سول قاسيەتتەرىنىڭ ارقاسىندا بولسا كەرەك, ءومىر جولىندا ارمان-ماقساتتارىنا قول جەتكىزدى. بيىل 80 جاسقا تولاتىن ورىنعالي بالتاي ۇلىنىڭ جۇمىستان جالىققان كەزى جوق. ول ءالى دە قىزمەت ەتەدى. اتىراۋ قالاسىنداعى №7 ەمحانادا پەدياتر-كەڭەسشى. تاجىريبەلى مامانعا قالاداعى عانا ەمەس, الىس اۋىلداعى اتا-انالار دا كوپ كەلەدى. بالا دەنساۋلىعى, ونى ساقتاۋ جولدارى, دۇرىس تاماقتانۋ جايىندا كەڭەستەر الادى. «قازىر بالالار اۋرۋى كوبەيىپ كەتتى, – دەيدى مەديتسينا عىلىمدارىنىڭ دوكتورى, پروفەسسور و.بالتاەۆ. – دۇنيەگە جاڭا كەلگەن نارەستەلەردىڭ وزىندە ءتۋابىتتى اقاۋلار بەلەڭ الىپ تۇر. اسىرەسە, جۇرەك اۋرۋى, اسقازان-ىشەك جۇيەلەرىنىڭ اۋرۋلارى, قانى ازدىق, تىنىس الۋ جولدارىنىڭ سىرقاتى ءجيى كەزدەسەدى».
دۇرىس تاماقتانباۋدىڭ اقىرى اۋرۋعا الىپ كەلەدى. دۇكەن سورەلەرىندە قاپتاپ تۇرعان ءتۇرلى اللەرگەندەردىڭ بالا دەنساۋلىعىنا پايداسىنان زيانى كوپ. الدىنا كەلگەن اتا-انالاردىڭ بارىنە وسىنى ايتىپ وتىراتىن دارىگەر «اۋرۋ – استان» دەگەن بابالار دانالىعىنا جەتە ءمان بەرۋىمىز كەرەك» دەيدى. بۇگىنگى بالالاردىڭ كومپيۋتەردەن باس المايتىنى دا ورىنعالي بالتاي ۇلىن تولعاندىراتىن تاقىرىپ. دارىگەر, اسىرەسە, جازعى دەمالىس كەزىندە بالالاردىڭ كومپيۋتەردە ساعاتتاپ ءۇزىلىسسىز وتىرۋى مي جۇيەسىنە كەرى اسەر ەتەتىنىنە الاڭدايدى. «بۇل جاعداي گيپودينامياعا اكەلەدى, سونىڭ كەسىرىنەن بالانىڭ دەنە شىمىرلىعى السىرەيدى» دەيدى ول.
ول كومپيۋتەرمەن ەمەس, كىتاپپەن دوس بولعان كەزەڭنىڭ وكىلى. سوندىقتان بولسا كەرەك, دارىگەرلىك كەڭەس الۋعا كەلگەن اتا-اناعا دا, ءجاسوسپىرىم بالاعا دا «وقىعان ادام مۇراتىنا جەتەدى» دەپ ۇنەمى ايتىپ وتىرادى. شىن مانىندە «اق حالاتتى ابزال جان» دەپ ايتۋعا تۇرارلىق شيپاگەردىڭ ءومىر جولى دا تاعىلىم مەن تالىمگە تولى. 1964 جىلى الماتى مەملەكەتتىك مەديتسينالىق ينستيتۋتىن بىتىرگەننەن كەيىن تۋعان جەرى اتىراۋعا ورالىپ, وبلىستىڭ ەڭ شالعايىندا جاتقان قىزىلقوعا اۋدانىنا پەدياتر-دارىگەر بولىپ باردى. ءۇش جىل ەڭبەك ەتكەن سوڭ, 1967 جىلى ماسكەۋگە اسپيرانتۋراعا اتتاندى. 1970 جىلدان 2002 جىلعا دەيىن اقتوبە مەديتسينالىق ينستيتۋتىندا اسسيسەنت, دوتسەنت, پەدياتريا كافەدراسىنىڭ مەڭگەرۋشىسى قىزمەتتەرىن اتقاردى. 1991 جىلى دوكتورلىق ديسسەرتاتسياسىن قورعاپ, ءبىر جىلدان كەيىن پروفەسسور اتاعىن الدى. 2002-2004 جىلدارى اتىراۋ وبلىستىق اۋرۋحاناسى باس دارىگەرىنىڭ ورىنباسارى, 2004-2006 جىلدارى تەمىر جول اۋرۋحاناسى باس دارىگەرىنىڭ ورىنباسارى قىزمەتتەرىن ابىرويمەن اتقاردى. 2006-2012 جىلدارى اتىراۋ وبلىستىق بالالار اۋرۋحاناسىندا پەدياتر-دارىگەر بولدى. 2012 جىلدان بەرى №7 اتىراۋ قالالىق ەمحاناسىندا ەڭبەك ەتەدى.
ورىنعالي بالتاي ۇلىن ءوز كاسىبىنە جاۋاپكەرشىلىكپەن قارايتىن جوعارى دارەجەلى مامان رەتىندە ارىپتەستەرى دە قۇرمەتتەيدى. 45 جىل بويى دەنساۋلىق ساقتاۋ سالاسىندا ەڭبەك ەتىپ كەلە جاتقان ارداگەر دارىگەردىڭ جاس ماماندارعا ۇيرەتەرى كوپ. ورىنعالي بالتاي ۇلىنىڭ اقتوبە مەديتسينالىق ينستيتۋتىندا پەدياتريا فاكۋلتەتىنىڭ اشىلۋىنا كوپ ەڭبەك سىڭىرگەنى ەلگە بەلگىلى. ول قازىرگە دەيىن ءوز ءىسىنىڭ شەبەرى رەتىندە گاستروەنتەرولوگ, اللەرگولوگ, نەفرولوگ ماماندىقتارىنىڭ جاڭا ەمدەۋ ادىستەرىن ۇسىنىپ, ناۋقاستارعا ەمدەۋ پروتسەسىنىڭ دۇرىس بولۋىن قاداعالاپ وتىرادى. ماراپات پەن ماداقتان دا كەندە ەمەس. سەكسەننىڭ سەڭگىرىنە شىققان دارىگەردەن «تىلەگىڭىز قانداي؟» دەپ سۇرادىق. «ەڭ باستىسى – بالالار اۋىرماسا ەكەن» – دەدى ول.
باقىتگۇل باباش,
«ەگەمەن قازاقستان»
اتىراۋ
