وسى نىساندى تۇرعىزۋ ءۇشىن بيۋدجەتەن 214,3 ميلليون تەنگە بولىنگەن ەكەن. ايتسە دە بيۋدجەت قاراجاتىن ءتيىمسىز پايدالانۋ سالدارىنان ينۆەستيتسيالىق جوبانىڭ جولى كەسىلگەن. ارينە بۇل ارادا «اقتوبە الەۋمەتتىك-كاسىپكەرلىك كورپوراتسياسىنىڭ» باسى-قاسىندا جۇرگەندەر بارلىق ىس-قيمىلدى ءبىرىنشى كەزەكتە زاۋىت قۇرىلىسىن جۇرگىزۋگە جۇمىلدىرۋى كەرەك ەدى. الايدا ولار وزدەرىنىڭ تىكەلەي اتقارۋعا ءتيىستى مىندەتتەرىنە جاۋاپسىز, سالدىر-سالاق قاراعان. ءسويتىپ نىساننىڭ ىرگەتاسىن كوتەرۋدىڭ ورنىنا 143,9 ميلليون تەنگەگە ابدەن ەسكەرىپ, قاراۋسىز قالعان عيماراتتى ساتىپ الىپتى.
سونىڭ سالدارىنان زاۋىت قۇرىلىسى توقتاپ قالدى. مەملەكەت اكتيۆتەرى تيىمدى تۇردە پايدالانىلماۋىنىڭ كەسىرىنەن اينەك شىعارۋ مەن ەنەرگيا ساقتاعىش پاكەتتەردى وندىرىسكە قويۋ ءىسى قۇردىمعا كەتىپ تىندى. ايتىپ ايتپاي نە كەرەك, ايتەۋىر كورپوراتسيا جەتەكشىلەرى 73 ميلليون تەنگەنى جارعىلىق كاپيتالداعى ۇلەسكە سالۋمەن عانا شەكتەلگەن. بۇعان دا تاۋبە دەرسىز. تۇتاستاي العاندا «اقتوبە الەۋمەتتىك-كاسىپكەرلىك كورپوراتسياسىنا» قاراستى «ازيا اگرو حولدينگى», «بازارلاردى باسقارۋ», «باتىس اگرو 2008», «تابىس قالا» ەنشىلەس كاسىپورىندارىنا ۇستەمە اۋديتتىك باقىلاۋلار جۇرگىزۋ ناتيجەسىندە 648,8 ميلليون تەنگەنىڭ اكتيۆتەرى مەن بيۋدجەت قاراجاتتارى تيىمسىز پايدالانىلعانى بەلگىلى بولدى. بۇل كورىنىستىڭ ءوزى وڭىردەگى ينۆەستيتسيالىق جوبالاردى ىسكە اسىرۋعا اجەپتاۋىر نۇقسان كەلتىردى.
- ءسويتىپ ايماقتاعى الەۋمەتتىك-ەكونوميكالىق ماڭىزى وتە جوعارى نىسانداردىڭ ءبىرى بەلگىلەنگەن ۋاقىتتا پايدالانۋعا بەرىلمەي قالدى. ءمۇنىڭ وزى وڭىردەگى اينەك ءوندىرىسى نارىعىن جولعا قويۋ جانە قوسىمشا جۇمىس ورىندارىن قۇرۋ جونىندەگى ءىس-قيمىل باعدارلاماسىنىڭ ويداعىداي ورىندالۋىنا كەرى اسەرىن تيگىزدى, - دەدى «Egemen.kz» تىلشىسىنە اقتوبە وبلىسى ويىنشا تەكسەرۋ كوميسسياسىنىڭ توراعاسى ساعات ەڭسەگەن ۇلى.
تەمىر قۇسايىن
