«ەل ءىشى – ونەر كەنىشى» دەگەن, وبلىس ورتالىعىنان شالعاي تۇراتىن ەڭبەك ادامدارىنىڭ ونەرگە دەگەن تالپىنىسى كورەرمەندى ەرىكسىز تارتادى ەكەن. كوركەمونەرپازداردىڭ جىل سايىن وتەتىن ءداستۇرلى بايگەسى جاڭا ەسىمدەردى انىقتايدى. التىنسارين جانە امانگەلدى اۋداندارىنان كەلگەن گۇلباقىت جاڭبىرباەۆا مەن كىشكەنتاي اياۋلىم اقمىرزا ايتقان «بۇلبۇل» ءانى كورەرمەندەردى سەلت ەتكىزدى. بۇل انگە كوركەمونەرپازدار تۇگەل, كاسىبي انشىلەردىڭ دە ءتىسى باتا بەرمەسى انىق. ال ەكى قىز كلاسسيكالىق ءاندى ەسترادا جانرىندا شىرقاعاندا ونسىز دا بوياۋى ادەمى ءان توتىداي تۇرلەنە ءتۇستى.
«جىل سايىن كوركەمونەرپازدار فەستيۆالىنىڭ اۋداندىق, قالالىق ساتىلارىن وتكىزىپ كەلەمىز. وسىدان ءبىراز جىل بۇرىن فەستيۆالگە نەگىزىنەن ەرەسەكتەر, ۇلكەن كىسىلەر قاتىساتىن. قازىر ەستافەتانى كەيىنگى تولقىن وكىلدەرى العانداي سەزىلەدى, قاي اۋداندا دا, قاي قالادا دا نەگىزىنەن جاستار قاتىسادى. ياعني اۋىلداردا كلۋب جۇمىس ىستەيدى, وعان جاستار بارادى دەگەن ءسوز. سونىڭ ناتيجەسىندە جاڭا ەسىمدەردى اشىپ جاتىرمىز», – دەيدى وبلىستىق مادەنيەت باسقارماسىنىڭ باس مامانى روزا ولجاباەۆا.
حالىقتىڭ رۋحاني قاجەتىن قامتاماسىز ەتۋ ءۇشىن وڭىردە از جۇمىس جاسالىپ جاتقان جوق. كونتسەرتتى تاماشالۋعا كەلگەن وبلىس اكىمى ارحيمەد مۇحامبەتوۆ مادەنيەت سالاسىندا اتقارىلىپ جاتقان جۇمىستاردى ايتا كەلىپ, جەتىستىكتەرگە توقتالدى.
– ەلباسىنىڭ الەۋمەتتىك باعىتتاعى ساياساتىنىڭ ارقاسىندا مادەنيەت سالاسىنا ۇلكەن قولداۋ كورسەتىلەدى, شىعارماشىلىق ادامدارىنا قولايلى جاعداي جاسالادى. وتكەن جىلى مادەنيەت سالاسىنداعى عيماراتتاردىڭ جوندەلۋىنە بيۋدجەتتەن 800 ميلليون تەڭگە جۇمسالدى. وسىدان ءبىر-ەكى جىل بۇرىن قۇسمۇرىن كەنتىندە مادەنيەت ۇيىنە كۇردەلى جوندەۋ جۇمىسى جۇرگىزىلگەن ەدى. بيىل «التىن ميكروفون» حالىقارالىق ءان فەستيۆالىندە قۇسمۇرىندىق جاس ءانشى باس بايگەنى الدى. بىلتىر امانگەلدى اۋدانىندا 12 اۋىلدىق كلۋب جوندەۋدەن ءوتتى. امانگەلدى اۋدانىنىڭ كور-
كەمونەرپازدارى, مىنە, فەستيۆال جەڭىمپازدارىنىڭ قاتارىندا. وبلىستا بۇگىندە 700-دەن اسا مادەنيەت نىسانى جۇمىس ىستەيدى, ولاردىڭ ارقايسىسىندا حالىقتىڭ رۋحاني قاجەتىن وتەيتىن قىزىقتى جوبالار جۇزەگە اسىپ جاتادى, – دەدى ارحيمەد بەگەجان ۇلى.
قورىتىندى كونتسەرت اياسىندا وبلىستىق فەستيۆال جۇلدەگەرلەرى ماراپاتتالدى. ءۇشىنشى ورىندى جىتىقارا مەن اۋليەكول اۋداندارىنىڭ كوركەمونەرپازدارى يەلەنىپ, ارقايسىسى 1 ميلليون تەڭگەنىڭ سەرتيفيكاتىنا يە بولدى. ەكىنشى ورىنعا فەدوروۆ اۋدانىنىڭ ونەر ۇجىمدارى لايىقتالىپ, 1 ميلليون 300 مىڭ تەڭگە السا, ءبىرىنشى ورىندى امانگەلدى اۋدانى قانجىعالادى. ولارعا وبلىس اكىمى ارحيمەد مۇحامبەتوۆ 1 ميلليون 700 مىڭنىڭ سەرتيفيكاتىن تاپسىردى. ال فەستيۆالدىڭ باس جۇلدەسى رۋدنىي قالاسىنىڭ كوركەمونەرپازدارىنا بەرىلدى, ولارعا 2 ميلليون تەڭگە سىيعا تارتىلدى.
– قاي اۋداندا, قالادا مادەنيەت مامانى قالاي جۇمىس ىستەسە, فەستيۆال قورىتىندىسىندا ولاردىڭ ناتيجەسى دە سولاي بولادى. جۇلدەگەر اۋدانداردا مادەنيەت ماماندارى ساحنا مادەنيەتىنىڭ ساقتالۋىنا, جانرلاردى ءار الۋاندىعىنا, شىعارمانىڭ ساۋاتتىلىقپەن ورىندالۋىنا دەيىن ەسكەرىپ وتىرادى. اسىرەسە, باس جۇلدەگە يە بولعان رۋدنىي قالاسىنىڭ ونەرپازدارى ساحنادا وزدەرىن وتە جوعارى دەڭگەيدە ۇستايدى, بارلىق تالاپتارعا ساي جۇمىس ىستەيدى, – دەيدى ءبىزدىڭ سۇراعىمىزعا جاۋاپ بەرگەن روزا ولجاباەۆا.
ءنازيرا جارىمبەتوۆا,
«ەگەمەن قازاقستان»
قوستاناي
