قۇرىلعانىنا ءبىر جىلدان اسا ۋاقىت وتكەن قۇقىق قورعاۋ ورگاندارى اكادەمياسىنىڭ باسشىسى وڭىرگە وبلىس اكىمىنىڭ ارنايى شاقىرتۋىمەن كەلگەن. نايل فاريس ۇلى قۇقىق قورعاۋ سالاسىنا كورسەتىلىپ جاتقان قولداۋ ءۇشىن جەرگىلىكتى بيلىك باسشىسىنا راحمەت ايتتى.
- ءبىز قۇقىق قورعاۋ سالاسىنىڭ ماتەريالدىق-تەحنيكالىق بازاسىن جاقسارتۋعا ءاردايىم كوڭىل بولەمىز. بىلتىر مەملەكەت قازىناسىنان 1,5 ملرد تەڭگە ءبولىپ, پوليتسيا قىزمەتكەرلەرىنە 50 اۆتوكولىك, 30 بەينەكامەرا الىندى, اتتى پوليتسيا ءبولىمى ءۇشىن ارنايى بازا جاساقتالدى. بيىل جاڭادان جەدەل باسقارۋ ورتالىعى سالىنىپ جاتىر, بۇل جەردە بارلىق بەينەاقپارات جيناقتالىپ, جەدەل ءىس-ارەكەت ۇيلەستىرىلىپ وتىرادى. مۇنداي قامقورلىق بيىل دا جاسالادى, تاعى 50 اۆتوكولىك الىنادى, - دەدى ءوڭىر باسشىسى التاي كولگىنوۆ.
دەگەنمەن, ماتەريالدىق-تەحنيكالىق يگىلىك قانشا جاسالسا دا, پوليتسيانىڭ ءوز بويىندا بىلىكتىلىك, كاسىبيلىك ءبىلىم تومەن بولسا, ناتيجە دە از بولادى. سوندىقتان قۇقىق قورعاۋ ورگاندارى اكادەمياسى باتىس قازاقستان پوليتسياسى ءۇشىن ارنايى باعدارلاما ازىرلەپ, وقىتۋعا كىرىسپەك. بۇل كۋرستاردا پوليتسيا قىزمەتكەرلەرىنىڭ مادەنيەتى مەن ادەبى, ەلمەن قارىم-قاتىناس جاساۋ ۇلگىلەرى, ءارتۇرلى جاعدايدا ءوزىن ءوزى ۇستاۋ مانەرى, پسيحولوگيالىق كەڭەستەر مولىنان بەرىلمەك. 28 ماۋسىمدا باستالاتىن العاشقى ترەنينگتى بەلگىلى رەسەي بيزنەس-جاتتىقتىرۋشىسى راديسلاۆ گانداپاس وتكىزبەك.
نايل احمەتزاكيروۆ ءوز سوزىندە پوليتسيانىڭ ابىروي-بەدەلى قىزمەتكەردىڭ كاسىبي بىلىكتىلىگى مەن ادەبىنە, جۇرتپەن قارىم-قاتىناس تاسىلدەرىن مەڭگەرۋىنە تىكەلەي بايلانىستى ەكەندىگىنە توقتالدى. ء«ىس تەتىگىن كادر شەشەدى» دەگەن قاعيدانى قايتالاعان استانالىق مەيمان باتىسقازاقستاندىق جەرگىلىكتى پوليتسيا قىزمەتكەرلەرى كاسىبي بىلىكتىلىگىن جەتىلدىرۋ دەڭگەيى نەبارى 4% ەكەندىگىن, جەكە قۇرامداعى 1000 ادامنىڭ 39-ى عانا ءبىلىم جەتىلدىرگەنىن ايتتى. اكادەميا جۇمىسىن تانىستىرىپ, وندا جوعارى بىلىكتى 161 وفيتسەر ساباق بەرەتىنىن, قۇقىق قىزمەتكەرلەرى ءۇشىن كۇندەلىكتى پايدالانۋعا ىڭعايلى جادىناما جيناقتارىن دايىنداعانىن باياندادى.
«پوليتسيا قىزمەتكەرى – قوعامنىڭ ادال كومەكشىسىنە اينالۋى كەرەك» دەدى باتىس قازاقستان وبلىسىنىڭ پروكۋرورى ساپاربەك نۇرپەيىسوۆ.
- پوليتسيا قىزمەتكەرلەرىنىڭ قىزمەتى اسا جاۋاپتى ءارى قاۋىپ-قاتەرگە تولى. بەيبىت كۇننىڭ وزىندە تاۋەلسىزدىك جىلدارى قازاقستاندا 700-دەن اسا پوليتسيا قىزمەتكەرى قىزمەت بابىندا ءجۇرىپ قازا تاپسا, 2 مىڭنان اسا قىزمەتكەر ءتۇرلى جاراقات العان. مەرت بولعانداردىڭ ىشىندە 31 باتىسقازاقستاندىق بار. قازىر كۇن سايىن 102 نومىرىنە حالىقتان 200-300 قوڭىراۋ تۇسەدى ەكەن. مىنە, وسىنداي جاعدايدا ىشكى ىستەر سالاسى قىزمەتكەرلەرىنىڭ كاسىبيلىگىن ارتتىرۋ, بىلىكتىلىگىن كوتەرى ءبىرىنشى ورىندا تۇرۋى ءتيىس, - دەدى باتىس قازاقستان وبلىستىق ىشكى ىستەر دەپارتامەنتىنىڭ باستىعى, پوليتسيا گەنەرال-مايورى ماقسۇتحان ءابىلازيموۆ. باتىس قازاقستان وبلىستىق جەرگىلىكتى پوليتسيا قىزمەتىنىڭ باسشىسى ماناربەك عابدۋللين ءوزى باسقارىپ وتىرعان سالاداعى مىڭنان اسا قىزمەتكەردىڭ 37 پايىزى – سەرجانت, 47 پايىزى – ىشكى ىستەر سالاسىنا كەلگەنىنە 5 جىل تولماعان جاس مامان ەكەندىگىن ايتىپ, اكادەميالىق كۋرستىڭ وتە قاجەتتىگىن ماقۇلدادى.
جيىن بارىسىندا وبلىس اكىمى التاي كولگىنوۆ «تۇرعىنۇيجيناققۇرىلىس» بانكىمەن كەلىسىپ, باسپاناعا مۇقتاج پوليتسيا قىزمەتكەرلەرىنە ارناپ كوپ قاباتتى ءۇي تۇرعىزۋ جوسپارىمىزدا تۇر» دەگەن جاقسى جاڭالىقتى جاريا ەتتى. باتىس قازاقستان وبلىستىق ىشكى ىستەر دەپارتامەنتىنىڭ باستىعى, پوليتسيا گەنەرال-مايورى ماقسۇتحان ءابىلازيموۆتىڭ ايتۋىنشا, وبلىس بويىنشا 620 پوليتسيا قىزمەتكەرى تۇرعىن ءۇي كەزەگىندە تۇر ەكەن.
قازبەك قۇتتىمۇرات ۇلى,
«ەگەمەن قازاقستان»
ورال
سۋرەتتەردى تۇسىرگەن ايباتىر نۇراش
