وسى ورايدا, ۇلتتىق سپورت تۇرلەرى قاۋىمداستىعىنىڭ اتسالىسۋىمەن حالىقارالىق كورمە اياسىندا حالقىمىزدىڭ ەتنوستىق ەرەكشەلىكتەرىن ناسيحاتتايتىن ۇلتتىق سپورت تۇرلەرىنەن ماڭىزدى جارىستار وتكىزۋ جوسپارلانىپ وتىر, دەپ حابارلادى ۇستق ءباسپاسوز قىزمەتى.
وسىنداعى كورمە ءسانىن كەلتىرەتىن ءدۇبىرلى باسەكەلەردىڭ ءبىرى – قازاقستان رەسپۋبليكاسىنىڭ پرەزيدەنتى ن.نازارباەۆتىڭ جۇلدەسىنە ارنالعان بايگە تۇرلەرىنەن ەكسپو-2017 كۋبوگىنىڭ ءوتۋى. الداعى 10 ماۋسىمدا اشىلۋ سالتاناتى جوسپارلانىپ وتىرعان كورمەنىڭ كەلەسى كۇنى, ياعني 11 ماۋسىمدا ەلورداداعى «قازانات» اتشابارىندا اتالعان جارىس جالاۋىن كوتەرەدى.
العاشقى بولىپ 25 شاقىرىمدىق قاشىقتىققا اۋىزدىعىمەن الىسقان الامان بايگەنىڭ سايگ ۇلىكتەرى جىبەرىلەدى دەپ كۇتىلۋدە. ودان كەيىن 2,4 جانە 1,8 شاقىرىمعا شاباتىن ۇشقىر جۇيرىكتەردىڭ ارىنى انىقتالادى. كەلەسى كەزەكتە 15 شاقىرىمدىق توپ بايگە تۇلپارلارى سىنعا تۇسسە, ىلە-شالا 7 شاقىرىمدىق قۇنان بايگەنىڭ ءباسى قىزادى. سوڭىندا كورەرمەن قاۋىم تايپالعان جورعالار جارىسىن تاماشالاي الادى.
– تەك بۇل جارىستارمەن شەكتەلىپ قالمايمىز, – دەيدى ۇلتتىق سپورت تۇرلەرى قاۋىمداستىعىنىڭ ءبىرىنشى ۆيتسە-پرەزيدەنتى ەرلەن وسپانوۆ. – جوعارىداعى جارىس تۇرلەرىنىڭ جالعاسى رەتىندە تامىز ايىنىڭ 11-13-ءى كۇندەرى جامبى اتۋدان «التىن جەبە» اتتى حالىقارالىق ءتۋرنيرى وتەدى. وعان كەمىندە 20 مەملەكەتتەن ساداقشىلار شاقىرىلىپ وتىر. بۇلاردىڭ ءبارى جامبى اتۋدى ءبىز بەكىتكەن ەرەجە بويىنشا ورىندايدى. ياعني, الەم مەرگەندەرى قازاقتىڭ بايىرعى جاۋىنگەرلىك ونەرىمەن تانىسىپ, ات ۇستىندە شاۋىپ كەلە جاتىپ نىسانا كوزدەيدى.
– ەرلەن ءابىلحان ۇلى, بۇل جاقسى جاڭالىق ەكەن. جوعارىداعى ەكسپو-2017 كورمەسى قىركۇيەك ايىنا دەيىن جالعاسادى ەمەس پە؟ باسقا قانداي جوسپارلارىڭىز بار؟
– جوسپار كوپ. اتاپ ايتار بولساق, تامىز ايىنىڭ 16-18 كۇندەرى استانا قالاسىندا اۋدارىسپاقتان الەم كۋبوگى جولىنداعى حالىقارالىق تاعى ءبىر جارىس وتەدى. تامىز ايىنىڭ 20-28-ءى ارالىعىندا كوكپاردان الەم چەمپيوناتىن وتكىزۋ جايلى شەشىم قابىلداندى. بۇدان باسقا قىركۇيەك ايىنىڭ باسىندا ەلوردادا توعىزقۇمالىقتان الەم بىرىنشىلىگى وتەدى.
– جوعارىداعى جارىستاردى وتكىزۋ جانە ۇيىمداستىرۋ ىسىنە سىزدەردەن باسقا جاۋاپتى قانداي مەكەمە-ۇيىمدار بار؟
– حالىقارالىق كورمە اياسىندا وتەتىن جوسپارلى جارىستارعا مادەنيەت جانە سپورت مينيسترلىگى وتە ۇلكەن قولداۋ كورسەتىپ وتىر. ال ۇلتتىق سايىس بارىسىن جاڭادان قۇرىلعان تۇركى حالىقتارىنىڭ ءداستۇرلى سپورت تۇرلەرى قاۋىمداستىعى قاداعالايدى.
– سوڭعى جىلدارى ءداستۇرلى وتكىزىلىپ كەلە جاتقان «التىن تۇلپار» الامان بايگەسىن بيىل قاي ۋاقىتقا جوسپارلاپ وتىرسىزدار؟
– بيىل ءتورتىنشى مارتە ۇيىمداستىرىلاتىن 51 شاقىرىمدىق «التىن تۇلپار» الامان بايگەسىن وتكىزۋدى 3 قىركۇيەككە جوسپارلاپ قويدىق.
بەكەن قايرات ۇلى,
«ەگەمەن قازاقستان»
