كوجەكباەۆتار اۋلەتىنىڭ اقساقالى 105 جاستاعى قاريا كۇرىشبەك كوجەكباەۆ پەن جاراسوۆتار وتباسىنىڭ وتاعاسى ماقسىمجان جاراسوۆ ماراپاتتارىن وبلىس اكىمىنىڭ ورىنباسارى جاقسىلىق وماردىڭ قولىنان الدى.
وبلىستىق بايقاۋدىڭ سالتاناتتى جيىنىندا وبلىس اكىمىنىڭ ورىنباسارى جاقسىلىق ومار قۇتتىقتاۋ ءسوز سويلەدى.
– ءوز مارەسىنە جەتىپ وتىرعان «مەرەيلى وتباسى» بايقاۋىنىڭ وبلىستىق كەزەڭى قۇتتى بولسىن! ەل ىرگەسىنىڭ بەرىك ۇستىنى سانالار ءاربىر شاڭىراققا بەرەكە-بىرلىك, باقىت پەن شاتتىق تىلەيمىن! ەلباسىمىز نۇرسۇلتان ءابىش ۇلى نازارباەۆتىڭ باستاماسىمەن قولعا الىنىپ وتىرعان بايقاۋدىڭ ماقساتى – وتباسىلىق قۇندىلىقتاردى نىعايتۋ, تاتۋ-ءتاتتى, تاربيەلى شاڭىراق مۇشەلەرىن كوپشىلىككە تانىستىرۋ. ەل ىشىندە اۋىلداستارىنىڭ قۇرمەتىنە بولەنگەن, ارداقتى, بەرەكەلى اۋلەتتەر, ونەگەسى مول وتباسىلار بارشىلىق. سوندىقتان جىل وتكەن سايىن «مەرەيلى وتباسى» بايقاۋىنىڭ ءمانى ارتىپ, قاتىسقىسى كەلەتىندەردىڭ قاتارى ۇلعايىپ كەلەدى. مەرەيلى وتباسىلاردى ۇلگى-ونەگە ەتۋ ارقىلى وسكەلەڭ ۇرپاقتى ىزگىلىككە تاربيەلەي الامىز. بۇگىنگى بايقاۋ جەڭىمپازدارىن شىن جۇرەكتەن قۇتتىقتايمىن! – دەي كەلە ج. ومار جۇلدەگەرلەردى ماراپاتتاپ, سىي-سياپاتتار تاپسىردى.
I دارەجەلى ديپلوممەن ەكى وتباسى – جامبىل اۋدانىنان كەلگەن جاراسوۆتار مەن ۇيعىر اۋدانىنىڭ تۇرعىندارى كوجەكباەۆتار وتباسى ماراپاتتالدى.
جاراسوۆتار وتباسى – «جاسىل ەل» مەملەكەتتىك باعدارلاماسىن جۇزەگە اسىرۋعا اۋقىمدى ۇلەس قوسقان اۋلەت. وتاعاسى ماقسىمجان جاراسوۆ ميلليوننان استام اعاش وتىرعىزعان. مەملەكەت باسشىسىنىڭ جارلىعىمەن «قۇرمەت» وردەنىن يەلەنىپ, «ەكولوگيا سالاسىنىڭ ۇزدىگى» توسبەلگىسىن العان. 8 بالانى اياقتاندىرىپ, 40 نەمەرە, 21 شوبەرە كورىپ وتىر. كوجەكباەۆتار وتباسىنىڭ دا ۇلگىسى ەرەن. كۇرىشبەك كوجەكباەۆ – ۇلى وتان سوعىسىنىڭ ارداگەرى, سوعىستان كەيىن دە ەلدىڭ الەۋمەتتىك-ەكونوميكالىق دامۋىنا زور ۇلەس قوستى. بىرنەشە مەملەكەتتىك ناگرادالارعا يە بولعان, سونىڭ ىشىندە «قۇرمەت» وردەنى دە بار. قازىرگى كەزدە 105 جاستاعى ارداگەر 4 بالادان 25 نەمەرە, 30 شوبەرە, 15 شوپشەك ءسۇيىپ وتىر.
ەكى وتباسى دا ەلوردادا وتەتىن رەسپۋبليكالىق بايقاۋدا باق سىناپ, وبلىستىڭ نامىسىن قورعايتىن بولادى.
ەكىنشى ورىندى ۇيعىر اۋدانىنىڭ تۇرعىندارى حامراەۆتار وتباسى مەن تالدىقورعاندىق مىرزاتاەۆتار جانە ەسكەلدى اۋدانىنان تايجانوۆتار يەلەنىپ, 300 مىڭ تەڭگەنىڭ سەرتيفيكاتىن الدى. ءۇشىنشى ورىنعا لايىق دەپ تانىلعان الاكولدىك قوجابەكوۆتەر وتباسى, ەڭبەكشىقازاق اۋدانىنان قارتباەۆتار جانە قاراساي اۋدانىنان كەلگەن جانعۇتتىلار وتباسىنا III دارەجەلى ديپلوم مەن 250 مىڭ تەڭگەنىڭ سەرتيفيكاتى بەرىلدى. بۇلار وبلىستىڭ ساۋدا, شىعارماشىلىق, اۋىل شارۋاشىلىعى, اسكەري قىزمەت سالالارىندا ەڭبەك ەتىپ جۇرگەن ونەگەلى وتباسىلار.
بايقاۋعا قاتىسقان باسقا 30 وتباسىنا دا وبلىس اكىمىنىڭ العىس حاتتارى مەن اقشالاي سىيلىقتار ۇسىنىلدى.
نۇربول الدىباەۆ,
«ەگەمەن قازاقستان»
الماتى وبلىسى
