اسحات رايقۇل,
«ەگەمەن قازاقستان»
«مونۋمەنت تولىق كۇردەلى جوندەۋدەن ءوتتى. ارلەپ, بەزەندىرۋ جۇمىستارىنا قازاقستاندىق جاس ديزاينەرلەردى تارتتىق. كوپشىلىكتىڭ كۇش سالۋىنىڭ ارقاسىندا بۇگىنگى جەتىستىككە جەتىپ وتىرمىز. استانا قالاسى اكىمىنىڭ قاتىسۋىمەن بىرنەشە رەت كەڭەس جيىندار ءوتتى. بارلىق ماسەلەلەرگە ءجىتى قاراۋعا تىرىستىق», دەيدى «استانا-بايتەرەك» جشس ديرەكتورى مۇرات ساپارعاليەۆ.
جوندەۋ جۇمىستارى بارىسىندا ءمارمار پليتكالار مەن ساتىلار اۋىستىرىلعان, نىساننىڭ مەتالل قۇرىلعىلارى كورروزياعا قارسى جابىنمەن وڭدەلىپ, بويالعان. سانيتارلىق توراپتاردىڭ جابدىقتارى مەن ۆيتراجدار جاڭاسىنا اۋىستىرىلىپتى. جاڭارتىلعان ديزاين بويىنشا مۇنارانىڭ ىشكى جاعىن ارلەۋ جۇمىستارى كوپقىرلى ستيلدە جۇرگىزىلدى. تاعى ءبىر جاڭالىق – بولەك LED-ەكرانى بار زاماناۋي ونەر گالەرەياسى اشىلعان. سونىمەن قاتار, مونۋمەنتتىڭ فويەسىنە گاباريتتى يىلگىش LED-ەكران قويىلىپتى. «بايتەرەكتىڭ» توبەسىندەگى كوكتە سامعاپ جۇرگەن سامۇرىق قۇس تۇرىندەگى جاڭا اسپالى شام دا كەلۋشىلەردى بەيجاي قالدىرماسى انىق.
م.ساپارعاليەۆتىڭ ايتۋىنشا, نەگىزگى شارۋا استانا قالاسى اكىمدىگى تارتقان دەمەۋشىلەردىڭ كومەگىمەن بىتكەن. قازىرگى تاڭدا مۇندا ەلۋگە جۋىق قىزمەتكەر جۇمىس ىستەيدى. «بايتەرەكتى» وتكەن جىلى 500 مىڭنان استام ادام تاماشالاعان ەكەن.
استانا اكىمدىگى ەكسپو-2017 كورمەسى كەزىندە كەلۋشىلەرمەن جۇمىس جاساۋ ءۇشىن ەرىكتىلەردى تارتپاق. كەلۋشىلەرگە قولايلى جاعداي جاساۋ ماقساتىندا بيلەت ساتىلاتىن تەرمينالدار ورناتىلعان. دەگەنمەن, جوندەۋ جۇمىستارىنان كەيىن بيلەت باعاسى قىمباتتاعانى بايقالادى. بۇرىن ۇلكەن كىسىلەر ءۇشىن – 500 تەڭگە, بالالار ءۇشىن 250 تەڭگە بولسا, قازىرگى ۋاقىتتا ۇلكەندەرگە – 700, بالالارعا 300 تەڭگە كولەمىندە. ايتپاقشى, حالىقتىڭ جەكەلەگەن توپتارىنا جەڭىلدىكتەر قاراستىرىلعان.
