– ولگا, ءسىز ءبىر ەمەس, ءۇش بىردەي وليمپياداعا قاتىستىڭىز. ۇشەۋىندە دە جۇلدەگەر بولدىڭىز. ودان بولەك قانشاما الەم چەمپيوناتتارىنا باردىڭىز. ەل نامىسى سىنعا تۇسكەن دودالاردا سان مارتە كوك تۋىمىزدى جەلبىرەتىپ, ءانۇرانىمىزدى اۋەلەتتىڭىز. ايتىڭىزشى, تۋ كوتەرىلىپ, ءانۇران شىرقالعاندا قانداي كۇيگە بولەنەسىز؟
– كەز كەلگەن سپورتشى ءۇشىن مەملەكەتتىك تۋ مەن ءانۇراننىڭ ورنى بولەك ەكەنى داۋسىز. تۋ مەن ءانۇران عانا ەمەس, جالپى مەملەكەتتىك رامىزدەردىڭ قادىرىن وزگەلەردەن گورى سپورتشىلار قاۋىمى جاقسى بىلەدى دەپ ويلايمىن. ال ەندى مەملەكەتتىك تۋدىڭ كوتەرىلگەن ءساتىن, اسىرەسە, اسپان تۇستەس بايراقتى ءوزىڭ كوتەرىپ, يىعىڭا جامىلعان كەزدەرىڭدى سوزبەن جەتكىزۋ قيىن. مۇنداي كەزدە قارا باسىڭ ءۇشىن عانا شاتتانبايسىڭ, ساعان ءۇمىت ارتقان ارتىڭداعى قارا ورمانداي ەلىڭ ءۇشىن, بايتاق جەرىڭ ءۇشىن ماقتانىپ, ماساتتاناسىڭ. بويىڭدى ەرەكشە قۋانىش سەزىمى بيلەيدى. بيىككە كوتەرىلگەن سايىن, ءاربىر جەتىستىككە جەتكەن سايىن ەلىمىزدىڭ ءوسىپ, وركەندەپ, سپورت سالاسىنىڭ قۇلاشىن كەڭگە جايىپ كەلە جاتقانىنا مارقاياسىڭ.
الەمدىك دەڭگەيدەگى باسەكەلەرگە ەل اتىنان قاتىسۋ قاي كەزدە دە ۇلكەن جاۋاپكەرشىلىك جۇكتەيدى. ەگەر جەرىمىزدە تىنىشتىق بولماسا, حالىقتىڭ ءال-اۋقاتى تومەن بولسا ازيا ويىندارى, وليمپيادا سەكىلدى قۇرلىقتىق, الەمدىك دەڭگەيدەگى اۋقىمدى سپورتتىق جارىستارعا قاتىسار ما ەدىك, قاتىسپاس پا ەدىك. سوندىقتان وسىنداي ءدۇبىرلى دودالاردا باق سىناپ, تۋىمىزدى اسقاقتاتىپ, ءانۇرانىمىزدى اسپانداتۋعا مۇمكىندىك بەرگەنى ءۇشىن, ءتيىستى جاعداي جاساعانى ءۇشىن مەملەكەتىمىزگە العىس ايتامىن.
سپورتشى بولعان سوڭ شەت مەملەكەتتەردە كوپ جۇرەمىز. سوندا شەت ەلدەگى ارىپتەستەرىم ءبىزدىڭ تۋدىڭ تۇسىنە تاڭعالىپ, «سىزدەردىڭ تۋلارىڭىزدىڭ بەزەندىرىلۋى قانداي ادەمى. كوك دەگەن عاجاپ ءتۇس قوي. قىراننىڭ سۋرەتى دە كەرەمەت تاڭدالعان» دەپ وزدەرىنىڭ لەبىزدەرىن بىلدىرەدى. شەتەلدىكتەر ءبىزدىڭ تۋدى باسقا ەلدىڭ تۋلارىنان تەز ايىرادى. بىردەن تانيدى. ولار قازاقستان تۋرالى دا ايتىپ, ءبىزدىڭ ۇستىمىزدەگى تۋ تۇستەس كيىم فورماسىنا قىزىعۋشىلىق ءبىلدىرىپ جاتادى. كەيبىر ەلدەردىڭ تۋى ءبىر-بىرىنە ۇقساپ جاتادى عوي. بىزدىكىن بىردەن تانيسىڭ. كوزىڭە وتتاي باسىلادى. جانە ءبىزدىڭ تۋدىڭ ءمان-ماعىناسى تۋرالى ايتىپ ءتۇسىندىرۋ دە وڭاي.
مەملەكەتتىك تۋ تۋرالى نە ايتۋعا بولادى؟ باسقالاردى بىلمەيمىن, ءوز باسىم تۋعا كوز سالسام ەركىندىكتى سەزىنگەندەي بولامىن. كۇن استىندا قالىقتاعان قىران. اسپان كەڭىستىگى. قانداي عاجاپ! ءوزىڭ دە بايراقتاعى قىرانداي قالىقتاپ, سامعاعىڭ كەلەدى. مەملەكەتتىك ەلتاڭبامىزدىڭ دا ماعىناسى تەرەڭ. ەلتاڭبانى كورگەن ادام ەلىمىزدىڭ تاريحى مەن مادەنيەتىنە تەرەڭ بويلاعانداي بولادى.
