بيىلدان باستاپ مەنەدجمەنت جانە ەكونوميكا پاندەرىن قازاق تىلىندە جۇرگىزۋ جۇزەگە اسىرىلادى ەكەن. بۇل تۋرالى مەملەكەتىمىزدەگى ۋنيۆەرسيتەت بولىمشەسىنىڭ باس ديرەكتورى باۋىرجان قاسىمبەرگەباەۆ حاباردار ەتتى.
بولىمشە باسشىسىنىڭ ايتۋىنشا, مەملەكەتتىك مارتەبەگە يە بولعان تىلدە جوعارى ءبىلىم بەرۋ كەرەكتىگىن ءومىر تالاپ ەتىپ وتىر. ونىڭ ۇستىنە نارىقتاعى تىلدىك سۇرانىستىڭ قاجەتتىگىن بولاشاق ماماندار دا ءبىلىپ, ءوتىنىش ءبىلدىردى. «بۇل تاۋەلسىز ەل جاستارىنىڭ انا تىلىنە دەگەن قۇرمەتىن, ىزەتىن, وڭ نيەتىن بىلدىرسە كەرەك. بۇعان كورشى مەملەكەتتىڭ ازاماتتارى دا تارشىلىق جاساماي, مۇمكىندىكتىڭ ءتيىمدى جولدارىن قاراستىرىپ وتىر», دەيدى ول.
ماسكەۋ قالاسىندا ورنالاسقان ۋنيۆەرسيتەتتە الەمنىڭ ەلۋ مەملەكەتىنەن الپىس مىڭعا تاياۋ ستۋدەنت ءبىلىم الادى ەكەن. 2003 جىلى «سينەرگيا» ۋنيۆەرسيتەتى مەنەدجمەنتتى دامىتۋ بويىنشا ەۋروپالىق قوردىڭ مۇشەسى بولسا, 2006 جىلى ۋنيۆەرسيتەتتەردىڭ ۇلى حارتياسىنا قوسىلعانىن دا ايتا كەتسەك دەيمىز. سول سەكىلدى بۇل ءبىلىم ورداسى ەۋروپالىق ەلەكتروندىق وقۋ كەپىلدىگى قورىنىڭ اككرەديتاتسياسىنان وتكەن رەسەيدەگى ءبىرىنشى مەكەمە بولىپ تابىلادى.
سۇلەيمەن مامەت,
«ەگەمەن قازاقستان»
