ەلوردادا ەڭبەك جانە وتباسى اۋلەتتەرى اراسىنداعى «ۇلاعاتتى اۋلەت» قالالىق بايقاۋىنىڭ جەڭىمپازدارى ماراپاتتالدى. بايقاۋدى ەلوردالىق ىشكى ساياسات باسقارماسىنىڭ قولداۋىمەن «قازاقستان ايەلدەرى قاۋىمداستىعى» قب ۇيىمداستىردى, دەپ حابارلايدى استانا قالاسى اكىمدىگىنىڭ ءباسپاسوز قىزمەتى.
ماقساتى ۇرپاقتار ساباقتاستىعىن ساقتاۋ, ەڭبەككە قۇرمەتپەن قاراۋ, ەڭبەك داستۇرلەرىن ساقتاۋ جانە كوبەيتۋ بولىپ تابىلاتىن بايقاۋعا 34 وتباسى قاتىستى. ولاردىڭ اراسىندا ارتىستەر, عالىمدار, پەداگوگتار, جۋرناليستەر, زاڭگەرلەر جانە مەدياتورلاردىڭ اۋلەتتەرى بار. ەڭبەك ءوتىلى, اۋلەت وكىلدەرىنىڭ سانى, ەڭبەكتەگى جەتىستىكتەرى جانە كاسىپورىننىڭ دامۋىنا قوسقان ۇلەستەرى - جارىسقا قاتىسۋشىلار وسى كريتەريلەر بويىنشا باعالاندى
«ءاربىر وتباسى داستۇرلەرىمەن مىقتى. بۇل بايقاۋ ارقىلى ءبىز جاستار تاربيەسىندەگى وتباسىنىڭ, اعا ۇرپاقتىڭ بەدەلىن كوتەرەمىز. بۇگىن ءبىز ءبىر سالاداعى ەڭبەك ءوتىلى 200 جىلدان اساتىن اۋلەتتەردى ماراپاتتاپ جاتىرمىز», - دەپ ءمالىم ەتتى «قازاقستان ايەلدەرى قاۋىمداستىعىنىڭ» پرەزيدەنتى گۇلنار بايىمبەتوۆا.
بايقاۋدىڭ قورىتىندىسى بويىنشا, ءبىرىنشى ورىندى پەداگوگتار وتباسى ارعىنباەۆتار يەلەندى, ولاردىڭ ءبىلىم سالاسىنداعى ەڭبەك ءوتىلى 220 جىلدى قۇرايدى. گران-پري سىزدىقوۆتار وتباسىنا بەرىلدى. بۇل ەنەرگەتيكتەر وتباسىنىڭ بارلىق مۇشەلەرى 200-دەن اسا جاس ماماندى وقىتىپ, تاجىريبە بولىسكەن. وتباسى وكىلدەرىنىڭ ءبىر كاسىپورىنداعى جالپى ەڭبەك ءوتىلى 274 جىلدى قۇرايدى.
