ەلباسى باعدارلاماسىن ىسكە اسىرۋ اياسىندا الماتى قالاسىنىڭ اكىمدىگى ەرەكشە جوبانى جۇزەگە اسىرۋدى قولعا الدى. قالا اكىمدىگى «Alpha Academy» ءبىلىم اكادەمياسىمەن بىرلەسە وتىرىپ ءبىرىنشى رەت «تىلدەر ساياباعى – پارك يازىكوۆ – Language Park» جوباسىنىڭ تۇساۋىن كەستى. ماماندار ءتىل ۇيرەنۋدىڭ, ءوز ىشىندەگى تالاپ, ىقىلاس-تىلەكتى وياتۋدىڭ, وعان قۇرمەتپەن قاراۋدىڭ, ناتيجەسىندە تولىققاندى مەڭگەرىپ شىعۋدىڭ ءتۇرلى جولدارىن ۇسىنىپ كەلەدى, بىراق ناتيجەسى بىردە – ءتيىمدى, بىردە – ءتيىمسىز.
«تىلدەر ساياباعى – پارك يازىكوۆ – Language Park» – ناتيجەگە نەگىزدەلگەن شەتەلدىك جوبا.
وسى باعدارلاما اياسىندا قالانىڭ مەدەۋ اۋدانىنىڭ اكىمدىگى اۋدان تۇرعىندارىن قازاق, ورىس, اعىلشىن تىلدەرىنە تەگىن وقىتىپ, ۇيرەتەدى. ءتىل ۇيرەنۋ كۋرستارى اشىق اسپان استىندا, تازا اۋادا, ياعني الماتىنىڭ ورتالىق دەمالىس ساياباعىنىڭ جاسىل الاڭقايلارىندا ۇيىمداستىرىلادى. ماۋسىمنان باستالىپ, تامىز ايىنىڭ سوڭىنا دەيىن جالعاساتىن ءۇش ايلىق ءتىل كۋرستارىندا اۋداننىڭ 600 تۇرعىنى تەگىن وقىتىلادى. بۇل الەۋمەتتىك جوبا ەشقانداي قاراجاتتى قاجەت ەتپەيدى. مۇعالىمدەر – ەرىكتىلەر. ءتىل ۇيرەنۋشى دە, ءتىلدى ۇيرەتۋشى دە اقىسىز جۇيە بويىنشا ءتۇرلى ءتاسىل ارقىلى ورتاق مۇددەگە جۇمىس ىستەيدى. بۇل ماقساتتى ىسكە اسىرۋ ءۇشىن ارنايى سايت اشىلىپ, ءتىل ۇيرەنگىسى كەلەتىن ىنتالىلار الدىن الا سول جەرگە تىركەلەدى.
وتكەن جۇما كۇنى تۇساۋى كەسىلگەن جوباعا قىزىعىپ, جازىلعان جاستاردىڭ, وقۋشىلاردىڭ, زەينەتكەرلەردىڭ سانى قازىردىڭ وزىندە 600-دەن اسىپ كەتكەن.
6 جاستان باستاپ 60 جاسقا دەيىن نيەت بىلدىرگەندەر قاتارىنىڭ كوپتىگىن ەسكەرگەن اۋدان اكىمى ەرجان جىلقىباەۆ كەلەسى ايدان باستاپ كۋرسقا قاتىساتىنداردىڭ سانى 1000-عا دەيىن قامتىلاتىنىن ايتىپ, كوپشىلىكتى قۋانتىپ تاستادى. رەسپۋبليكا بويىنشا العاش رەت جۇزەگە اسىرىلعالى وتىرعان جوبانىڭ ناتيجەسى ءساتتى بولسا, شەتەلدىك جوبانى الداعى ۋاقىتتا قالانىڭ باسقا اۋداندارىندا, ءتىپتى ەلىمىزدىڭ باسقا ايماقتارىندا دا جۇيەلى ۇيىمداستىرۋ كوزدەلىپ وتىر.
ايگۇل احانبايقىزى,
«ەگەمەن قازاقستان»
الماتى
