ماسەلەن, اقش-تاعى ميچيگان شتاتى ۋنيۆەرسيتەتىنىڭ ەۋروپا, رەسەي جانە ەۋرازيا زەرتتەۋ ورتالىعىنىڭ ديرەكتورى نورمان گرەم «ازەربايجان, قازاقستان جانە رەسەيدەگى ەكونوميكانى ءارتاراپتاندىرۋدىڭ ساياسي ەكونومياسى» دەگەن تاقىرىپتا جاساعان بايانداماسىندا تابيعي رەسۋرستاردى ەكسپورتتاۋدىڭ تيىمدىلىگى, مەملەكەتتى ەكونوميكالىق جاعىنان دامىتۋدىڭ نەگىزگى فاكتورلارى, ەلدەردىڭ ەڭبەك ونىمدىلىگىن ارتتىرۋ, كاپيتال نارىعىنىڭ ءوسۋى سەكىلدى ماسەلەلەر جايىندا ءوز ويىن ورتاعا سالدى. اسىرەسە, ازەربايجان مەن قازاقستاننىڭ ەكونوميكانى ديۆەرسيفيكاتسيالاۋ باعىتىندا ۇستانعان ساياساتىنا جان-جاقتى توقتالدى.
يۋنەسكو ىستەرى جونىندەگى تۇركيا ۇلتتىق كوميسسياسىنىڭ توراعاسى ءوجال وعىزدىڭ «تۇركى ءتىلىنىڭ حالىقارالىق قاۋىمداستىق ومىرىنە ەنۋى» تاقىرىبىنداعى بايانداماسىندا ايتىلعان ويلار دا قۇندى كورىندى. «وزدەرىڭىز بىلەتىندەي, قازىر الەم جاھاندانۋ ۇدەرىستەرىن باستان كەشىپ جاتىر. ءبىز ءۇشىن ونىڭ وزىندىك ءمانى مەن اسەرى بار. نەگە, سەبەبى, بۇگىندە جويىلۋعا از قالعان تىلدەردى ساقتاۋ ماسەلەسى كۇن تارتىبىندە وتكىر تۇر. ال ونداي تىلدەر جويىلسا نە بولادى؟ وندا تەك حالىقارالىق تىلدەر عانا قالادى. سوندىقتان, ءبىز وسى وزەكتى ماسەلە تۋرالى جان-جاقتى ويلانىپ, ايرىقشا نازاردا ۇستاۋىمىز كەرەك», – دەدى ءوجال وعىز.
ءبىر اتاپ وتەرلىگى, بۇل كۇنگى فورۋم اياسىندا حالىقارالىق تۇركى اكادەمياسىنىڭ سوڭعى جىلدارى جارىققا شىعارعان كىتاپتارىنىڭ كورمەسى ۇيىمداستىرىلدى.
ءلايلا ەدىلقىزى,
«ەگەمەن قازاقستان»
