اۋداندار مەن قالالاردان بالالارى جانە نەمەرەلەرىمەن قول ۇستاسىپ ساحناعا شىققان وتباسىلارى بەينەتتىڭ سوڭىندا زەينەتى بولاتىنىن, باق پەن بەرەكە اقىل مەن ءتوزىم, سىيلاستىق, ماحاببات پەن سۇيىسپەنشىلىك, مەيىرىم جۇرگەن جەرگە قوناقتايتىنىن ايتىپ تۇرعانداي بولادى.
وسى ۋاقىتقا دەيىن «مەرەيلى وتباسى» ۇلتتىق بايقاۋى رەسپۋبليكا بويىنشا ءتورتىنشى رەت وتكىزىلدى, ونىڭ اۋداندىق, قالالىق, وبلىستىق جانە رەسپۋبليكالىق ساتىلارىنا قوستاناي وبلىسىنان 400-دەن اسا وتباسى قاتىستى. بيىل دا «مەرەيلى وتباسى» بايقاۋلارى ساتىلاي ءوتىپ, ىرىكتەلگەندەر وبلىستىق سىنعا قاتىستى.
بۇل جولى بايقاۋدىڭ «پاراساتتى وتباسى» اتالىمىمەن دەنيسوۆ اۋدانىنداعى ايات اۋىلىندا تۇراتىن ماقاەۆتار وتباسى يە بولدى. عالام اتاي مەن قارلىعا اجەي ون ءبىر بالا تاربيەلەپ وسىرگەن. بارلىعى دا ەڭبەكتە, ومىردەن ورىندارىن تاپقان, بالالى-شاعالى. وتباسىنىڭ ورتاق يىگىلىگىنە اينالعان شارۋا قوجالىعىن عالام اتايدىڭ ءوزى باسقارادى.
– كوپ بالالى وتباسىنىڭ قۋانىشى كوپ, قيىندىعى جوق, ويتكەنى بىرلەسىپ كوتەرگەننەن, بىرلىك بولعاننان كەيىن اۋىرلىق ەشقاشان بىلىنبەيدى, – دەيدى عالام اتاي.
«ونەگەلى وتباسى» اتالىمىمەن سارىكول اۋدانىندا تۇراتىن ميشەنكوۆتار وتباسى لايىق دەپ تانىلدى. يۋري مەن ەكاتەرينا التى بالا تاربيەلەپ وتىر. وتاعاسى دا, وتاناسى دا «امانجول-اگرو» شارۋاشىلىعىندا جۇمىس ىستەيدى, التىن استىق وندىرەدى. بالالارى شەتىنەن جاقسى وقيدى, ءتارتىپتى, ۇلگىلى. كىشكەنتاي ميشەنكوۆتار سپورتپەن اينالىسادى, مۋزىكا مەكتەبىنە بارادى. گىر كوتەرۋمەن اينالىساتىن ۇلى ۆاسيلي اۋدان, وبلىس قانا ەمەس, ەل نامىسىن ءدۇلدۇلدى جارىستاردا قورعاپ ءجۇر. وتكەن جىلى ەۋروپا چەمپيوناتىنا قاتىسىپ, كۇمىس مەدال الىپ قايتتى.
– بالانى ەڭبەككە, ادامگەرشىلىككە, ادالدىققا باۋليمىز, ءوزىمىز ۇلگى بولۋعا تىرىسامىز. ۇلكەن قىزىم انيا يۋري ەكەۋمىزدىڭ كومەكشىمىز, اكەسى ەكەۋمىز كۇنىمەن جۇمىستامىز, بالالارعا, ۇيگە قارايدى. ءىنى-سىڭىلىلەرى ايتقانىمەن جۇرەدى, تىڭدايدى, – دەيدى «كۇمىس القالى» انا ەكاتەرينا.
«مەرەيلى وتباسى» اتالىمىمەن بايقاۋداعى امانگەلدى اۋدانى, قاراسۋ اۋىلىندا تۇراتىن مۇزداحانوۆتار وتباسى لايىق دەپ شەشىلدى. بۇل كوپ بالالى عانا ەمەس, اتى قوستاناي-تورعاي وڭىرىنەن اسىپ, رەسپۋبليكاعا بەلگىلى ونەرلى وتباسى سانالادى. ايتباي مەن حانزادا مۇزداحانوۆتار 4 بالا تاربيەلەگەن, نەمەرەلەر ءوسىپ جاتىر. ايتباي اعانىڭ 1977 جىلى 36 جاسىندا وندىرىستىك جاراقاتتان ءبىر قولىن كەسۋگە تۋرا كەلدى. قيىندىقتار بولماي قالعان جوق. ونەر دارىعان جىگەرلى كىسى 9 جىلدان كەيىن كەسىلگەن قولىنا سىم جالعاپ, قاسيەتتى دومبىراسىن قايتادان ۇستادى. قازىر 60 كۇيدىڭ, 40 ءاننىڭ اۆتورى. قازاقستانعا ەڭبەك سىڭىرگەن مادەنيەت قايراتكەرى, امانگەلدى اۋدانىنىڭ قۇرمەتتى ازاماتى. مۇزداحانوۆتار بالالارىن, نەمەرەلەرىن مۋزىكاعا باۋلىدى. ال اكەنىڭ ونەر جولىن قىزى انار جالعادى. ول قازىر استانا قالالىق اكادەميالىق فيلارمونياسىنىڭ بەلدى كۇيشىسى. ايتباي اعا حانزادا ەكەۋى 55 جىل وتاسىپ, 15 نەمەرە, 5 شوبەرە ءسۇيىپ وتىر.
– قانداي قيىنشىلىق كورسەڭ دە, وتباسىنداعى سىيلاستىقتى ساقتاۋعا تىرىسۋ كەرەك, – دەيدى حانزادا اپاي.
– جىگەر, وتباسىنا دەگەن ادالدىق, ەلگە دەگەن سۇيىسپەنشىلىك كەرەك, – دەپ تولىقتىردى ايتباي اعاي.
ۇلتتىق بايقاۋدا «پاراساتتى وتباسى» مەن «ونەگەلى وتباسى» اتالىمدارىنا 150 مىڭنىڭ, ال «مەرەيلى وتباسى» اتالىمىنا يە بولعان مۇزداحانوۆتارعا 300 مىڭ تەڭگەنىڭ سەرتيفيكاتى تاپسىرىلدى. جەڭىمپاز وتباسى ماۋسىم ايىندا استانادا وتەتىن رەسپۋبليكالىق «مەرەيلى وتباسى» بايقاۋىنا قاتىسادى.
ءنازيرا جارىمبەتوۆا,
«ەگەمەن قازاقستان»
قوستاناي وبلىسى