– 2012 جىلعى لوندون وليمپياداسىندا ءسىزدىڭ كوك تۋدى جەلبىرەتىپ, اتشاپتىرىم ستاديوندى «الاقايلاپ» اينالا جۇگىرگەنىڭىز ەسىمىزدە. سول ءبىر ءساتتى سانامىزدا تاعى ءبىر مارتە جاڭعىرتۋدىڭ رەتى كەلىپ تۇرعان سەكىلدى.
– ادام دەگەن قىزىق قوي. اۋەلدە جەڭىستىڭ نە ەكەنىن, ونىڭ سالماعىن سەزىنىپ ۇلگەرمەيدى ەكەنسىڭ. ايتەۋىر قۋانىشتان ەت-جۇرەگىم ەلجىرەپ, ارانىڭ ۇياسىنداي گۋىلدەگەن ستاديوندى اينالا جۇگىرگەنىم ءالى ەسىمدە. ارينە, كوز الدىڭداعى مىڭداعان, تەلەديداردىڭ ار جاعىنداعى ميلليونداعان ادامنىڭ الدىندا تۋدى توبەڭنەن اسىرا كوتەرىپ جۇگىرگەن ساتتەگى قۋانىش, شاتتىق سەزىمىن تىلمەن ايتىپ جەتكىزۋ قيىن. مۇنداي ساتتە نە ويلايسىڭ؟ تاعى دا ءانۇرانىمىزدى اۋەلەتىپ, كوك تۋىمىزدى جەلبىرەتىپ, ەلىڭنىڭ الاپاتىن اسىرسام دەپ ويلايسىڭ. 17 ميلليون حالىقتىڭ اتىنان شىعىپ, نامىستى قولدان بەرمەگەنىڭە قۋاناسىڭ. بۇل, ارينە, مەن ءۇشىن زور قۇرمەت, ۇلكەن ماقتانىش. مۇنداي ساتكە جەتۋ ءۇشىن دە ۇزاق جاتتىعاسىڭ, قانشاما ۇيقىسىز تۇندەر مەن كۇلكىسىز كۇندەردى وتكىزەسىڭ. ارينە, ەلدىڭ جانكۇيەرلەرى الدىندا, اتشاپتىرىم ستاديوندا ونەر كورسەتۋ دە وڭاي ەمەس. ەلدىڭ ءبارى ساعان كوز تىگىپ وتىرادى. تولقيسىڭ, قوبالجيسىڭ. جاتتىعۋ جاساعان كەزدە «الداعى بولاتىن جارىستا مەن التىن الامىن, مىنبەدە تۇرامىن, ءانۇران شىرقايمىن, تۋدى كوتەرەمىن» دەپ ەشقاشان ويلامايسىڭ. تەك قانا لايىقتى ونەر كورسەتۋدى ويلايسىڭ. ال ەندى جەڭىسكە جەتىپ, مىنبەگە كوتەرىلگەندە ماقساتىڭنىڭ ورىندالعانىنا, ەڭبەگىڭنىڭ ەش كەتپەگەنىڭە رياسىز قۋاناسىڭ. ارينە, مىنبەدە تۇرىپ ەلىڭنىڭ اتىن اسقاقتاتقانىڭا, وسى ەلدىڭ پەرزەنتى بولعانىڭا شاتتاناسىڭ. قانشاما قيىندىقتان كەيىن توككەن تەرىڭ اقتالىپ, مىنبەدە تۇرعاندا جەڭىلدەپ, يىعىڭنان ۇلكەن جۇك تۇسكەندەي كەرەمەت سەزىمدى باستان كەشەسىڭ.
– وتكەنگە ءسال شەگىنىس جاساساق. ەڭ العاش ءانۇرانىمىزدى شىرقاتىپ, كوك تۋدى جەلبىرەتكەن كەزىڭىز ەسىڭىزدە مە؟
– ارينە, ەسىمدە. 2006 جىلى قاتار استاناسى دوحا قالاسىندا وتكەن ازيا ويىندارىندا جەتى سايىستان ءبىرىنشى ورىن الدىم. بۇل – مەنىڭ حالىقارالىق دەڭگەيدەگى العاشقى جارىسىم بولاتىن. وسى باسەكەدەن كەيىن قانشاما دودالاردا باق سىناپ, ءانۇراندى سان مارتە اۋەلەتتىم.
– مەملەكەتتىك رامىزدەر كۇنىنە وراي جانكۇيەرلەرىڭىزگە قانداي تىلەك ايتار ەدىڭىز؟
– بارشا قازاقستاندىقتارعا ەڭ اۋەلى دەنساۋلىق پەن بەيبىتشىلىك تىلەيمىن. ەلىمىزدە ءاردايىم تۇراقتىلىق پەن تىنىشتىق, ىنتىماق پەن بەرەكە سالتانات قۇرسا ەكەن دەيمىن. بارلىق وتباسىندا مولشىلىق بولىپ, ەل ازاماتتارى ەڭبەگىنىڭ جەمىسىن جەپ, اتقارعان قىزمەتىنىڭ قىزىعىن كورسە ەكەن دەيمىن. ەڭ باستىسى, ەلىمىزدە تىنىشتىق بولسىن! بارلىعىمىز ەلىمىزدىڭ ابىرويىن اسقاقتاتۋ جولىندا جۇمىلا ەڭبەك ەتەيىك.
– اڭگىمەڭىزگە راحمەت.
اڭگىمەلەسكەن
ازامات قاسىم,
«ەگەمەن قازاقستان»
وسكەمەن
