ءباسپاسوز ورتالىعىندا وتكەن باسقوسۋدا مالايزيالىق پاۆيلون ديرەكتورىنىڭ ورىنباسارى لۋ تۋك گي «1 پوست = 1 ۆاتت» ناۋقاندىق شاراسىنىڭ جاريالانعانىن مالىمدەدى.
بەلگىلەنگەن شارتقا ساي, شارادا ءاربىر قاتىسۋشىسى «Facebook», «Instagram» جانە «VK» الەۋمەتتىك جەلىلەرىنە جاسىل ەنەرگەتيكا, جاسىل تەحنولوگيا تاقىرىپتارىندا پوست جاريالاپ, ونى #MyButterflyEffect حەشتەگىمەن بەلگىلەپ, كورسەتۋلەرى كەرەك. ۇيىمداستىرۋشىلار وسىنداي قاداممەن الەمدە جاسىل تەحنولوگيالار يدەياسىن ناسيحاتتاماق.
پاۆيلوننىڭ ءباسپاسوز قىزمەتكەرى مالىك كوشمۇحانوۆتىڭ ايتۋىنشا, جاسىل تەحنولوگيا جانە كۇن ەنەرگياسى تاقىرىبىندا اسەرلى پوست جازعان قازاقستاننىڭ 2 ازاماتى ەلوردادا ءوتىپ جاتقان ەكسپو-2017 كورمەسىن تەگىن تاماشالاي الادى. بايقاۋ شارتتارىن ەگجەي-تەگجەيلى تۇسىندىرگەن ول بىلاي دەدى: «الەۋمەتتىك جەلىدە جاسىل تەحنولوگيالار جانە كۇن ەنەرگياسى جايىندا ءبىر پوست جازىپ, #MyButterflyEffect حەشتەگىن كورسەتۋ قاجەت. ماقسات – جاسىل ەنەرگيا كوزدەرىنىڭ تيىمدىلىگىن پاش ەتۋ. ەڭ اسەرلى پوست جازعان ەكى قازاقستاندىق حالىقارالىق كورمەگە تەگىن قاتىسىپ, قىزىقتاي الادى. بارلىق شىعىندى, ياعني استانا قالاسىنا كەلىپ-قايتۋ جولاقىسىن, ەكسپو-2017 حالىقارالىق كورمەسىنە كىرۋ بيلەتىن مالايزيا وكىلدىگى كوتەرەدى. وعان ەلىمىزدىڭ كەز كەلگەن تۇرعىنى قاتىسا الادى. ولار ءۇشىن بايقاۋ 30 شىلدەدە اياقتالادى».
اتالعان شاراعا مالايزيا ازاماتتارى دا قاتىسا الادى. ولارعا دا قويىلاتىن تالاپتار جوعارىداعىداي. الايدا, مالايزيالىقتار ءۇشىن بايقاۋ 10 شىلدەدە اياقتالادى.
اسحات رايقۇل,
«ەگەمەن قازاقستان»
دەرەك پەن دايەك
● مالايزيا – ەڭ ءىرى ورمان القاپتارى بار ەلدەردىڭ ىشىندە ءبىرىنشى ورىندا.
● نارىقتىق دامۋى جاعىنان الەم ەلدەرىنىڭ قاتارىندا ءتورتىنشى ورىندى ەنشىلەيدى.
● جاسىل ەنەرگەتيكا ءوندىرۋ بويىنشا كوشباسشى سانالادى.
● مالايزيا – دۇنيە جۇزىندەگى فوتوەلەكترلىك مودۋلدەر مەن ۇياشىقتارىن وندىرۋشىلەردىڭ ءبىرى.
● جەر بەتىندەگى ءاربىر فوتوەلەمەنتتىڭ ءتورتىنشىسى وسى مەملەكەتتەن شىعادى.
