ۇلتتىق بانكتىڭ ورتالىق فيليالىندا (استانا قالاسى) حالىققا ارنالعان تازارتىلعان التىن قۇيمالاردى ساتۋ مەن ساتىپ الۋ باعدارلاماسى تۋرالى بۇقارالىق اقپارات قۇرالدارىنىڭ وكىلدەرىنە باياندالدى. وسى جونىندە اڭگىمە قوزعاعان فيليال ديرەكتورى امىربەك سانكۋباەۆ وسىدان ءبىر اپتا بۇرىن اتالعان باعدارلامانىڭ ىسكە قوسىلعاندىعىن ۇلتتىق بانك باسشىسى دانيار اقىشەۆتىڭ الماتىدا جۋرناليستەر الدىندا مالىمدەگەندىگىن ەسكە سالىپ ءوتتى.
وسى جەردە جۋرناليستەرگە باعدارلاما تۋرالى بەينەروليك پەن تازا التىن قۇيمالاردىڭ ساتۋعا شىعارىلعان ۇلگىلەرى كورسەتىلدى.
«باعدارلامانىڭ ىسكە قوسىلۋى حالىق ءۇشىن قانشالىقتى قىزىقتى جانە بۇل ءىستىڭ قانداي تاۋەكەلدەرى بار دەگەن ماسەلەلەر توڭىرەگىندە سۇراقتار تۋىنداۋدا. وسىعان بايلانىستى ايتارىم, بۇرىن ءبىزدىڭ ەلىمىزدىڭ ادامدارى ءوز قاراجاتتارىن تەڭگە جانە شەتەلدىك ۆاليۋتالار تۇرىندە جيناقتاپ, ساقتاپ كەلگەن بولاتىن. ەندى مىنە, قاراجاتتى جيناقتاپ ساقتاۋدىڭ ءۇشىنشى ءتۇرى رەتىندە حالىققا ارنالعان تازارتىلعان التىن قۇيمالارىن ساتۋ مەن ساتىپ الۋ باعدارلاماسى ىسكە قوسىلىپ وتىر. باعدارلاماعا قاتىساتىن التىن قۇيمالاردى قازاقستان تەڭگە سارايى دايىندادى. ولار حالىققا 10, 20, 50 جانە 100 گرامم بولىپ ءتورت تۇردە ۇسىنىلۋدا. ماسەلەن, 10 گرامدىق قۇيمالار كۇرەڭ قىزىل, 20 گرامدىق – جاسىل, 50 گرامدىق – كوگىلدىر ءتۇستى ارنايى وراۋمەن جانە 100 گرامدىق قۇيمالار – التىن تۇستەس وراۋمەن ۇسىنىلدى. ءاربىر قۇيما قورعانىش ەلەمەنتتەرىمەن (قۇيمالاردىڭ تەگىس بەتى, ميكروماتىن جانە بەدەرلى قىر) جانە قۇيمالاردى مەحانيكالىق ب ۇلىنۋدەن قورعايتىن جانە وراۋدىڭ اشىلعان-اشىلماعانىن وڭاي تەكسەرۋگە مۇمكىندىك بەرەتىن ارنايى وراۋمەن شىعارىلادى. قورعانىش وراۋ دا قۇيمانىڭ ساپا سەرتيفيكاتى بولىپ تابىلادى. سوندىقتان, قۇيمانى ۇقىپتاپ ساقتاۋ جانە وراۋىن اشپاۋ ۇسىنىلادى. التىن قۇيمالار ەكىنشى دەڭگەيدەگى بانكتەر ارقىلى ساتىلاتىن بولادى. التىن قۇيمالاردى ەكىنشى دەڭگەيدەگى بانكتەردىڭ كليەنتكە «كۇنبە كۇن» اقشا تولەۋ ارقىلى كەرى ساتىپ الۋ مۇمكىندىگى ولاردىڭ وتىمدىلىگىن قامتاماسىز ەتۋدىڭ نەگىزگى فاكتورى بولادى», دەدى ءا. سانكۋباەۆ.
