الەمنىڭ ەڭ وزىق شوگەنشىلەرى باس قوسقان باسەكەدە «Astana Polo Club» كومانداسى «Munchin Gold Cup 2017» جۇيەسى بويىنشا سىنعا ءتۇسىپ, نيدەرلاند, شۆەيتساريا جانە گەرمانيا سەكىلدى الپاۋىت ەلدەردى ارتتا قالدىرىپ جەڭىس تۇعىرىنان كورىندى.
ال «Almaty Polo Club» كومانداسى «Munchin Gold Cup» سايىسىندا نيدەرلاند, شۆەيتساريا, سونداي-اق, جارىس يەلەرى گەرمانيالىقتاردى شاڭ قاپتىرىپ, جارىس جولىندا دارا شىقتى.
«بىزگە بۇل جەڭىس وڭايلىقپەن كەلگەن جوق. قارسىلاستارىمىز وتە مىقتى شوگەنشىلەر. ەۋروپا ەلدەرىندە بۇل سپورت ءتۇرى اسا تانىمال ويىن, بىراق ءبىز دە دەس بەرمەيمىز», دەيدى «Almaty Polo Club» كومانداسىنىڭ كاپيتانى قۋانىش مۇسابەكوۆ.
«بۇل ءبىزدىڭ حالىقارالىق ارەناداعى ءبىرىنشى جەڭىسىمىز ەمەس. ماسەلەن, «Astana Polo Club» كومانداسى 2016 جىلى ارگەنتينانىڭ لۋحان قالاسىندا وتكەن حالىقارالىق تۋرنيردەن I ورىنمەن ورالعان بولاتىن. سونداي-اق, 2017 جىلى ارگەنتيناداعى «Santa Catalina Summer Cup» جانە «Torneo Summer Polo Match» حالىقارالىق تۋرنيرلەردە ءبىزدىڭ كوماندالار شەتەلدىك شوگەنشىلەردى باسىپ وزىپ, I ورىننان كورىندى. بيىل ءوز ەلىمىزدە وتكەن «Almaty Snow Polo Cup» حالىقارالىق دوداسىندا دا I ورىن وزىمىزگە بۇيىردى. ال 2017 جىلى ارگەنتينانىڭ لۋحان قالاسىنداعى حالىقارالىق سايىستا «Almaty Polo Club» ءبىرىنشى ورىنعا شىعىپ, ەڭ ۇزدىك كوماندالاردىڭ قاتارىنا قوسىلدى. مىنە, ميۋنحەندەگى جەڭىس تە ءبىزدىڭ ەنشىمىزدە», دەيدى حالىقارالىق شوگەن فەدەراتسياسىنىڭ ءبىرىنشى ۆيتسە-پرەزيدەنتى سارسەن قۇرانبەك.
الەمدىك ارەنادا ەل مەرەيىن ۇستەم ەتكەن شوگەنشى جىگىتتەردى ءبىز دە قۇتتىقتاپ, جەڭىستى جولدىڭ جالعانا بەرۋىن تىلەيمىز.
ارمان وكتيابر,
«ەگەمەن قازاقستان»
