ەۋرازيالىق توپ (ERG) قۇرامىنداعى «قازاقستان ەلەكتروليز زاۋىتى» اق كاسىپورىننىڭ 10-جىلدىعىنا ارنالعان فەستيۆالدا يندۋستريالاندىرۋ تاقىرىبىنا ارنالعان تۋىندىلار, ينستاللياتسيادان تۇراتىن ەكسپوزيتسيا, وندىرىستىك تسەح قابىرعالارىنا سالىنعان كوركەم تۋىندىلار تانىستىرىلدى. ءبىر اي بويعى شىعارماشىلىق جۇمىستىڭ ناتيجەسىندە ۇزدىك اەروگرافيستەر كومانداسى كاسىپورىننىڭ 3 وندىرىستىك تسەح قابىرعالارىنا سالىنعان كوركەم كومپوزيتسيانى ۇسىندى.
.jpg)
اەروگرافيانىڭ كولەمى 1 000 شارشى مەتردى قۇرايدى. سۋرەتشىلەر ءوز تۋىندىلارىن سالۋعا 150 ليتر بوياۋ جۇمساپتى. سۋرەتتەر ماقساتى - كومپانيا جۇمىسىنىڭ نەگىزگى باسىمدىقتارى ساپالى ءونىم شىعارۋ, «جاسىل ءوندىرىستى جاڭعىرتۋ», ۇنەمدى جانە قالدىقسىز ءوندىرىستى ىلگەرىلەتۋ, قاۋىپسىزدىك جانە ەڭبەكتى قورعاۋ, كاسىبيلىك, الەۋمەتتىك جاۋاپكەرشىلىك. وبلىس ورتالىعىنداعى كوركەمسۋرەت كوللەدجىنىڭ ستۋدەنتتەرىنىڭ يندۋستريا تاقىرىبىنا ارناعان وسىنداي شىعارماشىلىق ەڭبەكتەرى ءوز ماقساتتارىنا جەتتى دەگەن ءسوز. كارتينالارى, ينستاللياتسيادان تۇراتىن ەكسپوزيتسيالارىندا يندۋستريا پەيزاجى, كاسىپورىن جۇمىسشىلارىنىڭ كۇندەلىكتى ەڭبەك تىنىسى, «قاناتتى مەتالل» ءوندىرىسىنىڭ تولىق تسيكلى سۋرەتتەلگەن. جاس سۋرەتشىلەر ينستاللياتسيالارىندا بوكسيت, اكتاس, اليۋميني توتىعى, اليۋميني مەن ءتىپتى مەتاللۋرگتەردىڭ جۇمىس قۇرالدارىن دا پايدالانعان.
– جوباعا قاتىسقانىمىزعا وتە قۋانىشتىمىز. ءوندىرىس تاقىرىبىن سۋرەتتەۋ ءۇشىن الدىمەن اليۋميني مەتالىن ءوندىرۋ جايىمەن تانىستىق. زاۋىت ءومىرىن كارتينالارىمىزدا ءوز كورگەنىمىزدەي سۋرەتتەۋگە قول جەتتى,-دەيدى شىعارماشىلىق توپ جەتەكشىسى, كوللەدج وقىتۋشىسى ولگا كەريموۆا.
– ART-كومپوزيتسيا ءبىزدىڭ زاۋىتتا عانا بار,-دەيدى «قازاقستان ەلەكتروليز زاۋىتى» اق-نىڭ پرەزيدەنتى رومان رومانوۆ. – ءوندىرىس ورنى-زامان اعىمىمەن دامىپ كەلە جاتقان جاس كاسىپورىن. زاۋىتتا ەرەكشە, كرەاتيۆتى جاستار جۇمىس ىستەيدى. سوندىقتان زاۋىت زامانعا ساي, مەتاللۋرگيا سالاسىنىڭ يننوۆاتسيالىق كوشباسشىسى بولۋعا ابدەن لايىق دەپ ويلايمىن.
فاريدا بىقاي,
"ەگەمەن قازاقستان"
سۋرەتتەردى تۇسىرگەن ۆيكتوريا ماشكارينا
پاۆلودار
