بۇگىن استانادا «Method Pro» جوباسىنىڭ تۇساۋكەسەر ءراسىمى ءوتتى. «Method Pro» باعدارلامالاۋ مەكتەبىنىڭ بۇل باستاماسى ستۋدەنتتەر ءۇشىن IT سالاسىندا تاجىريبە الماسۋعا تاپتىرمايتىن مۇمكىندىك. ەلىمىزدىڭ ەنوميكاسىن جاڭعىرتۋدى جۇرگىزەتىن وتاندىق كاسىپورىندار مەن كومپانيالارعا قولداۋ كورسەتۋدى ماقسات ەتكەن بۇل جوباعا قازاقستان رەسپۋبليكاسى تۇڭعىش پرەزيدەنتى – ەلباسى قورى قولداۋ كورسەتىپ وتىر.
باعدارلامالاۋ مەكتەبىنىڭ نەگىزىن سالۋشىلاردىڭ ءبىرى سامات ەسقازيەۆتىڭ ايتۋىنشا, ىرىكتەۋ تۋرىنا قازاقستاننان بولەك, قىرعىزستان, رەسەي, تۇركيا, اقش, اۆستراليا سىندى الىس شەتەلدىڭ ستۋدەنتتەرىنەن 8 مىڭ ۇسىنىس كەلىپ تۇسكەن.
– ءبىز بۇعان دەيىن دە ءار ءتۇرلى ستارتاپ جوبالارمەن جۇمىس ىستەگەن ەدىك. شەتەلدەگى وقۋىمىزدى بىتىرگەن سوڭ, باعدارلامالاۋ جوباسىن جاساۋدى ءجون كوردىك. بۇل جوبا تاجىريبەسىز ستۋدەنتتەردىڭ جۇمىسقا ورنالاسۋ ماسەلەسىن رەتتەيدى. ىرىكتەۋ ءۇشىن ارنايى سايت اشتىق. ىرىكتەلگەن 500 وتىنىشتەن 100 ستۋدەنتتى ىرىكتەپ الدىق. قازاقستاندىق كومپانيالاردىڭ اقپاراتتىق-كوممۋنيكاتيۆتىك قىزمەتتەر ءرولىنىڭ نىعايۋىنا وڭ اسەر ەتەدى, – دەيدى سامات ەسقازيەۆ.
ستۋدەنتتەر 12 ماۋسىم مەن 9 شىلدە ارالىعىندا وقۋ-وندىرىستىك تاجىريبەدەن وتەدى. تاماق, جاتىن ورىنمەن قامتىلادى. اقش-تىڭ قازاقستانداعى ەلشىلىگىنىڭ شاقىرتۋىمەن قۇراما شتاتتىڭ IT سالاسىنداعى بىلىكتى ماماندارى ءوز تاجىريبەسىمەن بولىسەدى.
سامات ەسقازيەۆ, داگار داۋلەتوۆ, نۇربولات قوسامعۇلوۆ 2014 جىلى ستۋدەنت بولا ءجۇرىپ, «Method Pro» باعدارلامالاۋ مەكتەبىن قۇرعان. مەكتەپتەن 3 جىل ىشىندە ينفوكوممۋنيكاتسيا تەحنولوگيا سالاسىندا 1200-گە جۋىق ستۋدەنتتەر ءبىلىم العان. جيىندا ءسوز العان «تەحنولوگيالىق دامۋ بويىنشا ۇلتتىق اگەنتتىك», اق باسقارما توراعاسى م. وماروۆ, قازمۋزۋ جوعارعى ەكونوميكا مەكتەبى دەكانى ديلبار گيمرانوۆالار جوبانىڭ ەلەكتروندى جانە ءموبيلدى ۇكىمەتتى ودان ءارى دامىتۋ ارقىلى تسيفرلىق ۇكىمەتتى قۇرۋ ماقساتىندا ىسكە اسىرىلىپ وتىرعان جونىندە ءسوز سويلەدى.
ايا ءومىرتاي,
«ەگەمەن قازاقستان»
