«ماڭگىلىك ەل» جالپىۇلتتىق يدەياسىن ىسكە اسىرۋ جاعدايىندا رۋحاني-ادامگەرشىلىك, ەستەتيكالىق, پاتريوتتىق تاربيە فاكتورى رەتىندە بالالار مەن جاستاردىڭ ورىنداۋشىلىق شەبەرلىكتەرىن قولداۋ جانە دامىتۋ ماقساتىندا ۇيىمداستىرىلعان شەرۋگە تاراز قالاسى جانە بايزاق, جامبىل, جۋالى, ت.رىسقۇلوۆ, مەركى اۋداندارىنىڭ وقۋشىلارى مەن قوسىمشا ءبىلىم بەرۋ, سونداي-اق ورتا ءبىلىم بەرۋ مەكەمەلەرىنىڭ پەداگوگتەرى, وڭتۇستىك اسكەري وكرۋگ قىزمەتكەرلەرى مەن جەرگىلىكتى جوعارى جانە ورتا ارناۋلى وقۋ ورىندارىنىڭ ستۋدەنتتەرى قاتىستى.
مەرەكەگە وراي ۇيىمداستىرىلعان شەرۋ تاراز قالاسى تولە بي كوشەسىنىڭ بويىمەن «دوستىق» الاڭىنا ءوتتى. بۇدان كەيىن شەرۋگە بارلىعى 2144 ادام مەن قۇرامىندا 100 ادامنان كەم ەمەس 94 شىعارماشىلىق ۇجىم قاتىسىپ, شەرۋ قوراپتارىندا بالالار جانە جاستار مۋزىكالىق انسامبلدەرى, حالىق اسپاپتارى وركەسترلەرى, ۇرمەلى اسپاپتار, ىشەكتى-ىسقىلى اسپاپتار, بارابانشىلار, بيشىلەر, سونداي-اق باسقا دا مۋزىكالىق ۇجىمداردىڭ تۇرلەرىمەن قاتار, ماجورەتكالار مەن چەرليدەرلەر ونەر كورسەتتى.
.jpg)
شەرۋگە قاتىسۋشىلاردىڭ كيىم فورماسى دا بىردەيلەندىرىلىپ, شاعىن فورماداعى ەرەكشە شىعارمالار ورىندالدى. ماسەلەن جينالعان كوپشىلىك موتسارتتىڭ, برامستىڭ, رۋنوۆتىڭ كلاسسيكالىق فورماداعى شىعارمالارىن تىڭدادى. سونداي-اق, لاتيف ءحاميديدىڭ «امانگەلدى مارشى», نۇرعيسا تىلەنديەۆتىڭ «القيسسا», ەسكەندىر حاسانعاليەۆتىڭ «اتامەكەن» تۋىندىلارى دا ورىندالدى. سونىمەن قاتار, زاماناۋي وڭدەۋلەردەگى ۆالستەر, مارشتار مەن پولكالار دا حالىققا جول تارتتى.
وبلىس اكىمى كارىم كوكىرەكباەۆ ورتالىق «دوستىق» الاڭىنا جينالعان جامبىلدىقتاردى 1 ماۋسىم – بالالاردى قورعاۋدىڭ حالىقارالىق كۇنىمەن قۇتتىقتاپ, ءوزىنىڭ يگى تىلەگىن جەتكىزدى. ءوز كەزەگىندە شەرۋگە قاتىسۋشىلار قوراپ ىشىندەگى مۋزىكالىق ءانسامبلدىڭ ورىنداعان مۋزىكاسىنا سايكەس ۇيلەسىمدى تۇردە بي بيلەپ, ءان ايتىپ, بىردەي قيمىلداۋ ارقىلى كوپشىلىككە جاقسى اسەر قالدىردى. ال شەرۋ «دوستىق» الاڭىندا بارلىق ءبىلىم بەرۋ مەكەمەلەرىنىڭ سالتاناتتى دەفيلەسىمەن اياقتالدى.
.jpg)
حاميت ەسامان,
«ەگەمەن قازاقستان»
جامبىل وبلىسى
