىن كوپتىڭ قوشەمەتىنە يە ەرەكشە ۇجىم قاتارىندا ەڭ تالانتتى, تاڭداۋلى ماماندار شوعىرلانعان. ءتۇرلى جانر ارالاسقان ميۋزيكل قويىلىمىندا تسيرك ارتىستەرىنەن بولەك مۋزىكانتتار مەن انشىلەر دە ونەر كورسەتەتىن بولادى.
«Reflekt» Cirque du Soleil باس ديرەكتورى بەرنارد پويريەنىڭ سوزىنشە, شوۋ جۇمىسىنا 160-قا جۋىق تسيرك قىزمەتكەرلەرى اتسالىسقان. «Reflekt» شوۋى ارقىلى قازاق ەلىنىڭ باي مادەنيەتىن بارشاعا تانىتقىمىز كەلەدى دەگەن ول شوۋ-باعدارلامانىڭ ەرەكشەلىگىنە توقتالدى.
– جوبادا Cirque du Soleil تاريحىندا ەش جەردە بۇرىن-سوڭدى قويىلماعان جاڭا تريۋكتار كورسەتىلەدى. تەك وسى ءۇشىن عانا مىڭداعان كورەرمەن كەلۋى ءتيىس دەپ ويلايمىز. قازاق ەلىن قوناقجايلىعى ءۇشىن ۇناتامىن. سىزدەردىڭ ەنەرگەتيكالارىڭىزدى سەزىنۋ ءبىزدىڭ ارتىستەرىمىز ءۇشىن باقىت, – دەيدى باس ديرەكتور بەرنارد پويريە.
باتىستىق ۇيلەسىممەن ارلەنگەن حالىق ءومىرىنىڭ ءار كەزەڭدەگى تىنىس-تىرشىلىگى بەينەلەنگەن ۇلتتىق مۋزىكا مازمۇنىنان ليريكالىق, ەپيكالىق, قاھارماندىق لەپ ەسەدى. سيۋجەت مازمۇنىنا توقتالعان شوۋدىڭ اتقارۋشى ديرەكتورى دانيەل فورتە وسى تاراپتاعى ىزدەنىستەرى تۋرالى ايتىپ بەردى.
– توعىز اي تولىعىمەن شوۋدىڭ دايىندىعىنا كەتتى. وسى ۋاقىت ارالىعىندا كانادالىق كومپوزيتور سايمون كارپەنتيە قازاق ۇلتتىق مۋزىكاسىنىڭ ەلەمەنتتەرىن پايدالانا وتىرىپ, دىبىستىق كوركەم بەينەگە نەگىزدەلگەن ويىن-ساۋىق مۋزىكاسىن جازدى. ال كوستيۋم جونىنە كەلەتىن بولساق, تسيرك ديۋ سولەي قازاق حالقىنىڭ ۇلتتىق ناقىشىنداعى كوستيۋمدەردى ارنايى تىكتىردى, – دەيدى دانيەل فورتە.
شوۋ بارىسىندا كورىنىس تاپقان ساق تايپاسىنىڭ جاس كوسەمى التىن ادام, سەمانتيكالىق جانە تاريحي ءتۇپ-تامىرى تەرەڭ ماڭىزدى تيپولوگيالىق وبراز بولىپ سانالاتىن قاناتتى تۇلپارلار ۇلى دالا كوشپەندىلەرىنىڭ رۋحىن اسقاقتاتا تۇسەتىنى ءسوزسىز.
كانادالىق تانىمال حورەوگراف ليديا بوۋشەر تەاترلاندىرىلعان تسيرك باعدارلاماسىنىڭ ەڭ قىزىقتى اكروباتيكالىق نومەرلەرىن ازىرلەگەن. اۋەدە اينالىپ تۇرعان دوڭگەلەكتىڭ سىرتىن اينالا زىر جۇگىرگەن اكروباتتار ەكۆيليبريستيكا شوۋىنىڭ ءتۇر-ءتۇرىن كورسەتسە, باشپايلارىمەن ساداق تارتاتىن قوس ءبيشى قىز ەپتىلىگىمەن ءتانتى ەتەدى.
جالپى, تسيرك جاز بويى استانادا 71 قويىلىم ساحنالاۋدى جوسپارلاپ وتىر. Cirque du Soleil كانادانىڭ مونرەال قالاسىندا 1984 جىلى قۇرىلعان. ەرەكشە ديزاينى مەن ءبيى ارقىلى تالايدى تاڭقالدىرىپ كەلە جاتقان تسيرك قازىرگى تاڭدا ويىن-ساۋىق يندۋسترياسىنداعى الىپ كومپانيالاردىڭ بىرىنە اينالعان. تسيرك ۇجىمىندا الەمنىڭ 50 ەلىنەن جينالعان 4000-عا جۋىق ادام ەڭبەك ەتەدى.
ايا ءومىرتاي,
"ەگەمەن قازاقستان"
