بەلگىلى بولعانداي, قۇلاعان زىمىران بولشەكتەرى دالا ءورتىنىڭ باستالۋىنا سەبەپ بولعان.
«14 ماۋسىم كۇنى ساعات 18.04 تە قاراعاندى وبلىسى تجد ءورت ءسوندىرۋ جانە اپاتتى قۇتقارۋ قىزمەتى №2 وتريادىنىڭ ورتالىق ءورت بايلانىسى بەكەتىنە جەزقازعان قالاسىنىڭ توتەنشە جاعدايلار بويىنشا باسقارماسىنان, تالاپ سەلوسىنان وڭتۇستىك-باتىس باعىتقا قاراي 20 شاقىرىم جەردە, «بايقوڭىر» عارىش ايلاعىنىڭ «پروگرەسس مس-06» جۇك كولىك كەمەسىنىڭ «سويۋز-2.1ا» تاسىمالداعىش-زىمىرانى بولشەكتەرىنىڭ قۇلاۋى سالدارىنان, قۇرعاق ءشوپتىڭ ورتەنۋ جاعدايى ورىن العان. ءورت بولىپ جاتقان جەردە رف «ماشينوستروەنيە» عوب» اوك اق №1 بازاسىنىڭ 5 تەحنيكاسى جۇمىس ىستەپ جاتىر, تاعى 3 تەحنيكا قوسىمشا شاقىرىلدى, كومەك كەرەك ەمەس» - دەپ حابارلايدى قر تجم تجك رەسمي وكىلى رۋسلان يمانقۇلوۆ.
سونىمەن قاتار, 14 ماۋسىم كۇنى ساعات 19.25 تە وبلىستىڭ تجد ءورت ءسوندىرۋ جانە اپاتتى قۇتقارۋ قىزمەتى №2 وتريادىنىڭ ورتالىق ءورت بايلانىسى بەكەتىنە تالاپ سەلوسىنىڭ تۇرعىنىنان جەزقازعان قالاسىنان 40 شاقىرىم جەردە, جەزقازعان-قىزىلوردا جولىنىڭ اۋماعىندا دالا ورتەنىپ جاتىر دەگەن حابار كەلىپ تۇسكەن. ول جاققا ءورت ءسوندىرۋ قىزمەتىنىڭ كەزەكشى اۋىسىمى كۇشتەرى مەن قۇرالدارىن جىبەرۋ تۋرالى شەشىم قابىلداندى.
اتالمىش ورىنعا جەدەل جەتكەن ءورت سوندىرۋشىلەردىڭ حابارلاۋىنشا, تالاپ سەلوسىنان 16 شاقىرىم جەردە, جەزقازعان – قىزىلوردا جولىنىڭ وڭتۇستىك باعىتىندا 15 شاقىرىم اۋماقتاعى ەن دالا ورتەنىپ جاتىر, جول بويىن قالىڭ ءتۇتىن جايلاعان, اۋماعى ءالى بەلگىسىز. ودان ءارى ءورت ءسوندىرۋ بويىنشا كۇشتەر مەن قۇرالداردى جوسپارلى كۇشەيتۋ جۇمىستارى جۇرگىزىلدى.
ر.يمانقۇلوۆتىڭ حابارلاۋىنشا, ءورت ناتيجەسىندە كۇيىك شالۋ سالدارىنان 53 جاستاعى ەر ادام قايتىس بولعان. 1968 جىلى تۋعان تاعى ءبىر ازاماتتى اۋرۋحاناعا جەتكىزگەن. قازىر تاسىمالداعىش-زىمىرانداردىڭ بولشەكتەرىن جيناۋ بويىنشا جۇمىستار جۇرگىزىلىپ جاتىر.
ءورت سوندىرۋگە تاعى 61 ادام مەن 22 تەحنيكا تارتىلعان, ونىڭ ىشىندە قاراعاندى وبلىسىنىڭ تجد ءورت ءسوندىرۋ جانە اپاتتى قۇتقارۋ قىزمەتى, قر تجم تجك ء«ورت ءسوندىرۋشى» اق, جەرگىلىكتى اتقارۋشى ورگاندار, رف «ماشينوستروەنيە» عوب» اوك اق №1 بازاسىنىڭ كۇشتەرى مەن قۇرالدارى جۇمىلدىرىلعان.
ساعات 1.20 دا ءورت اۋىزدىقتالدى. 3.31 دە ءورت تولىق ءسوندىرىلدى.
«بەلگىلى الەۋمەتتىك جەلىلەردەگى زىمىراننىڭ قۇلاعان بولىگىندە گەپتيل تەكتەس زياندى زاتتاردىڭ بار ەكەندىگى جايلى حابارلامالاردىڭ جالعان اقپارات ەكەندىگىن حابارلايمىز» - دەپ اتاپ ءوتتى ر.يمانقۇلوۆ.
ميراس اسان,
«ەگەمەن قازاقستان»
جەزقازعان
