بۇگىندە ەلباسى – قازاقستان قارۋلى كۇشتەرىنىڭ جوعارعى باس قولباسشىسى ءوزىنىڭ ءاربىر جولداۋىندا قازاقستاندىق ءپاتريوتيزمدى, ۇلتتىق يدەولوگيانى دامىتۋدى, ونىڭ ىشىندە, اسىرەسە, جاس ازاماتتاردىڭ اراسىندا كەڭىنەن ناسيحاتتاۋدى باستى قۇندىلىقتاردىڭ قاتارىنا قوياتىنى بارشامىزعا ءمالىم. وسىعان وراي, جاستار ساياساتىن جۇزەگە اسىرۋ اياسىندا اسكەري-پاتريوتتىق تاربيە بەرۋ شارالارىن وتكىزۋ ماڭىزدى باعىتتاردىڭ ءبىرى بولىپ تابىلادى. بيىل اتالعان اسكەري-پاتريوتتىق جيىن العاش رەت حالىقارالىق دەڭگەيدە, رەسەي فەدەراتسياسىنان كەلگەن كوماندانىڭ قاتىسۋىمەن وتكىزىلىپ وتىر.
سونداي-اق, جيىن باقىلاۋشىسى رەتىندە وزبەكستاننان ارنايى قوناقتار شاقىرتىلعان. بيىلعى جىلى جيىنعا 600-دەن اسا قاتىسۋشى باق سىناۋدا. ولاردىڭ قاتارىندا رەسپۋبليكا وڭىرلەرىندەگى اسكەري-پاتريوتتىق كلۋبتاردىڭ تاربيە-
لەنۋشىلەرى, استانا, شىمكەنت, الماتى, قاراعاندى قالالارىنداعى «جاس ۇلان» رەسپۋبليكالىق اسكەري مەكتەپتەرىنىڭ, «ارىستان» مامانداندىرىلعان ليتسەيىنىڭ, پاۆلودار قالاسىنداعى اسكەري مەكتەپ-ينتەرناتىنىڭ, سەمەي قالاسىنداعى مامانداندىرىلعان «جاس ۇلان» ەر بالالار مەكتەبىنىڭ تاربيەلەنۋشىلەرى جانە رەسەي فەدەراتسياسى ورىنبور پرەزيدەنتتىك كادەت ۋچيليششەسىنىڭ تاربيەلەنۋشىلەرى بار. «ايبىن» جاستار جيىنى ماۋسىمنىڭ 13-ءى مەن 17-ءى ارالىعىندا ءتورت كۇنگە سوزىلادى.
سالتاناتتى شارانىڭ العىسوزىندە قورعانىس ءمينيسترىنىڭ ورىنباسارى, گەنەرال-لەيتەنات تالعات مۇحتاروۆ ايتىپ وتكەندەي, بۇل جىلى اسكەري-پاتريوتتىق جيىنعا كوپتەگەن وزگەرىستەر ەنگىزىلگەن. جيىن باعدارلاماسى «ەرۋديت» ينتەللەكتۋالدى ويىنى, «مەنىڭ روبوتىم» روبوتەحنيكالىق كونكۋرسى, پنەۆماتيكالىق ۆينتوۆكادان اتىس, بەلاعاشقا تارتىلۋ, اسكەري كروسس, كوماندالىق پەينتبول ويىنى, مەگا-ارت «ايبىن داۋىسى» فەستيۆالى, «World of tanks» كومپيۋتەرلىك ويىنىن قامتىعان.
حالىقارالىق جيىننىڭ سالتاناتتى اشىلۋىندا قوناقتار 22750 ءا/ب اسكەري قىزمەتكەرلەرىنىڭ قويان-قولتىق ۇرىستارىن, قۇرمەت قاراۋىلى روتاسىنىڭ شەبەرلىكتەرىن, ارنايى مامانداندىرىلعان جاساقتاردىڭ كورسەتەتىن كورىنىستەرىن, ارتيللەريا جانە اۆياتسيا قولداۋىمەن كورسەتىلەتىن اسكەري ەپيزودتاردى, قاراعاندى قالاسىنىڭ اسكەري-تەحنيكالىق مەكتەبىنىڭ موتوتسيكليستەرىنىڭ شەبەرلىگىن تاماشالادى.
«ايبىن» جاستار جيىنى وتانسۇيگىشتىكتىڭ, دوستىقتىڭ, تۇلعا بولىپ قالىپتاسۋدىڭ شىنايى مەكتەبى.
