– وتاندىق جوعارى وقۋ ورىندارىنىڭ باسقارۋشىلارى مەن وقىتۋشىلارى وسىندا وقۋدان ءوتىپ, سودان سوڭ ۋنيۆەرسيتەتتىڭ ۇزدىك جۇمىستارى مەن تاجىريبەسىن ءوزى ەڭبەك ەتەتىن وقۋ ورنىنا ەنگىزۋى ءتيىس. ۋنيۆەرسيتەت – ءبىزدىڭ جاڭا جاھاندىق تالاپقا ستراتەگيالىق جاۋابىمىز. «بولاشاق» باعدارلاماسى قارجىسىنىڭ ءبىر بولىگىن نازارباەۆ ۋنيۆەرسيتەتىنە باعىتتاۋدىڭ ۋاقىتى كەلدى. نارىققا وزدەرىنىڭ يدەيالارى مەن تەحنولوگيالارىن ۇسىناتىن جاس عالىمدار كونسۋلتاتسيا, العاشقى كاپيتال, عيمارات, ماركەتينگ جانە زاڭگەرلىك قىزمەت تۇرلەرى بويىنشا جۇيەلى كومەككە يە بولۋى قاجەت, دەدى ەلباسى.
پرەزيدەنتتىڭ ايتۋىنشا, ۋنيۆەرسيتەتتە قازىرگى كەزدە ستۋدەنتتەر سانى 4 مىڭعا جەتتى. كەلەشەكتە ولاردىڭ سانى ەكى ەسەگە ارتادى. بۇگىندە مۇندا الەمنىڭ 55 ەلىنەن كەلگەن عالىم جۇمىس ىستەيدى. ولار ساباق بەرىپ قانا قويماي, عىلىمي زەرتتەۋلەرىن جۇرگىزەدى. وقۋ مەن زەرتتەۋ ءتىلى – اعىلشىن. وسى ۋاقىتقا دەيىن الەمدىك عىلىمي باسىلىمداردا مىڭنان استام عىلىمي جۇمىس جارىق كورگەن. سونداي-اق جۇزدەن استام ءبىلىم جانە عىلىم مەكەمەلەرىمەن ارىپتەستىك ورناتىلدى. نازارباەۆ ۋنيۆەرسيتەتى قىتاي, گونكونگ, ءۇندىستان, يندونەزيا, جاپونيا, وڭتۇستىك كورەيا, مالايزيا, سينگاپۋر جانە باسقا دا ەلدەردىڭ جەتەكشى جوعارى وقۋ ورىندارى ەنەتىن ازيا ۋنيۆەرسيتەتتەر اليانسىنىڭ تەڭ قۇرىلتايشىسى اتاندى. دەسە دە, ءوزىنىڭ بىرەگەيلىگىن ساقتاي وتىرىپ, ارىپتەستەردىڭ وزىق تاجىريبەسىن قابىلداي ءبىلۋ ارقىلى حالىقارالىق بايلانىستاردى ءارى قاراي دامىتا بەرۋ كەرەك, دەدى ن.نازارباەۆ.
دۋمان اناش,
«ەگەمەن قازاقستان»
