فيلمگە «اردي» وڭالتۋ ورتالىعىنىڭ تاربيەلەنۋشىسى دينارا ءشارىپوۆانىڭ ءومىرى ارقاۋ بولعان. باستى ءرولدى دە دينارانىڭ ءوزى وينايدى. ايرىقشا كينوجوبادا باستى رولدەردەن باسقا كەيىپكەرلەردى دە «اردي» وڭالتۋ ورتالىعىنىڭ وقۋشىلارى بەينەلەيدى. سول سياقتى «ولسەم بە, الدە قالسام با؟!» ديلوگياسىنىڭ العاشقى بولىمىندەگى باستى رولدەگى تاحير وماروۆقا دا باستى ءرولدىڭ ءبىرى بۇيىرىپ تۇر. سونداي-اق, فيلمگە ەمير بايعازيننىڭ ء«تورت وقيعا» فيلمىندە باستى ءرولدى سومداعان قاناعات تاسقاراەۆ تا تۇسەدى.
اتالمىش كارتينانىڭ دايىندىق جۇمىستارى ءساۋىر ايىنىڭ بەل ورتاسىنان باستالعان بولاتىن. وسى ارالىقتا ستسەناري جازىلىپ, فوتو جانە بەينە بايقاۋلار جاسالىپ, ءتۇسىرىلىم لوكاتسيالارى انىقتالىپتى. دايىندىق كەزەڭىندە رەجيسسەر كينو الەمىنە جولداما العان اكتەرلاردىڭ ديكتسياسىن دۇرىس قويۋ ءۇشىن, لوگوپەدتەر جۇمىس ىستەگەنىن ايتادى.
– «قىز بەن تەڭىز» ءفيلمى «شەكسىز مۇمكىندىكتەر» ديلوگياسىنىڭ ەكىنشى ءبولىمى دەسەك تە بولادى. «ولسەم بە, الدە قالسام با؟!» اتتى ءبىرىنشى ءبولىم ارقىلى ءبىز سال اۋرۋىنا ۇشىراعان جاس جىگىتتىڭ ءومىرىن كورسەتۋگە تىرىستىق. ال وسى فيلمدە اسەلدىڭ تاعدىرى ارقىلى ارماندار العا جەتەلەيتىنىن, ۇمىتتەر ۇزىلمەيتىنىن بايانداماقپىز. كارتينانىڭ باستى كەيىپكەرى ءوزىنىڭ ومىرگە دەگەن قۇشتارلىعىمەن, ەرەكشە مەيىرمان مىنەزىمەن دارا. جوعارى ءبىلىم الىپ, قالاداعى بانكتەردىڭ بىرىندە جۇمىس ىستەيدى. شىعارماشىلىققا دا وتە جاقىن. باشپايىمەن سۋرەت سالىپ, دەنى ساۋ ادامدارعا ءوز-وزىنە سەنۋگە كومەكتەسەدى. فيلمدە ءبىز ونىڭ ىشكى جان دۇنيەسىنىڭ شەكسىز بايلىعىن اشىپ كورسەتپەكپىز, – دەيدى ءفيلمنىڭ رەجيسسەرى ءارى پروديۋسەرى ءازيزجان زايروۆ.
مادەنيەت جانە سپورت مينيسترلىگىنىڭ تاپسىرىسى بويىنشا قولعا الىنعان كارتينا الماتىدا ەكى اي بويى تۇسىرىلەدى دەپ جوسپارلانعان.
ايناش ەسالي,
«ەگەمەن قازاقستان»
الماتى
