ماسەلەن, «تاريحي جادى جانە بولاشاققا كوزقاراس» سەكتسياسى شەڭبەرىندە ءسوز سويلەگەن اتاتۇرىك اتىنداعى مادەنيەت ورتالىعى ديرەكتورىنىڭ مىندەتىن اتقارۋشى زەكي ەراسلان «XX عاسىر باسىنداعى تۇركى الەمى: جالپى تالداۋ تالپىنىسى» تاقىرىبىندا ءسوز سويلەسە, وزبەكستان رەسپۋبليكاسىنىڭ عىلىم اكادەمياسى, تاريح ينستيتۋتىنىڭ ديرەكتورى راۆشان ابۋددالاەۆ تاريحي سانا جانە قازىرگى ورتاازيالىق قوعام توڭىرەگىندەگى پايىمىمەن ءبولىستى.
بۇل پانەلدىك وتىرىستا ءسوز العان ج بالاساعۇن اتىنداعى قىرعىز ۇلتتىق ۋنيۆەرسيتەتىنىڭ پروفەسسورى تىنچتىقبەك چوروەۆتىڭ «1917 جىل قوس توڭكەرىسى: كەڭەس زامانىندا اشىلماعان تۇستارى», تۇركيانىڭ يەديتيپە ۋنيۆەرسيتەتىنىڭ پروفەسسورى احمەت تاشاعىلدىڭ «تۇركى تايپالارى تاريحىن زەرتتەۋدىڭ قازىرگى تۇركى الەمىنە اسەرى», م.ك. امموسوۆ اتىنداعى سولتۇستىك-شىعىس فەدەرالدى ۋنيۆەرسيتەتى (رەسەي, ساحا رەسپۋبليكاسى) جانىنداعى قوعامدىق بىرلەستىكتەردىڭ ازاماتتىق باستامالارىن قولداۋ جونىندەگى كەڭەس توراعاسىنىڭ ورىنباسارى افاناسي نيكولاەۆتىڭ «سولتۇستىك ساقتاردىڭ شىعۋ تەگى تۋرالى», مولدوۆاداعى مادەني مۇرا ينستيتۋتىنىڭ دوتسەنتى ەليزاۆەتا كۆيلينكوۆانىڭ «تۇركىتىلدەس جانە پراۆوسلاۆ گاگاۋزدار: گاگاۋزداردىڭ ەتنيكالىق تاريحىنداعى تىلدىك جانە كونفەسسيونالدىق تۇتاستىق بولاشاعى» تاقىرىپتارى بويىنشا جاساعان باياندامالارى مازمۇندى شىقتى.
«تۇركى ادەبي ءداستۇرى جانە قازىرگى كەزەڭ» تاقىرىبىندا وتكەن سەكتسيادا دا قۇندى ويلار ايتىلدى. ماسەلەن, قازاقستاننىڭ ۇعا اكادەميگى سەيىت قاسقاباسوۆ تۇركىلەردىڭ ورتاق رۋحانياتى تۋرالى كەلەلى وي قوزعاسا, قىتاي الەۋمەتتىك عىلىمدار اكادەمياسىنىڭ ەتنيكالىق ادەبيەت ينستيتۋتىنىڭ ءبولىم باسشىسى جۋماتۋەردي اديلي «ماناس» ەپوسىنىڭ قىتاي جەرىندە زەرتتەلۋ جايىنا توقتالدى.
«الەم وركەنيەتىندەگى تۇركى مادەني مۇراسى» سەكتسياسى شەڭبەرىندە «نازارباەۆ ورتالىعىنىڭ» باس عىلىمي قىزمەتكەرى ايمان دوسىمباەۆا باتىس تۇرىك قاعاناتى يەلىگىندەگى ەتنومادەني جاعداي توڭىرەگىندەگى ءوز پايىمىمەن بولىسسە, رەسەي عىلىم اكادەمياسى ءسىبىر بولىمشەسىنىڭ فيلولوگيا ينستيتۋتىنىڭ پروفەسسورى نادەجدا وينوتكينوۆا فورۋم قاتىسۋشىلارىنىڭ نازارىنا التايلىقتاردىڭ اتا-بابا اراۋاعىنا سيىنۋى جانە وتباسىلىق قورىمداردى دارىپتەۋىنە قاتىستى قۇندى زەرتتەۋىن ۇسىندى.
موڭعوليادان كەلگەن عالىم-پروفەسسورلار سۋحبااتار داگۆاادورج بەن ەنحتور التانگەرەل موڭعوليا ۇلتىق مۋزەيىندەگى تۇركى جادىگەرلەرى جانە شيۆەەت ۋلاان عۇرىپتىق كەشەنى مەن كونە-تۇركى مۇراسىنىڭ بايلانىسى جونىندە اڭگىمە ءوربىتتى.
ءلايلا ەدىلقىزى,
«ەگەمەن قازاقستان»
