"ازيا جۇرەگى" حالىقارالىق كونفەرەنتسياسى جالعاسۋدا

ءۇندىستاننىڭ امريتسار قالاسىندا ەلدىڭ پرەمەر-ءمينيسترى شەتەلدىك ديپلوماتتاردى قابىلدادى, دەپ حابارلايدى تاسس ءۇندىستاننىڭ سىرتقى ىستەر ءمينيسترى ۆيكاس سۆارۋپقا سىلتەمە جاساپ. ءمينيستردىڭ ايتۋىنشا, كەزدەسۋگە پاكىستاننان پرەمەر ءمينيستردىڭ كەڭەسشىسى سارتادج ازيز دا بارعان. كەشە اۋعانستان بويىنشا «ىستامبۇل ۇدەرىسىنە» قاتىسۋشى ەلدەردىڭ سىرتقى ىستەر مينيسترلەرىنىڭ 6-ءشى جيىنى شەڭبەرىندە "ازيانىڭ جۇرەگى جانە بايلانىس مۇمكىندىكتەرى" (Heart of Asia and Connectivity) اتتى حالىقارالىق كونفەرەنتسيا باستالعان بولاتىن. باسىلىمنىڭ حابارلاۋىنشا, بۇل كونفەرەنتسيا ەكى كۇنگە سوزىلادى. جيىننىڭ ءبىرىنشى كۇنى دەلەگاتتار بىرلەسكەن وتىرىس وتكىزىپ, امريتساردا ورنالاسقان قاسيەتتى عيباداتحاناعا بارعان. بۇعان دەيىن حابارلاعانىمىزداي,  كونفەرەنتسياعا ءۇندىستاننىڭ پرەمەر-ءمينيسترى نارەندرا مودي مەن اۋعانستاننىڭ پرەزيدەنتى اشراف گانيدەن باسقا 45 مەملەكەتتەن دەلەگاتتار كەلگەن. ونىڭ ىشىندە «ىستامبۇل ۇدەرىسىنە» قاتىسۋشى 14 ەلدىڭ (قازاقستان, تۇركيا, ازەربايجان, قىرعىزستان, اۋعانستان, ءۇندىستان, يران, قىتاي, ءباا, پاكىستان, رەسەي, ساۋد ارابياسى, تاجىكستان,تۇركمەنستان) وكىلدەرى بار. سونىمەن قاتار وسى ۇدەرىستى قولدايتىن اقش, ەۋرووداق, ۇلىبريتانيا, جاپونيا سەكىلدى 17 مەملەكەت تە ءوز دەلەگاتتارىن جىبەرگەن. ءبىر ايتا كەتەرلىگى, بۇل كونفەرەنتسيا جىل سايىن 2011 جىلدان بەرى وتكىزىلىپ كەلە جاتىر. ول اۋعانستاننىڭ ەكونوميكالىق بايلانىستارىن دامىتۋعا, لاڭكەستىكپەن, ەكسترەميزممەن كۇرەس جۇرگىزۋگە باعىتتالعان.