سونداي-اق, سالتاناتتى جيىنعا وبلىس اكىمى ەرلان قوشانوۆ ارنايى قاتىسىپ, بارشا جينالعان قاۋىمدى مەرەيلى مەرەكەمەن قۇتتىقتادى.
- مەملەكەتتىك رامىزدەر – كەز كەلگەن ەلدىڭ ارمانى مەن مۇراتىن ايقىندايتىن ەرەكشە بەلگى. ال, ءبىز ءۇشىن رامىزدەر جاي عانا نىشان ەمەس, وندا اتا-بابالارىمىزدىڭ ازاتتىققا دەگەن ۇمتىلىسى, حالقىمىزدىڭ تاۋەلسىز ەل بولامىن دەگەن تالپىنىسى بار. ەل رامىزدەرى ەڭ الدىمەن ءبىزدىڭ مەملەكەتىمىزدىڭ وتكەنى, بۇگىنى مەن بولاشاعى.
ەلباسى ايتقانداي, ولار تاۋەلسىزدىكتىڭ قاسيەتىن بىرىكتىرۋشى وبرازدار. قازاق حالقىندا, «حالىقتىڭ رۋحىن كورگىڭ كەلسە جەرگىلىكتى تۋىنا قارا, ەلىنىڭ ەلدىگىن كورگىڭ كەلسە ەلتاڭباسىنا زەر سال, ارمان-ماقساتىن كورگىڭ كەلسە ۇرانىن تىڭدا» دەگەن ناقىل بار. مەملەكەتتىڭ باستى نىشاندارىن جۇرەگىنە باسقان ەلدىڭ ەڭسەسى تىك, رۋحى جوعارى بولادى. ەندەشە مەملەكەتتىك رامىزدەردى قۇرمەتتەپ, قاستەرلەي ءبىلۋ ءبىزدىڭ پارىزىمىز, – دەدى وبلىس اكىمى.
ازاتتىقتىڭ اق تۋىن جەلبىرەتىپ, ارايلاپ اتقان بۇگىنگى تاڭعا دا جەتتىك. مۇنىڭ بارلىعى سوناۋ زوبالاڭ جىلدارداعى ەلىم دەپ ەڭىرەگەن, جەرىم دەپ جاعاسى جاۋ قولىندا كەتكەن باتىر بابالارىمىزدىڭ وتانىنا اتىلعان وققا قۇرىش كەۋدەسىن توسقاندىعىنىڭ ارقاسىندا قولجەتكەن جەتىستىكتەرىمىز. قازىر مىنە, قىرانىمىز كوكتە قالىقتاپ, كوك بايراعىمىز كورگەن كوزگە كوزايىم بولىپ تۇرعانى ءمالىم.
ەسكى تاريحتىڭ ەلەۋلى تۇستارى وتە كوپ. شيرەك عاسىر بۇرىن التاي مەن اتىراۋ اراسىنداعى ۇلى دالادا وشكەن وتتى قايتا جاعىپ, تاۋەلسىزدىگىن تۇعىرىنا قوندىرعان قازاقستان 1992 جىلدىڭ 4 ماۋسىمى كۇنى مەملەكەتتىك رامىزدەرىن بەكىتكەن ەدى.
ەندى مىنە سول رامىزدەرىمىزدىڭ بەكىتىلگەنىنە دە شيرەك عاسىر تولىپ وتىر. ەلدىگىمىز ەڭسەلى, تاۋەلسىزدىگىمىز تۇعىرلى بولعاي!
ميراس اسان,
«ەگەمەن قازاقستان»
قاراعاندى وبلىسى
