ءوزىن سانالى تۇردە قۇرباندىققا شالىپ, بىرنەشە ادامنىڭ ءومىرىن ساقتاپ قالعان پوليتسيا قىزمەتكەرلەرىنىڭ ەرلىگىن قوعامعا ۇلگى ەتۋدىڭ وزىندىك ماڭىزى بار. سوندىقتان دا ەرلىگىمەن كورىنە بىلگەن وسىنداي جاندار تۋرالى از-كەم ءسوز قوزعاعاندى دۇرىس كوردىك. جول پوليتسياسى باسقارماسىنىڭ اعا ينسپەكتورى تولەگەن قۇسايىنوۆ 2006 جىلدىڭ 13 ماۋسىمىندا «فولكسۆاگەن» جەڭىل اۆتوكولىگىمەن زەرەندى اۋدانىنىڭ ءتورت اۆتوبۋسقا ءبولىنىپ مىنگەن 120 بالاسىن استانا قالاسىنا ساياحاتقا اپارۋعا شىققان ساپاردا جول اپاتىنا ءتۇستى.
ناقتىراق ايتساق, شورتاندى اۋدانىندا, استانا-پەتروپاۆل تاس جولىنىڭ ون ءۇشىنشى شاقىرىمىندا قارسى جولاققا شىعىپ كەتكەن جولاۋشى تاسىمالداۋشى «گازەل» ميكرواۆتوبۋسى بالالاردىڭ ومىرىنە ۇلكەن قاۋىپ توندىرگەن ەدى. سول كەزدە زىمىراپ كەلىپ قالعان ميكرواۆتوبۋستان جالت بۇرىلماي, بار سوققىنى وزىنە قابىلداعان تولەگەننىڭ جەڭىل اۆتوكولىگى سايعا بارىپ توڭكەرىلىپ قالدى. ال جانتايىپ بارىپ ءبىر جاعىنا اۋدارىلعان شاعىن اۆتوبۋس جولدى كولدەنەڭ جاۋىپ تاستادى. وسىلايشا جول پوليتسياسى باسقارماسىنىڭ اعا ينسپەكتورى تولەگەن قۇسايىنوۆ پەن ونىڭ ارىپتەسى اعا ينسپەكتور قابيدوللا اپەنوۆ اۋىر جاراقاتتانىپ, ءوز ەرلىكتەرىمەن جانە شيراق قيمىلداۋ ارقىلى بالالاردىڭ ومىرىنە تونگەن قاۋىپتىڭ الدىن الدى. ولاردىڭ بۇل ەرلىگى نازاردان تىس قالمادى. ەلباسىنىڭ جارلىعىمەن ەكەۋىنە «ەرلىگى ءۇشىن» مەدالى تابىستالدى.
تاعى ءبىر مىسال. بۇزاقىلار قايدا بولسا دا بار. سونداي كەلەڭسىز جاعدايلاردىڭ ءبىرى اقمولا وبلىسى, تسەلينوگراد اۋدانى, اقمول اۋىلىندا بولدى. كوسموناۆتار كوشەسى بويىندا ءوز اۆتوكولىگىنىڭ قاسىندا ەس-ءتۇسسىز جاتقان پوليتسيا قىزمەتكەرى تابىلعاندىعى بۇعان دەيىن حابارلانعان-دى. جەدەل ىزدەستىرۋ شارالارىنىڭ ارقاسىندا بۇل وقيعاعا قاتىستى ءمان-جايلار انىقتالدى.
تارقاتىپ ايتقاندا, جەڭىس كۇپتەنوۆ جۇمىستان كەيىن ۇيىنە قايتىپ كەلە جاتادى. سول مەزەت ايالدامادا سپيرتتىك ىشىمدىك ءىشىپ وتىرعان ءبىر توپ جاستاردى بايقايدى. داۋرىعىپ, ايالدامانى باستارىنا كوتەرىپ وتىرعان جاستارعا بۇرىلىپ بارىپ, قوعامدىق ورىندا بۇلاي ىستەۋ دۇرىس ەمەستىگىن ەسكەرتكەن. ەسكەرتپەگە الگىلەر شامدانىپ, جابىلا كەتكەن. اۋىر سوققىلاردان كەيىن پوليتسيا لەيتەنانتى جەڭىس جانعابىل ۇلى ەسىن جيماستان سول جەردە باقيلىققا اتتاندى. جارى نۇرگۇل مەن قىزى قاراقات سوڭىنان جىلاپ قالا بەردى. وعان «ەرلىگى ءۇشىن» مەدالى تاعايىندالعانىمەن, وتباسىنا ەشكىم جانە ەشقاشان قايتارا المايدى عوي.
