لارا فابيان
لارا فابيان دەگەندە فرانتسۋز تىلىندەگى اتاقتى Je t’aime ءانىنىڭ سىڭسىپ جەتكەن مەلودياسى قۇلاعىمىزعا كەلە قالاتىنى بار. ەسترادالىق رەگيستردىڭ جوعارعى نوتالارىندا شىرقاي الاتىنى ءۇشىن لارا فابياننىڭ داۋىسىن سىنشىلار «ليريكالىق سوپرانونىڭ ەتالونى» دەپ باعالايدى.
ول 1970 جىلى بريۋسسەلدىڭ شەتىندەگى ەتتەربەك اۋدانىندا دۇنيەگە كەلدى. قىزىنىڭ تالانتىن بايقاعان اكەسى 8 جاسقا تولعاندا پيانينو ساتىپ الىپ بەرەدى. ارى قاراي وقۋىن بريۋسسەل كونسەرۆاتورياسىندا جالعاستىرادى. لارانىڭ اكەسى دە ونەردەن قارا جاياۋ ەمەس ەدى, گيتاريست بولعان ول قىزىن ەرتىپ الىپ, ءارتۇرلى مۋزىكا كلۋبتارىندا ونەر كورسەتىپ ءجۇردى. وسى تۇستاردا لارا «ترامپلين» («Tremplin de la chanson») كونكۋرسىنا قاتىسىپ, جۇلدەلى ورىنعا يە بولدى. تۇندە ۇيىقتاپ, تاڭەرتەڭ تۇرعاندا الەمگە ايگىلى تۇلعا بولىپ ويانۋ ەرتەگىگە بەرگىسىز شىندىق ەكەن. 1988 جىلى ليۋكسەمبۋرگتا وتكەن «Evrovision-88» بايقاۋىنا قاتىسۋى انشىگە ءبىر كۇندە اتاق پەن ابىروي اكەلدى. 18 جاستاعى بويجەتكەننىڭ ورىنداۋىنداعى «Croire» ءانى حالىق اراسىندا لەزدە حيتكە اينالىپ, ەۋروپادا 600 مىڭنان استام ەكزەمپليارمەن تارالىپ, نەمىس, اعىلشىن تىلدەرىنە اۋدارىلدى. وسىدان كەيىن-اق ونەرى ورگە ءجۇزىپ, «L’Aziza est en pleurs», «Je sais» اتتى البومدارىن جازىپ, «Pure» اتتى ءۇشىنشى البومىن كانادادا 1996 جىلى جارىققا شىعاردى. وسىدان كەيىن-اق, نەبىر تەلەۆيزيالىق شوۋ باعدارلامالاردىڭ قوناعى بولىپ, فرانتسۋزدىق بەدەلدى جۋرنالدىڭ باس بەتىندە جارقىرادى.
ۇزدىك ۆوكاليست جانە ۇزدىك جاندى داۋىستاعى كونتسەرت بويىنشا Felix Awards سىيلىعىن (1995), جىلدىڭ پوپ-البومى (1997), Felix Award سىيلىعىنا (1998), «ۇزدىك ءارتىس» اتىلىمى بويىنشا بەنيليۋكس حالىقارالىق مۋزىكا پرەمياسىنا (2001) يە بولدى. ءانشى ءوزىنىڭ فەيسبۋك الەۋمەتىك جەلىسىندەگى جازبالارىنىڭ بىرىندە 2018 جىلى لارا فابيان اتتى حالىقارالىق تۋر سولتۇستىك امەريكادا وتەتىنى تۋرالى ايتقان. 2017 جىلى كۇزدە شىعاتىن «Camouflage» جيناعى سوڭعى ونجىلدىقتاعى اعىلشىن تىلىندەگى العاشقى البومى بولماق.
