بۇدان باسقا ديماش ونەرىنە ءتانتى بولىپ جۇرگەن قىتايلىق ازاماتتار اقتوبەگە كەلىپ, ديماشتىڭ تۋعان توپىراعىمەن جانە تۋىپ-وسكەن شاڭىراعىمەن تانىسقىسى كەلەدى ەكەن. ولاردىڭ مۇنداي جوسپارلارى جونىندە Egemen.kz تىلشىسىنە اقتوبە وبلىستىق سىرتقى بايلانىستار جانە تۋريزم باسقارماسىنىڭ باسشىسى ەرمەك كەنجەحان ۇلى ايتىپ بەردى.
وسىعان بايلانىستى قازىرگى كۇنى وڭىردەگى تۋريستىك كومپانيالار ارنايى تۋريستىك مارشرۋتتار ۇيىمداستىرۋ قامىندا ءجۇر. سونداي-اق سالا باسشىسىنىڭ ايتۋىنشا بۇگىندە ديماشتىڭ كىندىك كەسكەن جەرىنە كەلگىسى كەلەتىن شەتەلدىكتەر قاتارى كوبەيگەن. ولاردىڭ ءبارى قىتاي ەلىنىڭ ازاماتتارى كورىنەدى. كونتسەرتكە دەيىن جانە كونتسەرتتەن كەيىن ديماش تۋىپ-وسكەن ولكەگە 2000-نان استام قىتايلىق ازاماتتار كەلەدى دەپ كۇتىلۋدە. ولارعا اگلومەراتسيالىق ايماقتىڭ كيەلى دە كورىكتى جەرلەرىن كورسەتۋ ءۇشىن قوسىمشا اۆتوكولىك باعىتتارى بەلگىلەنگەن.
تەمىر قۇسايىن,
"ەگەمەن قازاقستان"
اقتوبە
