مەملەكەتتىك حاتشى الدىمەن قازاق پەن پولياك ۇلتتارى اراسىنداعى دوستىقتىڭ تامىرى تەرەڭدە جاتقانىن اتاپ ءوتتى.
جالپى, پولياكتاردىڭ ۇلتىمىزعا دەگەن قۇرمەتى مەن ءىلتيپاتى ەرەكشە ەكەنى بەلگىلى. ەڭ العاش ەۋروپالىقتارعا ۇلى دالامىز تۋرالى سىر شەرتكەن پولشا مونارحى بەنەديكت بولسا, الەم ادەبيەتىندە قازاقتار جايلى تۇڭعىش پوەما جازعان دا پولياك پەرزەنتى, ايگىلى رومانتيك اقىن گۋستاۆ زەلينسكي بولاتىن. بەرتىندە حالقىمىزدىڭ مىڭ كۇيىن نوتاعا ءتۇسىرىپ, رۋحاني قازىنامىزعا ولشەۋسىز ۇلەس قوسقان الەكساندر زاتاەۆيچ تە پولياك ەكەنىن كوزىقاراقتى قاۋىم جاقسى بىلەدى. مىنە, ەكى ەل اراسىندا بايىرعىدان قالىپتاسقان دوستىق راۋىشتەگى ءداستۇر بۇگىنگە دەيىن جالعاسىن تاۋىپ وتىر.
– ءبىز پولشانى قارقىندى دامىپ كەلە جاتقان مەملەكەت رەتىندە جاقسى بىلەمىز. ەلدەرىڭىزدە ەكونوميكا سالاسىنا, سونىڭ ىشىندە ورتا جانە شاعىن كاسىپكەرلىكتى دامىتۋعا قولايلى جاعداي جاسالعانىن بىلتىرعى ساپارىمىزدا انىق بايقادىق. وتكەن جىلى تامىز ايىندا قازاقستان پرەزيدەنتى نۇرسۇلتان نازارباەۆ پولشاعا رەسمي ساپارمەن بارعانى ءمالىم. ساپار بارىسىندا ەكىجاقتى بايلانىستى نىعايتاتىن كوپتەگەن, كەلىسسوزدەر جۇرگىزىلىپ كەلىسىمدەر جاسالدى. ال بيىلعى قىركۇيەك ايىندا پولشا رەسپۋبليكاسىنىڭ پرەزيدەنتى اندجەي دۋدانىڭ ەلىمىزگە ساپارى كۇتىلىپ وتىر, – دەدى گۇلشارا ابدىقالىقوۆا.
ونىڭ ايتۋىنشا, بۇگىندە قازاقستاندا پولياك ەتنوسىنىڭ 32 مىڭنان استام وكىلى تۇرادى. ەكىجاقتى قارىم-قاتىناستىڭ اۋقىمى مادەنيەت پەن گۋمانيتارلىق سالادا دا كەڭەيىپ كەلەدى. قازىرگى تاڭدا ەلىمىزدىڭ 700-دەن استام جاسى پولشانىڭ ۋنيۆەرسيتەتتەرى مەن كوللەدجدەرىندە ءبىلىم الىپ جاتىر. «جاقىندا استانا مەن ۆارشاۆا اراسىنا ۇشاتىن تىكەلەي رەيس اشىلدى. ورتالىق ازيا مەن پولشانى بىرىكتىرەتىن رەيستىڭ ارقاسىندا ەكى ەلدىڭ بايلانىسى ارتىپ, تۋريزم سالاسى داميتىنى انىق», دەدى مەملەكەتتىك حاتشى.
سونىمەن بىرگە, ول قازاقستان مەن ەۋروپالىق وداق اراسىنداعى سەرىكتەستىك پەن ىنتىماقتاستىقتى كەڭەيتۋ تۋرالى كەلىسىمگە پولشا پارلامەنتى العاشقىلاردىڭ ءبىرى بولىپ ءۇن قوسىپ, كەلىسىمدى راتيفيكاتسيالاعانىنا العىس ءبىلدىردى.
ءوز كەزەگىندە ءسوز العان پولشا پارلامەنتى سەناتى توراعاسىنىڭ ورىنباسارى ماريا كوتس جىلى قابىلداۋعا ريزاشىلىعىن ءبىلدىردى. ونىڭ ايتۋىنشا, تاعدىر تالايىمەن قازاقستانعا كوشىپ كەلگەن تالاي ەتنوس وكىلى وسىندا بەيبىت جاعدايدا ءومىر ءسۇرىپ جاتىر. سونىڭ ىشىندە پولياكتارعا دا سالت-ءداستۇرىن ساقتاپ, تاريحى مەن مادەنيەتىن دامىتۋعا مۇمكىندىك بەرىلگەن. بۇل قازاقستاننىڭ بەيبىتشىلىك پەن تۇراقتىلىقتى ساقتاي وتىرىپ وركەندەپ كەلە جاتقان ەل ەكەنىن كورسەتەدى.
سونداي-اق, ول قازاق-پولياك قارىم-قاتىناستارىنىڭ قازىرگى احۋالى مەن ساياسي-ەكونوميكالىق ىنتىماقتاستىقتى نىعايتۋ ماسەلەسىن قوزعادى.
كەزدەسۋ سوڭىندا مەملەكەتتىك حاتشى گۇلشارا ابدىقالىقوۆا پولشانى 2018-2019 جىلدارى بۇۇ قاۋىپسىزدىك كەڭەسىنىڭ تۇراقتى ەمەس مۇشەلىگىنە سايلانۋىمەن قۇتتىقتادى.
قىمبات توقتامۇرات,
«ەگەمەن قازاقستان»
