مۇندايدا ويىن بالالارىنا قيىن. اۋىل ىرگەسىندە كۇمىستەي جىلتىراپ وزەن اعىپ جاتقاننان كەيىن ۇلكەندەردىڭ كوزىن الا بەرىپ سۋعا كۇمپ بەرەدى. سارىاعاش اۋدانى باعىس اۋىلىندا دا وسىنداي جاعداي ورىن الدى. تاۋدان قۇلاپ اققان ارىق ماڭىنداعى بالالاردىڭ قاسىندا قالتالاقتاپ جۇرگەن ءبىر جارىم جاسار ەرجان سۋعا قۇلاپ كەتەدى. ءۇستى تىنىق بولعانىمەن, اعىسى قاتتى تاۋ سۋى ءبۇلدىرشىندى قاقپاقىلعا الىپ الا جونەلگەن.
كىشكەنتاي ەرجاننىڭ كورەر جارىعى بار ەكەن. وسى مەزەتتە ۇيىنەن شىققان ون ءۇش جاسار مەكتەپ وقۋشىسى دەمەجان التاي كومەك سۇراعان بالالاردىڭ شىرىلىن ەستىپ, ءمان-جايعا قانىققان سوڭ سۋعا قارعىپ كەتەدى. ءبىر باتىپ, ءبىر شىعىپ بارا جاتقان ءسابيدى قۋىپ جەتىپ, جاعاعا الىپ شىعادى. تاۋ سۋىنىڭ ىزعارى ءوتىپ كەتكەن ءسابي كوكپەڭبەك بولىپ تالىپ جاتىر. دەمەجان التاي جاعاعا جاتقىزىپ كەۋدەسىن باسىپ, جاساندى دەم الدىرعاندا كوگەرىپ جاتقان ءسابي ەسىن جينايدى.
كەيىن قۇتقارۋشىلار كەلگەندە ون ءۇش جاسار بالانىڭ ەش ساسپاي العاشقى مەديتسينالىق كومەكتى ساۋاتتى جاساعانىنا تاڭدانىستارىن بىلدىرگەن. كەيدە ابدىراعان ۇلكەندەردىڭ ءوزى مۇندايدا اسىپ-ساسىپ قالار ەكەن.
ءسابيدى قۇداي ءبىر اجالدان قاعىپتى. انىعى, سول كۇنى تاڭەرتەڭگىلىك دەمەجان جارىسقا كەتۋى كەرەك بولعان. بىراق, ءبىر سەبەپتەرمەن ايالداپ قالىپتى. ەگەر ول ۇيدەن بىرەر مينۋت كەش شىقسا, ەرجاننىڭ جارىق الەممەن قوشتاسۋى ابدەن مۇمكىن ەكەن.
بۇگىندە جەتكىنشەك دەمەجان التايدىڭ ەرلىگى ءوز تۋعان اۋىلىنا عانا ەمەس, ەلگە ۇلگى بولىپ جاتىر. وبلىستىق توتەنشە جاعدايلار دەپارتامەنتى ەرجۇرەك ۇلاندى مەدالعا ۇسىنباق نيەتتە. جاقىندا ءوز تاراپتارىنان العىس حات تاپسىردى.
وسىندايدا ەسكە تۇسەدى. اقتوبە قالاسىندا كانال سۋىنا ەكى بىردەي بالا باتىپ, كومەك سۇراعاندا جاعاداعى ەرەسەكتەر قۇتقارۋعا ۇمتىلا قويماپتى. بۇل – ناعىز ەزدىكتىڭ بەلگىسى. بىرەۋگە وق ءتيىپ, بولماسا ماشينا اپاتىنا ءتۇسىپ جانى قينالىپ جاتقاندا, ۇيالى تەلەفونمەن تاسپاعا تارتىپ, الەۋمەتتىك جەلىگە سالاتىندار دا كوبەيىپ كەلەدى. بۇل – ازعىندىق. ال دەمەجان التايدىكى ناعىز ەرلىك. ول – بەيبىت كۇننىڭ باتىرى. ىزگىلىك پەن ۇلتتىق پاتريوتيزمگە مىسال ىزدەسەڭىز, شارتاراپقا شابىلماي-اق قويىنىز, دەمەجان سيياقتى جالىندى جاستار جانىڭىزدا ءجۇر.
باقتيار تايجان,
«ەگەمەن قازاقستان»
وڭتۇستىك قازاقستان وبلىسى
