ازىرگە وندىرىلگەنى 9 ملن تەڭگە عانا, قالعان قاراجاتقا قاتىستى سوت پروتسەستەرى ءجۇرىپ جاتىر. وبلىستىق ەكولوگيا دەپارتامەنتىنىڭ باسشىسى قابيجان قاپانوۆ وڭىرلىك كوممۋنيكاتسيالار قىزمەتىندە وتكەن بريفينگتە وسىنداي مالىمەتتەردى كەلتىردى. بيىلعى بەس ايدا دەپارتامەنت تاراپىنان 47 تەكسەرۋ جۇرگىزىلگەن. ناتيجەسىندە 128 ەكولوگيالىق زاڭ تالاپتارىن بۇزۋ فاكتىلەرى انىقتالىپتى.
-وتكەن جىلى وبلىستاعى تابيعات پايدالانۋشىلار شارۋاشىلىعىنا 382 تەكسەرۋ جۇرگىزىلدى. 278 بۇزۋشىلىق انىقتالىپ, 48 ملن تەڭگەنى قۇرايتىن 248 اكىمشىلىك ايىپپۇل سالىندى. قورشاعان ورتاعا كەلتىرگەن زالالىن وتەۋ ءۇشىن 135 نۇسقاما بەرىلدى, - دەيدى وبلىستىڭ باس ەكولوگى.
مەملەكەتتىك ەكولوگيالىق باقىلاۋ جۇرگىزۋ ناتيجەسىندە قورشاعان ورتاعا ەميسسيالارعا رۇقسات قۇجاتىنسىز قىزمەتىن جۇرگىزگەن «سابيروۆ ب.», «ەرمەكوۆ ج.» جەكە كاسىپكەرلىكتەرى مەن «جىلىوي سۋ» مكك-ءنىڭ شارۋاشىلىق قىزمەتى سوت شەشىمدەرى نەگىزىندە توقتاتىلعان.
مۇنايلى ايماقتىڭ ەكولوگيالىق احۋالى سىن كوتەرمەيتىنى جايلى بۇعان دەيىن دە ايتىلىپ ءجۇر. اسىرەسە وبلىس ورتالىعىنىڭ تۇرعىندارى اۋاداعى جاعىمسىز يىسكە ءجيى شاعىمدانادى. دەپارتامەنت باسشىسىنىڭ ايتۋىنشا, مەكەمە قىزمەتكەرلەرى اۋا قۇرامىن قولدا بار جابدىقتارمەن باقىلاپ وتىرادى. الايدا, اۋا لاستانعانىن انىقتايتىن تەحنولوگيا جوق. جابدىقتار سوڭعى ءتورت جىلدا جاڭارتىلماعان. قارجى مينيسترلىگى بۇل ماقساتقا قاراجات بولمەي كەلەدى. ەندى عانا وبلىس اكىمدىگى قارجى قاراستىرىپ, تەندەر جاريالادى. سول ارقىلى ەكولوگيا دەپارتامەنتى جىلجىمالى زەرتحانا اشۋدى جوسپارلاپ وتىر. وتكەن جىلدىڭ وزىندە عانا كۇكىرتتى سۋتەگى اتموسفەراعا 81 رەت رۇقسات ەتىلگەن مولشەردەن ارتىق شىعارىلعان. ءوندىرىستى ولكەدەگى ەل ەكونوميكاسىنا ەلەۋلى ۇلەس قوسىپ جۇرگەن ءىرى كاسىپورىنداردىڭ ەكولوگيا ماسەلەسىنە سالعىرت قارايتىنى وكىنىشتى.
باقىتگۇل باباش,
«ەگەمەن قازاقستان»
اتىراۋ
