استانادا «امىرە» دراماسى قويىلادى

6 جەلتوقسان كۇنى استانا قالاسىنداعى بەيبىتشىلىك جانە كەلىسىم سارايىندا «امىرە» دراماسىنىڭ پرەمەراسى وتەدى, دەپ حابارلايدى ەلوردانىڭ مادەنيەت, مۇراعاتتار جانە قۇجاتتاما باسقارماسى. اتالعان پرەمەرانى ق. قۋانىشباەۆ اتىنداعى مەملەكەتتىك اكادەميالىق قازاق مۋزىكالىق دراما تەاترىنىڭ ۇجىمى قازاقستان رەسپۋبليكاسى تاۋەلسىزدىگىنىڭ 25 جىلدىعى اياسىندا ۇسىنادى. 1925 جىلى پاريجدە وتكەن دۇنيەجۇزىلىك «ەكسپو»  كورمەسىنە قاتىسقان تۇڭعىش قازاقتىڭ تاعدىرىنا ارنالعان تۋىندىنىڭ تابيعاتىندا توبىر مەن تۇلعانىڭ, ءومىر مەن ونەردىڭ, امانات پەن قيانات ۇعىمدارىنىڭ قاقتىعىسى كورىنىس الادى. كەيىس دۇنيەدەن بەرەكە تاپپاعان امىرەنىڭ - ءان-امىرەگە اينالىپ, ونەر كوگىنەن ءۇن قاتقانى باياندالادى. سپەكتاكلدىڭ باس كەيىپكەرى «امىرە» بەينەسىن تەاتر ارتيستەرى قاسىمحان بۇعىباي مەن  اسىلبەك قاپاەۆتار سومدايدى. پەسا اۆتورى - جازۋشى, دراماتۋرگ راحىمجان وتارباەۆ. سپەكتاكلدىڭ قويۋشى رەجيسسەرى - قر ەڭبەك  سىڭىرگەن قايراتكەرى, رەجيسسەر - نۇرلان جۇمانيازوۆ. سپەكتاكلدىڭ باس سۋرەتشىسى - بەرىك بۋرباەۆ.  حورمەيستەرى - قر ەڭبەك سىڭىرگەن قايراتكەرى - امانتاي جۇماشەۆ. بۇل سپەكتاكل دراماتۋرگ ر.وتارباەۆ پەن رەجيسسەر ن. جۇمانيازوۆتىڭ قاللەكي ساحناسىنداعى بىرلەسكەن ەكىنشى جۇمىستارى بولماق. بۇعان دەيىن «ناشاقورلار جايلى نوۆەللا» پەساسىنىڭ جەلىسى بويىنشا «كولەڭكەسىز جولاۋشى»  اتتى درامانى قويعان ەدى.