ونىڭ ايتۋىنشا, باتىس قازاقستان وبلىسىندا ەل تاريحىن تانىپ, بىلۋگە قۇشتار جاندارعا كورسەتە الاتىنداي باي تاريح پەن كونە جادىگەرلەر از ەمەس.
«جۋىندا عانا وسىنداي قۇندىلىقتاردى دارىپتەي وتىرىپ, جۇرتتىڭ نازارىنا ۇسىنۋعا قاتىستى جوسپارلارىمىزدى ءۇش كەزەڭ بويىنشا جاساپ شىقتىق. ياعني, قىسقا مەرزىمدى, ورتا مەرزىمدى جانە ۇزاق مەرزىمدى باسىم ماقساتتارعا جىكتەلگەن جۇمىستارىمىزدىڭ نەگىزگى باعىتى – ۇلتىمىزدىڭ رۋحاني تۇرعىدا جاڭعىرۋىن جوعارى دەڭگەيدە جۇزەگە اسىرۋ بولماق. بۇل رەتتە العاشقى دايىندىق جۇمىستارىمىز لاتىن الىپبيىنە كوشۋ ماسەلەسىنە قاتىستى قولعا الىندى. مۇنىڭ ءبارى ءبىر عانا كۇندە سوڭىنا جەتكىزە قوياتىن شارۋالار ەمەس ەكەندىگىن ەسكەرىپ, قازىرگى كەزدە ەلگە بەلگىلى تانىمال تۇلعالار مەن عالىم, ۇستازدار قاۋىمى بۇقارا ىشىندە ءتۇسىندىرۋ جۇمىستارىن جۇرگىزۋدە, – دەدى ايماق باسشىسى كوميسسيا وتىرىسىنان كەيىن جۋرناليستەرگە بەرگەن سۇحباتىندا. – سول سياقتى, «تۋعان جەر» باعدارلاماسىنداعى مىندەتتەردى ورىنداۋ ءۇشىن ايماقتاردان مەتسەناتتار مەن دەمەۋشىلەر ىزدەستىرىلۋدە. قوعامدى اۋىزبىرلىك پەن ۇيىمشىلدىققا, تاتۋ-ءتاتتى تىرشىلىك كەشۋگە ۇندەيتىن ءارتۇرلى الەۋمەتتىك ماڭىزى زور جيىن, شارالار وتكىزۋگە بەلسەندى ءارى ۇلتجاندى ازاماتتار تارتىلۋدا. ماسەلەن, بۇل باعىتتاعى يگى ءىسىمىزدىڭ ءبىرى – الاش قوزعالىسىنىڭ 100 جىلدىعىنا وراي, ايماق ورتالىعىنان ارنايى «الاش» مۋزەيىن اشۋدى جوسپارلاۋ ۇستىندەمىز. مۇنداي ويدى ءوڭىر كاسىپكەرلەرى مەن ازاماتتارى ءبىراۋىزدان قۇپتادى. ءبارى ويداعىداي بولسا, جىل سوڭىنا قاراي «الاش» مۋزەيىن ەل تاماشالايتىن بولادى دەپ جوسپارلاپ وتىرمىز. ول ءۇشىن وڭىردە ءوز زامانىنان بەرى مۇرتى بۇزىلماي ساقتالعان عيمارات تا, ونىڭ ءىشىن تولتىرۋعا كونە جادىگەرلىك بۇيىمدار دا جەتكىلىكتى».
