«الەمنىڭ ەڭ دامىعان ەلدەرىندە (اقش, باتىس ەۋروپا ەلدەرى جانە ەىدۇ ت.ب.) جول-پاترۋلدىك پوليتسياسىنىڭ جۇمىسىندا تاياقشالار قولدانىلمايدى, كولىك قۇرالدارىن توقتاتۋ مەن جول ءجۇرىسىن رەتتەۋدى پوليتسەيلەر قول قيىمىلىمەن جۇزەگە اسىرادى. كورسەتىلگەن ەلدەردە حالىقتىڭ اۆتوموبيلدەنۋ دەڭگەيى قازاقستانداعى دەڭگەيدەن ءبىرشاما ارتىق. سوندىقتان دا ولاردا پوليتسەيلەردىڭ رەتتەۋى مەن ولاردىڭ جول قيمىلدارىن تۇسىنۋدە قانداي دا ءبىر پروبلەمالار تۋىندامايدى. وسىعان بايلانىستى, شەتەلدەردىڭ وزىق تاجىريبەسىن ەسكەرە وتىرىپ, قازاقستان رەسپۋبليكاسىندا قۇرىلىمدىق رەفورمالاردى ىسكە اسىرۋ جونىندەگى 2014-2015 جىلدارعا ارنالعان جول كارتاسى جول-پاترۋلدىك پوليتسياسىنىڭ قىزمەتىن جەتىلدىرۋ, ونىڭ ىشىندە تاياقشالاردىڭ كۇشىن جويۋ بويىنشا بىرقاتار شارالار كوزدەلگەن بولاتىن. جاڭا ەنگىزىلىمدەر پوليتسەيلەردىڭ كولىكتى سەبەپسىز توقتاتۋ سانىن ايتارلىقتاي قىسقارتۋعا جانە جول جۇرىسىنە قاتىسۋشىلارمەن زاڭسىز بايلانىستار سانىن ازايتۋعا مۇمكىندىك بەردى», - دەپ اتاپ وتىلگەن قر پارلامەنتىنىڭ رەسمي سايتىندا جاريالانعان جاۋاپتا.
وسى ورايدا قازىرگى ۋاقىتتا ىشكى ىستەر مينيسترلىگى حالىق اراسىندا قول قيمىلىمەن بەرىلەتىن رەتتەۋشىنىڭ سيگنالدارىنىڭ ماعىناسى تۋرالى قوسىمشا ءتۇسىندىرۋ جۇمىسىن جۇرگىزىپ, سونداي-اق جول-پاترۋلدىك پوليتسياسىنىڭ قىزمەتكەرلەرىمەن جول ءجۇرىسىن قولمەن رەتتەۋ ادىستەرىن جەتىلدىرۋ بويىنشا ساباق جۇرگىزىلىپ جاتقاندىعى اتاپ وتىلگەن.
مۇنىمەن قوسا, جارىق شاعىلىستىراتىن نىساندىق كۇرتەشەلەر مەن قولعاپتاردىڭ جاڭا ۇلگىلەرى بەكىتىلدى, ولارمەن جوسپارلى تارتىپپەن جول-پاترۋلدىك پوليتسياسىنىڭ قىزمەتكەرلەرى جابدىقتالۋدا.
«اتاپ وتىلگەن ماسەلەلەردىڭ نەگىزىندە, جول-پاترۋلدىك پوليتسياسىنىڭ جۇمىسىندا تاياقشالاردى قولدانۋدى ورىنسىز دەپ ۇيعارامىن», - دەپ جاۋاپ قايتارعان ب. ساعىنتاەۆ دەپۋتاتتىق ساۋالعا.
ەستەرىڭىزگە سالا كەتەيىك, 2017 جىلدىڭ 1 قاڭتارىنان باستاپ قازاقستاندىق پوليتسەيلەر الا تاياقتان باس تارتقان بولاتىن. بارلىق جينالعان تاياقشالار بۇگىندە ساقتاۋ قويمالارىنا جىبەرىلدى.
بۇدان بۇرىن بيىلعى مامىردا قر پارلامەنتى ءماجىلىسىنىڭ ءبىر توپ دەپۋتاتى جول-پاترۋلدىك قىزمەتى قىزمەتكەرلەرىنە الا تاياقتاردى پايدالانۋ جاعدايى مەن ءتارتىبىن قايتا قاراۋعا ۇسىنىس بىلدىرگەن بولاتىن.
