«حالقىڭىز ءوزىڭىزدى كورنەكتى مەملەكەت جانە قوعام قايراتكەرى, بەدەلدى عالىم, ۇلتجاندى ابىز اقساقالىمىز رەتىندە جاقسى بىلەدى ءارى قادىرلەيدى. ءسىز كەزىندە قازمۋ-ءدى بىتىرگەننەن كەيىن, كوپ جىل بويى وسى ءبىلىم ۇياسىندا جەمىستى ەڭبەك ەتتىڭىز. قازاق ادەبيەتىنىڭ وزەكتى تاقىرىپتارى بويىنشا زەرتتەۋلەر جۇرگىزىپ, بەرتىن كەلە ۇلكەن اكادەميك عالىم اتاندىڭىز. ەڭبەكتەرىڭىز جۇرتشىلىقتىڭ رۋحاني يگىلىگىنە اينالدى. ومىرلىك سوقپاعىڭىز ءسىزدى جوعارى وقۋ ورىندارىنىڭ رەكتورى, ەلىمىزدىڭ ءبىلىم ءمينيسترى, قازاقستاننىڭ مەملەكەت كەڭەسشىسى, قر پرەمەر-ءمينيسترىنىڭ ورىنباسارى, توتەنشە جانە وكىلەتتى ەلشى جانە باسقا دا اسا جاۋاپتى قىزمەتتىك لاۋازىمدارعا الىپ كەلدى. ءسىز سونىڭ بارىنەن دە سەنىم ۇدەسىنەن شىعىپ, كەمەل ءبىلىمىڭىز بەن باي تاجىريبەڭىزدى ەلىمىزدىڭ تاۋەلسىزدىگىن نىعايتۋ ىسىنە ارناي ءبىلدىڭىز. جۇيرىك قالامىڭىز ارقىلى ءاردايىم ەلىمىزدەگى ساياسي تۇراقتىلىقتىڭ نىعايۋىنا, حالقىمىزدىڭ بەرەكە-بىرلىگىنىڭ ارتۋىنا دارا پۋبليتسيستىك ءۇنىڭىزدى قوسىپ كەلەسىز. دەنساۋلىعىڭىز مىقتى, وتباسىڭىز امان-ەسەن بولىپ, وسى ەڭبەكتەرىڭىزدىڭ جەمىسىن ۇزاعىنان كورىپ, بالالارىڭىز بەن نەمەرەلەرىڭىزدىڭ مەيىر-شاپاعاتىنا بولەنە بەرىڭىز!» - دەپ اتاپ وتىلگەن مەملەكەت باسشىسىنىڭ قۇتتىقتاۋىندا.
مىرزاتاي جولداسبەك ۇلى 1937 جىلى قاراتاۋدىڭ قويناۋىندا, تالاستىڭ بويىندا, اقتوبە دەگەن اۋىلدا دۇنيەگە كەلدى. «ەل تاعدىرى - ەر تاعدىرى» كىتابىندا م. جولداسبەكوۆ ءوز ءومىربايانىن جىپكە تىزگەن مونشاقتاي باياندايدى. 1955 جىلى ول الماتىعا كەلىپ, قازاق مەملەكەتتىك ۋنيۆەرسيتەتىنىڭ فيلولوگيا فاكۋلتەتىنە وقۋعا تۇسەدى. عالىمنىڭ جارقىن جولى وسىدان باستالادى. مۇحتار اۋەزوۆ, الكەي مارعۇلان, ەسماعامبەت ىسمايىلوۆ, بەيسەنباي كەنجەباەۆ, مۇحامەتجان قاراتاەۆ, نىعمەت ساۋرانباەۆ, زەينوللا قابدولوۆ سەكىلدى عۇلاما عالىمداردان ءدارىس الادى. عالىم مەملەكەتتىك قىزمەتتە, ات ۇستىندە جۇرسە دە قالامىن قولىنان ءبىر كۇن تاستاعان ەمەس. اتا تاريحى, ەرتەدەگى ادەبيەت تاريحى, جىراۋلار مۇراسى, جامبىل جانە كەنەندى زەرتتەۋگە ارنالعان ەڭبەكتەرى قازاق ادەبيەتتانۋ عىلىمىنىڭ التىن قازىناسىن قۇرايدى.
