نازارباەۆ ۋنيۆەرسيتەت قازاقستاننىڭ جوعارى ءبىلىم بەرۋ سالاسى ءۇشىن مەملەكەتكە جوعارى ءبىلىم بەرۋ سالاسىندا قازىرگى ينس-
تيتۋتتاردى رەفورمالاۋعا جانە جاڭاسىن قۇرۋعا مۇمكىندىك بەرەتىن ەكسپەريمەنتالدى الاڭ. ستراتەگيالىق مىندەتتەردى ىسكە اسىرۋداعى وسىنداي ەرەكشە ءرول نازارباەۆ ۋنيۆەرسيتەتتىڭ اكادەميالىق ەركىندىك, دەربەستىك, ءبىلىم بەرۋدى, عىلىم مەن ءوندىرىستى ينتەگراتسيالاۋ, حالىقارالىق ىنتىماقتاستىق سياقتى نەگىزگى قاعيداتتارىنىڭ ارقاسىندا مۇمكىن بولىپ وتىر. ساراپشىلاردىڭ پىكىرى بويىنشا, ۋنيۆەرسيتەت الداعى ۋاقىتتا ءبىلىم بەرۋدىڭ ۇلتتىق جۇيەسىنىڭ ارتىقشىلىقتارى مەن تاڭداۋلى الەمدىك عىلىمي-ءبىلىم بەرۋ پراكتيكاسىن وڭتايلى ۇيلەستىرەتىن قازاقستاننىڭ ۇلتتىق برەندى بولۋى ءتيىس.
تاجىريبەنى تاراتۋ – تۇراقتى پروتسەسس. الايدا, ماماندار مەن پىكىردىڭ بارىنشا شوعىرلانۋى ءارتۇرلى فورۋمدار مەن كونفەرەنتسيالارداعى تىڭ تۇجىرىمداردان بايقالادى. سونىڭ ىشىندەگى اسا ماڭىزدىسى, التى جىلدان بەرى نازارباەۆ ۋنيۆەرسيتەت باستاماشىسى ءارى يدەيالىق دەم بەرۋشىسى بولىپ تابىلاتىن جوعارى ءبىلىم بەرۋ كوشباسشىلارىنىڭ ەۋرازيالىق فورۋمى.
بيىلعى فورۋم 31 مامىردا وتەدى. ءبىلىم بەرۋ مەنەدجمەنتىنە ارنالعان ەكى كۇندىك پىكىرسايىسقا قازاقستاننىڭ جەكە جانە مەملەكەتتىك جوعارى وقۋ ورىندارىنىڭ باسشىلارى, وقىتۋشىلار مەن ستۋدەنتتەر, عىلىمي قىزمەتكەرلەر, مەملەكەتتىك ورگانداردىڭ, جۇمىس بەرۋشى كومپانيالاردىڭ, ءبىلىم بەرۋ سالاسىنداعى قاۋىمداستىقتار مەن بىرلەستىكتەردىڭ وكىلدەرى جانە ءوز يدەياسىمەن, بىلىمىمەن جانە تاجىريبەسىمەن بولىسكىسى كەلەتىندەر قاتىسادى. سونداي-اق, ءبىلىم بەرۋ, مەنەدجمەنت جانە ەكونوميكا سالاسىنىڭ حالىقارالىق ساراپشىلارى وي بولىسكەن.
– تاجىريبەنى تاراتۋ – نازارباەۆ ۋنيۆەرسيتەتتىڭ بەس ستراتەگيالىق ماقساتىنىڭ ءبىرى, – دەيدى ءبىلىم ورداسىنداعى تاجىريبەنى تاراتۋ جونىندەگى ۇيلەستىرۋشى ءمادينا ايتاقانوۆا. – ءبىز ءوز تاجىريبەمىزدى ورتاعا سالامىز, باسقا جوعارى وقۋ ورىندارى وزدەرىنىڭ جەتىستىكتەرىمەن بولىسەدى. ۋنيۆەرسيتەتىمىز شاڭىراق كوتەرگەلى كوپ بولا قويعان جوق. ءبىز ۇيرەنۋ مەن دامۋ ۇستىندەمىز. 2012 جىلى ءبىرىنشى ەۋرازيالىق فورۋمدا ءبىزدىڭ ماماندارىمىز ۋنيۆەرسيتەت بولىمشەلەرىنىڭ قىزمەتى تۋرالى تانىستىرىلىم جاساعان بولاتىن. بۇل سودان بەرى داستۇرگە اينالدى.