ەۆا لونگوريا
ال فرانتسيانىڭ استاناسىندا وتكەن Global Gift Gala قايىرىمدىلىق كەشىندە ديماشتى بيگە شاقىرىپ جۇرگەن ەۆا لونگوريا امەريكالىق كينو اكتريسا, مودەل. قازاقستاندىق جۇرتشىلىققا «وتچاياننىح دوموحوزياەك» سەريالىنداعى گەبريەل سوليس رولىمەن ەتەنە تانىس بولاتىن. ول 1975 جىلى اقش-تىڭ تەحاس شتاتىندا دۇنيەگە كەلگەن. وتباسىنداعى بەس قىزدىڭ ىشىندەگى ءسۇت كەنجەسى ەۆا لونگوريا عانا تەحاس ۋنيۆەرسيتەتىنە وقۋعا تۇسەدى. كينەزيولوگيا سالاسىندا وقىپ ءجۇرىپ, ول بوس ۋاقىتىندا ستۋدەنتتىك تەاتردا ونەر كورسەتەدى. 1988 جىلى ناۋرىزدا كورپۋس كريستي ءسان كونكۋرسىندا باس جۇلدەگە يە بولىپ, لوس-اندجەلەستە وتەتىن تالانتتار شوۋىنا جولداما الىپ, باعى جانادى. وسىدان سوڭ ول اكتەرلىق كارەراسىن شىڭداۋ ماقساتىندا كاليفورنيادا قالۋدى ءجون كورەدى.
اكتەرلىق كارەراسى تۋرالى ايتاتىن بولساق, 2000 جىلى لونگوريا «بەۆەرلي حيللز 90210» فيلمىندە جىلت ەتىپ كورىنىپ قالاتىن تۇسى بار. كەلەسى جىلى جاس اكتريسا «The Young and the Restless» سەريالىندا جىندى يزابەللانىڭ رولىندە وينايدى. بۇل ەڭبەگى ءۇشىن 2002 جىلى American Latino Media Arts (ALMA) سىيلىعىنا يە بولادى. بۇدان كەيىن «وتچاياننىە دوموحوزيايكي» (ABC Desperate Housewives) سەريالىنداعى جاڭا ءرولى ونى جالپىحالىقتىق تانىمالدىلىققا يە ەتىپ, كەلەسى جىلى «Teen Choice Awards» كونكۋرسىندا ارنايى جۇلدە الدى. سونىمەن بىرگە 2005 جىلى 50 ەڭ ادەمى ادامدار تىزىمىندە ەسىمى اتالدى. ءبىر عانا سەريالداعى ءرول ساتتىلىككە جول اشىپ, «Harsh Times» (2005, كريستيان بەيل), The Sentinel (2006, مايكل دۋگلاس) پەن The Heartbreak Kid (2007, بەن ستيللەر) فيلمدەرىنە ءتۇستى. 2006 جىلى «ۇزدىك كومەديا اكتريساسى» نوميناتسياسى بويىنشا «التىن گلوبۋس» پرەمياسىنا يە بولدى. 2017 جىلى ريكاردو دە مونرەيلدىڭ رەجيسسەرلىگىمەن تۇسىرىلگەن lowriders دراماسىندا باستى رولدەردىڭ ءبىرىن سومدادى.
ول كينو ونەرىنەن تىس قايىرىمدىلىقپەن اينالىسادى. ناقتىراق ايتقاندا, Padres Contra el Cancer ۇلتتىق كوممەرتسيالىق ەمەس ۇيىمىنىڭ باسقارۋشىسى. بىرنەشە جىلدان بەرى قاتەرلى ىسىك دەرتىنە شالدىققان لاتىنامەريكالىق بالالارعا قايىرىمدىلىق كورسەتۋمەن جانە وزگە دە حالىقارالىق ماڭىزى بار قايىرىمدىلىق شارالارىنا بەلسەنە ارالىسىپ كەلەدى.
ايا ءومىرتاي,
«ەگەمەن قازاقستان»