– ءبىز – بىرلىك تۋىن بەرىك ۇستاعان, بارشاعا ۇلگىلى كوپ ۇلتتى ەلمىز. سوندىقتان دا ءبىز ءۇشىن جاستاردىڭ رۋحاني-ادامگەرشىلىك جانە دەنە تاربيەسىمەن اسكەري قىزمەتكە دايىندىعىمەن اينالىسۋى وتە ماڭىزدى. بۇل ءوز كەزەگىندە مەملەكەتكە جاستاردى پاتريوتتىق تاربيەلەۋدىڭ جاڭا مودەلىن قالىپتاستىرۋعا كومەكتەسەدى. اتالمىش جيىن اسكەري-پاتريوتتتىق ۇيىمدار قوزعالىستارىن جانداندىرۋ جۇمىستارىن اتقارادى جانە بالالار مەن جاستاردى قازاقستاندىق وتانشىلدىققا تاربيەلەۋگە باعىتتالعان جوبالاردى ىسكە اسىرادى, – دەدى قازاقستان قارۋلى كۇشتەرى قۇرلىق اسكەرلەرى باس قولباسشىسىنىڭ ورىنباسارى دۋلات ادىربەكوۆ.
ءىس-شارانىڭ اشىلۋ سالتاناتىندا, سونىمەن قاتار, قاراعاندى وبلىسى اكىمىنىڭ ورىنباسارى جاندوس اقىلسەرىك ۇلى ءسوز سويلەدى. «مۇنداي, «ايبىن» سىندى اسكەري-پاتريوتتىق جاستار جيىنىن وتكىزۋدەگى نەگىزگى ماقسات – اسكەري قىزمەتتى ناسيحاتتاۋ, قازاقستان رەسپۋبليكاسى قارۋلى كۇشتەرىنىڭ ءيميدجىن ارتتىرۋ, ءارتۇرلى ەلدەردىڭ جاس ارمياشىلارى بىرلەستىكتەرى اراسىنداعى ىنتىماقتاستىقتى نىعايتۋ بولىپ تابىلادى», – دەدى ايماق باسشىسىنىڭ ورىنباسارى.
جيىن بارىسىندا بالالار بىرەگەي دايىندىق مەكتەبىنەن ءوتىپ, قازاقستاندىق ارميانىڭ زاماناۋي تەحنيكاسى مەن قارۋ-جاراعىن تاماشالاپ, وزدەرىنىڭ كۇشتەرى مەن مۇمكىندىكتەرىن سىناپ كورمەك. سونداي-اق, تاجىريبە جيناقتاپ, جاڭا دوستار تاپپاق.
«مەن وسى جارىسقا ءبىرىنشى رەت قاتىسىپ تۇرمىن. ءبىزدىڭ كوماندانىڭ ماقساتى – جەڭىسكە جەتۋ. ايانباي ەڭبەك ەتۋگە دايىن-
بىز. «ايبىن» جارىسىنا ءوزىم قۇراستىرعان روبوت-تەحنيكامدى اكەلدىم. ول – لەگو-بارلاۋشى روبوت دەپ اتالادى. ەرەكشەلىگى, ادام دەنەسى سىيمايتىن قۋىستارعا كىرىپ, بەرگەن پارمەندەرىمدى بۇلجىتپاي ورىندايدى. «ايبىن» حالىقارالىق اسكەري-پاتريوتتىق جيىنىنا كەلگەن بارلىق قاتىسۋشىلارعا ساتتىلىك تىلەيمىن», – دەيدى استانا قالاسىنداعى ارميا گەنەرالى ساعدات نۇرماعانبەتوۆ اتىنداعى «جاس ۇلان» رەسپۋبليكالىق مەكتەبىنىڭ تاربيەلەنۋشىسى Cۇلتان امانگەلدى.
جاستاردىڭ جىگەرىن جانيتىن جيىنعا بيىل وسىلايشا سەرپىن بەرىلمەك. الدىڭعى ەكى جىلدىڭ تابىستى ناتيجەلەرى دە بيىل ەسەلەنىپ, دودا قىزۋ ءارى تارتىستى وتەتىنىنە دە سەنىمدىمىز. كۇش-جىگەرلەرىن تاسىپ, ابىرويلارىڭ ارتا بەرسىن, ايبىندىقتار!
ميراس اسان,
«ەگەمەن قازاقستان»
قاراعاندى وبلىسى
