«نۇر وتان» پارتياسى ارقىلى تۇرعىندارعا ءمامس جۇيەسىن ەنگىزۋ بويىنشا ءتۇسىندىرۋ جۇمىستارىن وتكىزۋ, حالىقتىڭ قۇقىقتىق, اقپاراتتىق ساۋاتتىلىعىن ارتتىرۋ, سونداي-اق الەۋمەتتىك قاراما-قايشىلىقتاردى شەشۋ, ونىڭ الدىن الۋ ماقساتىندا ۇيىمداستىرىلعان شارادا ءماجىلىس دەپۋتاتى زاۋرەش امانجولوۆا, دەنساۋلىق ساقتاۋ ۆيتسە-ءمينيسترى ءلاززات اقتاەۆا, ەڭبەك جانە حالىقتى الەۋمەتتىك قورعاۋ مينيسترلىگىنىڭ, «اتامەكەن» ۇلتتىق كاسىپكەرلەر پالاتاسىنىڭ وكىلدەرى باس قوستى. القالى ءماجىلىس بەينەكونفەرەنتسيا پىشىنىندە ءوتتى. وعان ەلىمىزدىڭ 16 ءوڭىرىن ەسەپكە العاندا 200-دەن استام قاتىستى.
كەزدەسۋ بارىسىندا الەۋمەتتىك مەديتسينالىق ساقتاندىرۋ قورى جارناسىن تولەۋدەن ازاماتتاردىڭ 15 ساناتى, ياعني حالىقتىڭ الەۋمەتتىك از قامتىلعان توبى بوساتىلاتىنى ايتىلدى. ولاردىڭ قاتارىنا بالالار, بۇرىن «باتىر انا» اتاعىن العاندار, «التىن القا», «كۇمىس القا» يەگەرلەرى, سونداي-اق I جانە II دارەجەلى «انالىق داڭق» وردەنىمەن ماراپاتتالعان كوپ بالالى انالار, ۇلى وتان سوعىسى ارداگەرلەرى مەن مۇگەدەكتەرى, مۇگەدەكتەر جانە باسقا دا ساناتتاعى جاندار كىرەدى.
– جوسپار بويىنشا بۇل باعدارلامامەن ەڭ ءبىرىنشى مەديتسينا سالاسىنىڭ قىزمەتكەرلەرىن, ەكىنشىدەن, جۇمىس بەرۋشى تۇلعالاردىڭ نەگىزگى مىندەتتەرىن جان-جاقتى تۇسىندىرۋدەن باستادىق. ءاربىر ادام حقو-عا بارىپ, قاي ستاتۋسقا جاتاتىن بىلگەنى ءجون. الەۋمەتتىك جاعدايى بويىنشا, جۇمىسسىز بولسا, تىركەلىپ, ارنايى قۇجات الۋ ءتيىس, – دەدى ءماجىلىس دەپۋتاتى زاۋرەش امانجولوۆا.
بۇگىنگى كۇنى ءاربىر قازاقستاندىق 2018 جىلدىڭ 1 قاڭتارىنا دەيىن الەۋمەتتىك مەديتسينالىق ساقتاۋ جۇيەسىندەگى ءوز ستاتۋسىن بەلگىلەپ الۋى كەرەك. سول كەزدە قيىندىققا تاپ بولعان جاعدايدا كىمنىڭ كومەگىنە ءبىرىنشى جۇگىنە الاتىندىعى بەلگىلى بولادى.
– وسى جىلدىڭ 1 شىلدەسىنەن باستاپ مەديتسينالىق ساقتاندىرۋ جۇيەسى ىسكە قوسىلاتىنى, ونىڭ قىر-سىرى جايلى بۇقارا حالىقتىڭ باسىم بولىگى حابارسىز ەكەنى بەلگىلى بولدى. وسىعان بايلانىستى «نۇر وتان» پارتياسى بولىپ حالىققا ءتۇسىندىرۋ بويىنشا 45 مىڭنان استام جيىن وتكىزدىك. وعان ءۇش ميلليوننان استام حالىق قاتىستى. سونىمەن قاتار, ارنايى كىتاپشالار دا شىعاردىق, – دەدى رەسپۋبليكالىق قوعامدىق قابىلداۋ بولمەسىنىڭ مەڭگەرۋشىسى جۇماجان جۇكەنوۆ.
حالىققا تۇسىندىرمە جۇمىستارىن وتكىزۋ بويىنشا پارتيا فيليالدارى, دەنساۋلىق ساقتاۋ باسقارمالارى بىرلەسكەن سەمينارلار وتكىزگەن.
كەزدەسۋ سوڭىندا تۇرعىندار كوكەيلەرىندە جۇرگەن سۇراقتارىن قويىپ, ماماندار تاراپىنان تۇششىمدى جاۋاپتارىن الدى.
ايان ءابدۋالي,
«ەگەمەن قازاقستان»
