رەسپۋبليكالىق ايتىس جەڭىمپازدارى ماراپاتتالدى

وڭتۇستىك قازاقستاندا وتكەن ەل تاۋەلسىزدىگىنىڭ 25 جىلدىعى مەن 1 جەلتوقسان – قر تۇڭعىش پرەزيدەنتى كۇنىنە وراي ۇيىمداستىرىلعان «بىرلىگىمىز جاراسقان-ماڭگىلىك ەل» رەسپۋبليكالىق اقىندار ايتىسىندا ەلدىڭ بەلەستى جيىرما بەس جىل ىشىندەگى تولاعاي تابىستارى مەن جەتىستىكتەرى ادەمى ۇيقاستارقا قۇرىلىپ, كوتەرىلگەن كەلەلى ماسەلەلەر, قىز بەن جىگىتتىڭ ءازىل ايتىسى ايتىس سۇيەر كورەرمەنگە ايرىقشا كوڭىل-كۇي, رۋحاني سەرپىلىس سىيلادى, دەپ حابارلادى وقو اكىمىنىڭ ءباسپاسوز قىزمەتى. ازۋلى اقىنداردىڭ كەشەگى تارتىسىنان – ءى كەزەڭىنەن اقتىق الامانعا سۋىرىلىپ شىققان 5 جۇپ, ياعني, 10 اقىن – قاجىمۇقان ابزالوۆ (وقو) پەن قانات مىرزاحان (جامبىل وبلىسى), جانداربەك ناۋشابەكوۆ (وقو) پەن ارزىگۇل قايىمبەكقىزى (قىتاي حالىق رەسپۋبليكاسى), انار جاپپارقۇلوۆا (وقو) مەن سىرىم اۋەسحان (استانا قالاسى), نۇرلىبەك مەيىرمانوۆ (وقو) پەن تۇرار تىلەۋليەۆ (وقو), ءبىرجان بايتۋوۆ (وقو) پەن جانداربەك بۇلعاقوۆتار (استانا قالاسى) ادەمى ايتىس جاساپ, كورەرمەننىڭ دەلەبەزىن قوزدىردى. الامان دودانىڭ ماراپاتتاۋ راسىمىندە ءسوز العان وبلىس اكىمى ج.تۇيمەباەۆ وبلىسىمىزداعى مادەنيەت سالاسىنا قاتىستى اتقارىلعان جۇمىستاردىڭ بارىسىن بايانداي كەلە قازاقتىڭ ءتول ونەرى – ايتىستىڭ الاشتىڭ بالاسى ءۇشىن ورنى بولەك ەكەنىن جەتكىزدى. «ايتىس ونەرى يۋنەسكو-نىڭ ماتەريالدىق ەمەس مادەني مۇرا تىزىمىنە ەنگىزىلۋى قازاق ەلى ءۇشىن ۇلكەن مارتەبە. وسىنداي باعا جەتپەس, تەڭدەسى جوق ءسوز سايىسى ءبىزدىڭ وڭتۇستىكتە جىل سايىن ءداستۇرلى تۇردە وتكىزىلىپ كەلەدى. مىنە, بۇگىنگى وتكىزىلىپ وتىرعان رەسپۋبليكالىق اقىندار ايتىسى قازاقستان رەسپۋبليكاسىنىڭ تۇڭعىش پرەزيدەنتى كۇنىنە جانە تاۋەلسىزدىگىمىزدىڭ 25 جىلدىعىنا ارنالىپ وتىر. پرەزيدەنتىمىز نۇرسۇلتان ءابىش ۇلى نازارباەۆ تاۋەلسىز ەلىمىزدە مادەنيەتتىڭ, ۇلتتىق ونەرىمىز بەن ءداستۇر-سالتتارىمىزدىڭ ءوسىپ-وركەندەۋىن ۇنەمى نازاردا ۇستاپ كەلە جاتقانى بارشامىزعا ايان. بۇگىنگى وتكىزىلىپ جاتقان اقىندار ايتىسى وسىنىڭ ايعاعى», - دەدى ج.تۇيمەباەۆ. مۇنان سوڭ, ەكى كۇنگە ۇلاسقان جىر دوداسىنىڭ جەڭىمپازدارىن ماراپاتتاۋ ءراسىمى باستالدى. اتاپ ايتقاندا, الامان ايتىستىڭ باس جۇلدەسىن وڭتۇستىكقازاقستاندىق انار جاپپارقۇلوۆا ۇتىپ الىپ, جەڭىمپازعا Renault Sandero ءدجيپى تابىس ەتىلدى. جۇلدەلى ءى ورىنعا استانالىق جانداربەك بۇلعاقوۆ لايىقتى دەپ تانىلىپ, وعان Lada Granta تەمىرتۇلپارى سىيلانسا, ءىى ورىن وڭتۇستىكتىڭ نامىسىن قورعاعان تۇرار تىلەۋليەۆكە بۇيىرىپ, Nexia Sohc جەڭىل كولىگىنىڭ كىلتى تابىس ەتىلدى. ال جۇلدەلى ءىىى ورىندى قاجىمۇقان ابزالوۆ (وقو) يەلەنىپ, وعان 1,5 ملن. تەڭگە كولەمىندە قارجىلاي سىيلىق بەرىلدى.