نۇرسۇلتان نازارباەۆ پەن سي تسزينپين قىتاي حالىق رەسپۋبليكاسىنىڭ كورمە پاۆيلونىن ارالاپ كورۋ بارىسىندا «قازاقستان مەن قىتاي – ەۋرازيانىڭ ترانزيتتىك كوپىرى» اتتى تەلەكوپىرگە قاتىستى.
قازاقستان پرەزيدەنتى ءىس-شاراعا قاتىسۋشىلارعا ارنالعان سوزىندە «استانا ەكسپو-2017» حالىقارالىق كورمەسىنە قاتىسقانى ءۇشىن قىتاي تاراپىنا ريزاشىلىعىن ءبىلدىردى.
– قىتايدىڭ «بولاشاقتىڭ ەنەرگياسى, جاسىل جىبەك جولى» اتتى ەكسپوزيتسياسى – ەكسپو كورمەسىندەگى ەڭ ۇلكەن ەكسپوزيتسيانىڭ ءبىرى. قىتاي حالىق رەسپۋبليكاسى قالپىنا كەلتىرىلەتىن ەنەرگيا كوزدەرى سالاسىندا الەمدىك كوشباسشى بولىپ وتىر. ءسىزدىڭ ەلىڭىزدىڭ «ەكسپو-2017» كورمەسىنە قاتىسۋى تەحنولوگيالاردى جانە مادەني بايلانىستاردى دامىتۋعا زور ۇلەس قوساتىنىنا سەنىمدىمىن, – دەدى مەملەكەت باسشىسى.
نۇرسۇلتان نازارباەۆ «قورعاس – ليانيۋنگان» جاڭا كولىك جولىنىڭ ىسكە قوسىلۋىنىڭ ماڭىزدىلىعىن اتاپ ءوتىپ, بۇل جوبانى «جىبەك جولىنىڭ ەكونوميكالىق بەلدەۋى» مەن «نۇرلى جول» باعدارلامالارىن ۇشتاستىرۋداعى ءتيىمدى ىنتىماقتاستىقتىڭ جارقىن مىسالى دەپ اتادى.
– بۇگىن ماڭىزدى ەكى جوبانى ىسكە اسىرۋ باستالدى. ليانيۋنگان پورتىنان ورتالىق ازيا مەن تۇركياعا تەڭىز كونتەينەرلەرىن تيەگەن العاشقى پويىزدار جولعا شىقتى. «قورعاس شىعىس قاقپاسى» ارنايى ەكونوميكالىق ايماعىنىڭ قۇرعاق پورتىنان قىتايدىڭ چەندۋ قالاسىنا جەتكىزەتىن كونتەينەر جولى ىسكە قوسىلدى. 2020 جىلعا قاراي 2 ميلليون كونتەينەر كورسەتكىشىنە قول جەتكىزۋ جوسپارلانىپ وتىر. بۇل ەلدەرىمىزدىڭ ەكونوميكالىق ءوسىپ-وركەندەۋىنە سەپتىگىن تيگىزەدى, – دەدى قازاقستان پرەزيدەنتى.
ءىس-شارا سوڭىندا مەملەكەتتەر باسشىلارى ەۋرازيا كەڭىستىگىندەگى جاڭا كونتەينەرلىك قىزمەت – ليانيۋنگان قازاقستان-قىتاي تەرمينالى مەن «قورعاس – شىعىس قاقپاسى» ارنايى ەكونوميكالىق ايماعى قۇرعاق پورتى جۇمىسىنىڭ باستالۋىنا جول اشىپ بەردى.
