بۇل ازاماتتار قۇقىعىن قورعايتىن جانە مەملەكەتتىك قىزمەت تۇرلەرىن كورسەتۋدە سىبايلاس جەمقورلىق تاۋەكەلدەرىن, اكىمشىلىك كەدەرگىلەردى جوياتىن «قوعامدىق وبۋدسمەندەر» قىزمەتى ەلىمىزدەگى ءۇشىنشى ماماندىرىلعان حالىققا قىزمەت كورسەتۋ ورتالىعىندا اشىلىپ وتىر. ارىزدانۋشىلار ومبۋدسمەندەرگە وزدەرىنىڭ قۇقىعىن جۇزەگە اسىرۋدا كەزدەسكەن پروبلەمالىق ماسەلەلەردى, سونداي-اق وزگە دە جاعدايلاردى ايتىپ, سۇراقتارىنا جاۋاپ الۋىنا بولادى. «قوعامدىق ومبۋدسمەندەر» قىزمەتىن اشۋ ەلىمىزدەگى سىبايلاس جەمقورلىققا قارسى ءبىرىنشى مەديا-ورتالىق پەن مەملەكەتتىك قىزمەت جانە سىبايلاس جەمقورلىققا قارسى ءىس-قيمىل اگەنتتىگىنىڭ بىرلەسكەن جوباسى بولاتىن. قوعامدىق دەرتكە قارسى كۇرەستى جانداندىرۋدى, ادامداردى وعان توزبەۋگە ۇيرەتۋدى باستى ماقسات ەتىپ قويعان ولار ەلمىزدەگى بارلىق حالىققا قىزمەت ەتۋ ورتالىقتارىنا مونيتورينگ جۇرگىزىپ وتىرادى.
«بارلىق وبلىس ورتالىقتارىنداعى حالىققا قىزمەت كورسەتۋ ورتالىقتارىنا ورتاق ءبىر كەمشىلىك بار. ولاردىڭ بارلىعىنداعى باعدارلامادا مەملەكەتتىك قىزمەت جانە سىبايلاس جەمقورلىققا قارسى ءىس-قيمىل اگەنتتىگىنىڭ دەپارتامەنتى مەن وبلىستىق ىشكى ىستەر دەپارتامەنتىنىڭ جۇمىسى ءبىر ارناعا توعىستىرىلماعان. مىسالى, كولىك يەلەرى تەحنيكالىق تەكسەرۋدەن وتكەندىگى تۋرالى قۇجاتىن الىپ, حالىققا قىزمەت كورسەتۋ ورتالىعىنا كەلەدى, ال ولاردىڭ اتى-ءجونى مۇنداعى بازادا جوق بولىپ شىعادى. سودان كولىك يەسى تەحنيكالىق تەكسەرۋ مەن حقو اراسىندا شاپقىلايدى.
بۇل ءبىر شيكىلىك. ەكىنشىسى سالىققا بايلانىستى. مىسالى اۋداننان ساتاتىن كولىگىنىڭ سالىعىن تولەگەن ادام حالىققا قىزمەت ەتۋ ورتالىعىنا كەلىپ ماشيناسىن ەسەپتەن شىعارايىن دەسە, مۇندا كومپيۋتەر ونى كورسەتپەيدى. ءبىز جۇرگىزگەن مونيتورينگ بويىنشا, قوستانايداعى پروبلەما –مۇندا پوليتسەيلەر حالىققا قىزمەت كورسەتۋ ورتالىعىنىڭ ماماندارىمەن ءبىر عيماراتتا وتىر. ال بۇل جۇرگىزۋشى كۋالىگىن الاتىن كەزدە وعان قىزمەت كورسەتۋشى ەكى ۆەدومساتۆ قىزمەتكەرلەرىنىڭ ء بىر بىرىمەن بايلانىسۋىنا, ودان ءارى سىبايلاستىققا باستايدى. كوزگە ۇرىپ تۇرعان قۇبىلىس» دەيدى سىبايلاس جەمقورلىققا قارسى ءبىرىنشى مەديا-ورتالىق توراعاسى تولەگەن بايعۇلوۆ. ەڭ باستىسى «قوعامدىق ومبۋدسمەن» قىزمەتى كورسەتىلەتىن مەملەكەتتىك قىزمەتتى الۋ كەزىندە زاڭسىز «دەلدالداردى» اۋلاقتاتۋعا كۇش سالاتىن بولادى.
سىبايلاس جەمقورلىققا قارسى ءبىرىنشى مەديا-ورتالىقتىڭ «قوعامدىق ومبۋدسمەن» قىزمەتى تۋرالى بۇل باستاماسى «جولداردا سىبايلاس جەمقورلىق دەڭگەيىن تومەندەتۋگە 10 قادام» جوباسى شەڭبەرىندە جۇزەگە اسىپ جاتىر. قوستانايداعى مامانداندىرىلعان حالىققا قىزمەت كورسەتۋ ورتالىعىنداعى «قوعامدىق ومبۋدسمەن» قىزمەتىنىڭ باستالۋىن ساپار بارىسىندا مەملەكەتتىك قىزمەت جانە سىبايلاس جەمقورلىققا قارسى ءىس-قيمىل اگەنتتىگى توراعاسىنىڭ ورىنباسارى اليك شپەكباەۆ كەلىپ كوردى. ول تۇتىنۋشىلارمەن اڭگىمەلەستى, ولاردىڭ پىكىرىن ءبىلدى.
ءنازيرا جارىمبەتوۆا
«ەگەمەن قازاقستان»
قوستاناي
