2013 جىلى 14 قاڭتاردا العاش رەت پارلامەنت سپيكەرى بولىپ سايلانعان حاليما ياكوب - سينگاپۋرداعى پارلامەنت سپيكەرى بولعان العاشقى ايەل.
"استانا ەكسپو-2017 حالىقارالىق كورمەسىنىڭ اشىلۋىنا كەلۋ مەن ءۇشىن ۇلكەن مارتەبە. ەكسپو كورمەسىن وتكىزۋ - مەملەكەت جەتەكشىلەرىنىڭ ۇلتتىق مادەنيەت پەن يننوۆاتسيانى الەمگە پاش ەتۋگە ۇمتىلىسىنىڭ جارقىن كورىنىسى. پرەزيدەنت نازارباەۆتىڭ دانا باسشىلىعىمەن 2050 جىلعا قاراي وسى ەل دامىعان 30 ەلدىڭ قاتارىنا كىرەتىنىنە سەنىمدىمىن", دەدى پارلامەنت ءتورايىمى.
سونداي-اق حاليما ياكوب كورمەنىڭ يدەياسى رەتىندە "بولاشاق ەنەرگياسى" ءتارىزدى وزەكتى تاقىرىپ تاڭدالعانىن قولدايتىنىن ايتتى. "1991 جىلى قازاقستانعا سينگاپۋر رەسپۋبليكاسىنىڭ ءبىرىنشى پرەمەر-ءمينيسترى لي كۋان يۋ مىرزا كەلدى. سول كەزدەن باستاپ مەملەكەتتەر اراسىندا تىعىز بايلانىس ورناعان. ەكى مەملەكەت ءوزارا ەكونوميكالىق بايلانىستاردى نىعايتۋدا. سونداي-اق سينگاپۋر ءبىلىم مەن مەملەكەت باسقارۋدى دامىتۋ سۇراقتارى بويىنشا قازاقستانمەن سەرىكتەستىكتى ودان ءارى دامىتقىسى كەلەدى", دەدى سينگاپۋر پارلامەنتىنىڭ سپيكەرى.
سينگاپۋر پاۆيلونى التى ايماقتان تۇرادى. ونى مەملەكەتتىڭ جەتەكشى ساۋلەتشىلەرىنىڭ ءبىرى رەندي چەن جاساعان. پاۆيلون قوناقتار نازارىنا ەڭ جاڭا تەحنولوگيالاردى ۇسىنادى. مىسالى, قۋاتتى از تۇتىناتىن ۇيلەر, بيىك عيماراتتارعا تىگىنەن ورىلەتىن جىلىجايلار, سۋ قويمالارىندا قولدانۋعا ارنالعان جۇزەتىن كۇن باتارەيالارى.
گۇلنۇر قۋانىشبەكقىزى,
"ەگەمەن قازاقستان"
سۋرەتتەردى تۇسىرگەن ەرلان وماروۆ,
"ەگەمەن قازاقستان"