پوليتسيا قىزمەتكەرلەرى قىلمىسپەن كۇرەسىپ, قوعامدىق ءتارتىپتى ساقتاپ عانا قويماي, قاجەت دەسەڭىز وت پەن سۋعا دا ءتۇسىپ جاتادى. وعان دا ناقتى مىسالدار جەتەرلىك. سونداي وقيعانىڭ ءبىرى اقمولا وبلىسى, زەرەندى اۋدانى, قارابۇلاق اۋىلىندا ورىن العان-دى.
2015 جىلدىڭ 10 قىركۇيەگىندە 23 جاستاعى كىشى سەرجانت دانيار امانجول جەكە تۇرعىن ءۇيدىڭ ورتكە ورانعانىن كورەدى. سول مەزەت جەدەل ارەكەتكە كوشىپ, الگى جانىپ جاتقان ءۇيدىڭ تەرەزەسىن شاعىپ, ىشىنەن تىرىدەي ورتەنىپ كەتۋىنە شاق قالعان ءتورت بالانى جانە ولاردىڭ انالارىن امان الىپ شىعادى. مۇنداي جانى جايساڭ ازاماتتارعا قانداي قۇرمەت كورسەتسەڭ دە لايىق.
ءتورت بالا مەن ولاردىڭ اناسىن ءولىم ارانىنان اراشالاپ قالعان اقمولا وبلىسى ءىىد جول-پاترۋلدىك پوليتسياسىنىڭ قىزمەتكەرى دانيارعا تاۋەلسىزدىك مەرەكەسى كۇنى سالتاناتتى جاعدايدا ءىىد باستىعى جايلاۋبەك حالىق ۇلى پرەزيدەنت اتىنان «ەرلىگى ءۇشىن» مەدالىن تابىستادى.
«ازاماتتاردىڭ كونستيتۋتسيالىق قۇقىعىن قورعاۋ, سونداي-اق, قىلمىسپەن كۇرەسۋ ماعان انت ارقىلى سەنىپ تاپسىرىلعان. سوندىقتان دا مەن ءوز قىزمەتتىك بورىشىمدى ادال اتقاردىم دەپ نىق سەنىممەن ايتا الامىن. ەڭ باستىسى – ايەل مەن ونىڭ بالالارى زارداپ شەككەن جوق. سوندىقتان دا مەن ءۇشىن وسىنداي ناگرادانى الۋ ۇلكەن مارتەبە. بۇل بىرىنشىدەن, اقمولا وبلىسىنىڭ بارلىق پوليتسەيلەرىنىڭ جانە مەنىڭ اكە-شەشەمنىڭ ۇلەسى. قازاقستان رەسپۋبليكاسىنا قىزمەت ەتەمىن!», دەيدى دانيار اعىنان جارىلىپ. مىنە, وسىنداي ازاماتتاردىڭ ەرلىكتەرى ارقىلى بۇكىل وبلىستىڭ جۇمىسىنا باعا بەرۋگە دە بولادى. ماقالانى جازۋداعى باستى ماقساتىمىز – پوليتسيا قىزمەتكەرلەرىنىڭ ەرلىك ىستەرىن پاش ەتە وتىرىپ, ولاردىڭ قوعامداعى بەدەلىن كوتەرۋ.
قورىتا ايتقاندا, قازاقستاندا سوڭعى 23 جىلدا 2 مىڭنان استام پوليتسيا قىزمەتكەرى زارداپ شەككەنى بەلگىلى بولىپ وتىر. 1993 جىلدان بەرى 764 پوليتسەي ءوز قىزمەتتەرىن اتقارۋ بارىسىندا قازا تاپقان. وسى كورسەتكىشتەر ارقىلى-اق ءبىز پوليتسيا قىزمەتىنىڭ اۋىر ەكەندىگىن جانە ءوز ومىرلەرىن تاۋەكەلگە بايلايتىندىعىن كورەمىز. ولاردىڭ ەرلىك ىستەرى وسكەلەڭ ۇرپاققا ۇلگى.
اسقار تۇراپباي ۇلى,
«ەگەمەن قازاقستان»
اقمولا وبلىسى