سونداي-اق, ول بۇل التىن قۇيمالار شيكىزاتتان باستاپ تولىق تۇردە قازاقستاندا جاسالىنعانىن, ونىڭ بەتىندە ءتورت 9 تسيفرى قۇيمالار ساپاسىنىڭ وتە جوعارى ەكەندىگىن بىلدىرەتىندىگىن اتاپ ءوتتى جانە العاشقى التىن قۇيمالاردى ەلباسىنىڭ ساتىپ العاندىعىن ەسكە سالدى.
«قازىرگى كۇنى التىن قۇيمالار حالىق بانكى مەن ەۋرازيالىق بانك ارقىلى ساۋدالانۋدا. سونىمەن قاتار, ەكىنشى دەڭگەيدەگى باسقا دا بانكتەرمەن التىن قۇيمالارىن ساۋداعا شىعارۋ جونىندە كەلىسسوزدەر جۇرگىزىلۋدە. دەمەك, التىن قۇيمالاردىڭ ساۋدا-ساتتىق اياسى الداعى ۋاقىتتا كەڭەيە تۇسەدى دەگەن ۇمىتتەمىز. ساۋدالاۋ ءىسى قازىرگى كۇنى استانا, الماتى, وسكەمەن, اتىراۋ قالالارىندا جۇرگىزىلۋدە. دەگەنمەن, وسى قالالاردان باسقا ءوڭىر تۇرعىندارىنىڭ ساتىپ الىپ جاتقاندىعىنان حاباردار بولىپ وتىرمىز. ياعني, التىن قۇيمالارعا سۇرانىس بار ەكەندىگى بايقالادى. كوپ كەشىكپەي بۇل ىسكە باسقا قالالار دا قوسىلاتىن بولار», دەدى امىربەك بۋري ۇلى.
سونداي-اق, ول بۇل التىن قۇيمالاردى ساتىپ العان ادام ونى قاراجات جيناعى رەتىندە, كەلەشەك ءۇشىن رەزەرۆ رەتىندە جانە ەكىنشى ءبىر ادامعا ۇسىنۋعا بولاتىن باعالى سىيلىق رەتىندە قاراستىرۋىنا بولاتىندىعىن ايتىپ ءوتتى.
«التىن قۇيمالاردى ساتىپ الۋداعى تاۋەكەل ماسەلەسىنە كەلسەك, التىننىڭ اتى التىن. ول وسى ۋاقىتقا دەيىن ءوز باعاسىن جويعان ەمەس. دەگەنمەن, التىننىڭ باعاسى ءتۇرلى فاكتورلاردىڭ اسەرىمەن الەمدىك بيرجالاردا وزگەرىپ تۇراتىندىعىن دا ەسكە سالامىز. ماسەلەن, حالىقارالىق بيرجادا التىننىڭ 10 گرامىنىڭ باعاسى ۇستىمىزدەگى جىلدىڭ 31 مامىرىندا 126159 تەڭگەنى قۇراسا, ءدال بۇگىنگى, ياعني 7 ماۋسىم كۇنى 129390 تەڭگەگە كوتەرىلىپتى», دەپ التىننىڭ الەمدىك باعاسى جونىندەگى سوڭعى جاڭالىقپەن جۋرناليستەردى حاباردار ەتتى.
مۇنان كەيىن جۋرناليستەرگە ۇلتتىق بانكتىڭ ورتالىق فيليالىنىڭ شاعىن مۇراجايىن ارالاپ كورۋگە ۇسىنىس جاسالدى. مۇراجايدا كەزىندەگى پاتشالىق رەسەيدىڭ اقشا بانكنوتتارىنان باستاپ, كەڭەستىك اقشالار جانە ۇلتتىق ۆاليۋتامىز – تەڭگە بانكنوتتارى, ينۆەستيتسيالىق, كوللەكتسيالىق تەڭگە مونەتالارى قويىلعان ەكەن. مۇندا بانك قىزمەتكەرلەرى جۋرناليستەرگە ولاردىڭ تاريحى مەن شىعارىلۋ جاعدايى جانە وزىندىك ەرەكشەلىكتەرى تۋرالى تۇسىنىكتەمەلەر بەردى.
سۇڭعات ءالىپباي,
«ەگەمەن قازاقستان»