ستۋدەنتتەر تۋرالى بارلىق دەرەكتەر ساقتالاتىن رەگيستراتور ءوفيسىنىڭ, ۋنيۆەرسيتەتتەگى ەكىنشى ورىندا تۇرعان عىلىمي جانە زەرتتەۋ قىزمەتى ءۇشىن جاۋاپتى پروۆوست ءوفيسىنىڭ جۇمىسى ءاردايىم ۇلكەن قىزىعۋشىلىق تۋعىزىپ كەلەدى. تاعى دا ءبىر بولىمشە, ستۋدەنتتەردىڭ مانساپ جانە كاسىبي باعدارلاۋ ورتالىعىنىڭ اتى دا, زاتى دا ادەتتەگىدەن ەرەكشە دەسە بولعانداي. ول تۇلەكتەرگە الداعى قىزمەتىن جوسپارلاۋعا, ءبىلىم الۋىن جالعاستىرۋعا, كاسىبي داعدىسىن دامىتۋعا كەشەندى قولداۋ كورسەتەدى. وسىلايشا, زاماناۋي باسەكەلى ەڭبەك نارىعىندا, ونىڭ ىشىندە جاھاندىق نارىقتا, جۇمىسقا ورنالاسۋعا جول اشادى.
كرەاتيۆتى جۇمىس تاجىريبەسىمەن ۋنيۆەرسيتەتتىڭ ستۋدەنتتىك ىستەر بويىنشا ەنتۋزياستتار كومانداسى بولىسە الادى. نازارباەۆ ۋنيۆەرسيتەتتىڭ ماقتانىشى – بىرەگەي كىتاپحانا. ول الەمدەگى جەتەكشى اقپاراتتى وندىرۋشىلەردىڭ عىلىمي دەرەكتەرىنە نەگىزدەلگەن. سونىمەن قاتار, ەلەكتروندى كىتاپتار جانە وقۋلىقتاردى «ماڭگىلىك پايدالانۋعا» ساتىپ الادى. وقۋ پروتسەسىن بىرىكتىرۋ ماقساتىندا الەمنىڭ جەتەكشى ۋنيۆەرسيتەتتەرى تاراپىنان ۇسىناتىن ەلەكتروندىق وقۋ ماتەريالدارى مەن وقۋ كۋرستارى دا مولىنان جيناقتالعان. كىتاپحانانىڭ ماتەريالدىق قورىنا كەلسەك, 150 مىڭنان استام باسپا باسىلىمدارى, ونىڭ ىشىندە 80 پايىزدان استامى اعىلشىن, 2700 اۋديو- جانە بەينە ماتەريالدارىنان, ميكروفيشتار كوللەكتسياسىنان تۇرادى.
– ءبىز تاقىرىپتار بويىنشا سۇرانىستى قامتاماسىز ەتىپ, بار مۇمكىندىكتى جەتكىزۋگە تىرىسامىز. ويتكەنى, ءبىز العا ۇمتىلىپ, دامۋ ۇستىندە كەلە جاتىرمىز. جىل سايىن تىڭداۋشىلار سانى وسە تۇسۋدە. ال تاجىريبە الماسۋ ىسىندە قارجىلىق جاعىنان ىنتالاندىرۋ دا جاقسى ۇيىمداستىرىلعان. نازارباەۆ ۋنيۆەرسيتەتتىڭ مارتەبەسى ەرەكشە – دەربەستىك جانە اكادەميالىق ەركىندىككە نەگىزدەلگەن. بۇل بىزگە ءبىلىم جانە عىلىم مينيسترلىگىنىڭ شەڭبەرىندە قالىپ قويماي, ءوز باعدارلامامىزدى ازىرلەۋ جانە بەكىتۋ قۇقىعىن بەرەدى. الايدا, بۇل رەتتە ءبىز باعدارلامالىق جانە ينستيتۋتسيونالدىق اككرەديتاتسيا الۋ ءۇشىن اكادەميالىق ساپا تالاپتارىن ساقتاۋعا ءتيىستىمىز. بۇدان باسقا بولون پروتسەسىنىڭ قاعيدالارىن دا ۇستانامىز. تۇتاستاي العاندا, جەتەكشى ۋنيۆەرسيتەتتەرمەن ارىپتەستىك مودەلىمىز تاڭداۋلى الەمدىك تاجىريبەنى تىكەلەي زەردەلەۋ, ونى وزىمىزگە بەيىمدەۋ جانە ودان كەيىن قازاقستاندىق جوعارى وقۋ ورىندارىنا ۇسىنۋ ءمۇم-
كىندىگىن بەرەدى, – دەيدى ءمادينا ايتاقانوۆا.
سۇلەيمەن مامەت,
«ەگەمەن قازاقستان»
